ಆದಿಲಾಬಾದ್: ಹೆಂಡ್ತಿ, ಮಕ್ಕಳು ಸೇರಿ ಆತನನ್ನು ಜೀವಂತವಾಗಿ ಸುಟ್ಟು ಹಾಕಿರುವ ಘಟನೆ ಎಲ್ಲರನ್ನೂ ಬೆಚ್ಚಿಬೀಳಿಸಿದೆ. ಆದ್ರೆ ಈಕೆ ತನ್ನ ಗಂಡನನ್ನು ಸುಡಲು ಬಲವಾದ ಕಾರಣವೂ ಇದೆ.
52 ವರ್ಷದ ನಾರಾಯಣ ಆದಿಲಾಬಾದ್ ಜಿಲ್ಲೆಯ ರಾಂಜಿಗೂಡ ಗ್ರಾಮದ ಸರ್ಕಾರಿ ಸ್ಕೂಲ್ ಮೇಷ್ಟ್ರು. ಏಪ್ರಿಲ್ 25ರ ಮಧ್ಯೆರಾತ್ರಿ ಪತ್ನಿ ಯಮುನಾಬಾಯಿ ಜೊತೆ ಜಗಳವಾಡಿದ್ದಾನೆ. ಬಳಿಕ ಹೆಂಡ್ತಿ, ಮಕ್ಕಳು ಮಲಗಿದ್ದ ವೇಳೆ ಮನೆಗೆ ಬೆಂಕಿ ಹಚ್ಚಿ ಪರಾರಿಯಾಗಿದ್ದ. ಆದ್ರೆ ಈ ಅವಘಡದಲ್ಲಿ ಯಮುನಾಬಾಯಿ ಮತ್ತು ಮಕ್ಕಳು ಪ್ರಾಣಾಪಾಯದಿಂದ ಪಾರಾಗಿದ್ದರು.
ಇನ್ನು ಯಮುನಾಬಾಯಿ ಮತ್ತು ಮಕ್ಕಳು ತಂದೆ ನಾರಾಯಣನ ಮೇಲೆ ಉದ್ರಿಕ್ತಗೊಂಡಿದ್ದರು. ಐದಾರು ದಿನದಿಂದ ನಾರಾಯಣ ಪತ್ತೆಗೆ ಜಾಲ ಬೀಸಿದ್ದರು. ಮೇಷ್ಟ್ರು ನಾರಾಯಣ ಗಾದಿಗೂಡದಲ್ಲಿರುವ ಸಂಬಂಧಿಕರ ಮನೆಯಲ್ಲಿರುವುದು ತಿಳಿದಿದೆ. ಕೂಡಲೇ ಯಮುನಾಬಾಯಿ, ಮಕ್ಕಳು ಮತ್ತು ಇನ್ನಿತರರು ಸೇರಿ ನಾರಾಯಣ ಇರುವ ಸ್ಥಳಕ್ಕೆ ತೆರಳಿ ಆತನನ್ನು ಅಪಹರಿಸಿದ್ದಾರೆ.
ನಾರಾಯಣನನ್ನು ಕಿಡ್ಯ್ನಾಪ್ ಮಾಡಿ ಆಟೋದಲ್ಲಿ ನಿರ್ಜನ ಪ್ರದೇಶಕ್ಕೆ ಕರೆದೊಯ್ದಿದ್ದಾರೆ. ನಾರಾಯಣನನ್ನು ಥಳಿಸಿ, ಆಟೋಗೆ ಆತನನ್ನು ಕಟ್ಟಿದ್ದಾರೆ. ಯಮುನಾಬಾಯಿ ಆಟೋಗೆ ಮತ್ತು ನಾರಾಯಣನ ಮೇಲೆ ಪೆಟ್ರೋಲ್ ಸುರಿದು ಬೆಂಕಿ ಹಚ್ಚಿ ಸುಟ್ಟು ಹಾಕಿದ್ದಾರೆ. ಬಳಿಕ ಯಮುನಾಬಾಯಿ ತನ್ನ ಮಕ್ಕಳೊಂದಿಗೆ ಜೈನೂರು ಪೊಲೀಸ್ ಠಾಣೆಗೆ ತೆರಳಿ ನನ್ನ ಗಂಡನನ್ನು ಕೊಲೆ ಮಾಡಿರುವುದಾಗಿ ಹೇಳಿ ಶರಣಾದರು.
ಪೊಲೀಸರು ಈ ಘಟನೆ ಕುರಿತು ಪ್ರಕರಣ ದಾಖಲಿಸಿಕೊಂಡು ಮುಂದಿನ ಕ್ರಮ ಕೈಗೊಂಡಿದ್ದಾರೆ.