ವಯಸ್ಸು 37, ಆದರೂ ಕುಗ್ಗಿಲ್ಲ ಧೋನಿ ಶಕ್ತಿ... ಕೊನೆಯ ಓವರ್​ನಲ್ಲಿ ಸಿಡಿಸಿದ್ರು ಹ್ಯಾಟ್ರಿಕ್​ ಸಿಕ್ಸ್​

ಐಪಿಎಎಲ್​ನ ದುಬಾರಿ ಬೌಲರ್​ ಜಯದೇವ್​ ಉನಾದ್ಕಟ್​ ಎಸೆದ 20 ಓವರ್​ನಲ್ಲಿ ಧೋನಿ ಕೊನೆಯ ಮೂರು ಎಸೆತಗಳನ್ನು ಬೌಂಡರಿ ಗೆರೆ ದಾಟಿಸುವ ಮೂಲಕ ತಮ್ಮ ತೋಳಲ್ಲಿ ಶಕ್ತಿ ಇನ್ನೂ ಇದೆ ಎಂಬುದನ್ನು ಟೀಕಾಕಾರರಿಗೆ ತೋರಿಸಿಕೊಟ್ಟಿದ್ದಾರೆ.

ಚೆನ್ನೈ: ಯಾವ ತಂಡದ ಪರ ಆಡಿದರೂ ಧೋನಿ ಆಟ ಬದಲಾಗದು, ಅದು ರಾಷ್ಟ್ರೀಯ ಪಂದ್ಯವಾಗಲಿ, ಐಪಿಎಲ್​ನಲ್ಲಾಗಲಿ ಅಥವಾ ದೇಶಿಯ ಟೂರ್ನಿಯಾದರೂ ಧೋನಿ ಮಾತ್ರ ತಮ್ಮ ಫಿನಿಶಿಂಗ್​ ಸ್ಟೈಲ್​ನಲ್ಲಿ ಬದಲಾಗುವುದಿಲ್ಲ ಎನ್ನುವುದಕ್ಕೆ ರಾಜಸ್ಥಾನ ರಾಯಲ್ಸ್​ ನಡುವಿನ ಪಂದ್ಯದಲ್ಲಿ ತಿಳಿದುಬಂದಿದೆ.

ಟಾಸ್​ ಸೋತು ಬ್ಯಾಟಿಂಗ್​ ಇಳಿದ ಚೆನ್ನೈ 27 ರನ್​ಗಳಿಸುವಷ್ಟರಲ್ಲಿ ಆರಂಭಿಕ ಮೂವರ ವಿಕೆಟ್​ ಕಳೆದುಕೊಂಡು ಆರಂಭಿಕ ಆಘಾತ ಎದುರಿಸಿತ್ತು. ಆದರೆ, ಕೇವಲ 5 ನೇ ಓವರ್​ನಲ್ಲಿ 5 ನೇ ಬ್ಯಾಟ್ಸ್​​​ಮನ್​ ಆಗಿ ಕಣಕ್ಕಿಳಿದ ಎಂಎಸ್​ ಧೋನಿ 46 ಎಸೆತಗಳಲ್ಲಿ 77 ರನ್​ ಚಚ್ಚಿ ತಂಡದ ಗೆಲುವಿನಲ್ಲಿ ಪ್ರಮುಖ ಪಾತ್ರವಹಿಸಿದರು. ಆರಂಭಿಕ ಓವರ್​ಗಳಲ್ಲಿ ಕೊಂಚ ನಿಧಾನಗತಿ ಆಟಕ್ಕೆ ಇಳಿದಿದ್ದ ಕ್ಯಾಪ್ಟನ್​ ಕೂಲ್​ ಕೊನೆಯ 4 ಓವರ್​ಗಳಲ್ಲಿ ಬ್ರಾವೋ, ಜಡೇಜಾ ಜೊತೆಗೂಡಿ 64 ರನ್​ ಬಾರಿಸಿದರು.

ಕೊನೆಯ ಓವರ್​ನಲ್ಲಿ ಹ್ಯಾಟ್ರಿಕ್​ ಸಹಿತ 28 ರನ್​

ಧೋನಿ ಕೊನೆಯ ಓವರ್​ನಲ್ಲಿದ್ದರೆ ಯಾವುದೇ ಬೌಲರ್​ಗಾದರೂ ಬೌಲಿಂಗ್​ ಮಾಡಬೇಕಾದರೆ ನಿಜಕ್ಕೂ ಸವಾಲಿನ ಕೆಲಸ. ಅದು ನಿನ್ನೆಯ ಪಂದ್ಯದಲ್ಲೂ ಸಾಭೀತಾಯಿತು, ಇನಿಂಗ್ಸ್​ನ ಕೊನೆಯ ಓವರ್​ ಎಸೆಯಲು ಬಂದ ಐಪಿಎಲ್​ನ ದುಬಾರಿ ಬೌಲರ್​ಗೆ ಧೋನಿ ಕೊನೆಯ ಮೂರು ಎಸೆತಗಳನ್ನು ಬೌಂಡರಿ ಗೆರೆ ದಾಟಿಸಿದರು. ಧೋನಿಗೂ ಮೊದಲು ಜಡೇಜಾ ಮೊದಲ ಎಸೆತವನ್ನು ಸಿಕ್ಸರ್​ಗಟ್ಟಿದ್ದರು.. ಒಟ್ಟಾರೆ 4 ಸಿಕ್ಸರ್​ ಸಹಿತ ಕೊನೆಯ ಓವರ್​ನಲ್ಲಿ 28 ರನ್​ ಸೂರೆಗೈದ ಧೋನಿ-ಜಡೇಜಾ ಜೋಡಿ ತಂಡದ ಮೊತ್ತ 170ರ ಗಡಿ ದಾಟುವಂತೆ ಮಾಡಿದರು.

ಸಿಕ್ಸರ್​ನಲ್ಲೂ ಧೋನಿ ಕಿಂಗ್​ :

​191 ಸಿಕ್ಸರ್​ ಸಿಡಿಸುವ ಮೂಲಕ ಐಪಿಎಲ್ ಇತಿಹಾಸದಲ್ಲಿ ಅತಿ ಹೆಚ್ಚು ಸಿಕ್ಸರ್​ ಸಿಡಿಸಿದ ಬ್ಯಾಟ್ಸ್​ಮನ್​ಗಳಲ್ಲಿ​ 3ನೇ ಸ್ಥಾನ ಹಾಗೂ ಅತಿ ಹೆಚ್ಚು ಸಿಕ್ಸರ್​ ಸಿಡಿಸಿದ ಭಾರತೀಯ ಬ್ಯಾಟ್ಸ್​ಮನ್ ಎಂಬ ಹೆಗ್ಗಳಿಕೆಗೆ ಪಾತ್ರರಾದರು.​