ವಾರ್ನರ್​, ಬೈರ್ಸ್ಟೋವ್​ ಸ್ಫೋಟಕ ಅರ್ಧಶತಕ.. ಕೆಕೆಆರ್​ಗೆ ಸತತ 5ನೇ ಸೋಲು.. ಪ್ಲೇಆಫ್ ಹಾದಿ ಮತ್ತಷ್ಟು ಕಠಿಣ

ಪ್ಲೇ ಆಫ್​ಗೆ ನಿರ್ಣಾಯಕವಾಗಿದ್ದ ಪ್ರಮುಖ ಪಂದ್ಯದಲ್ಲಿ ಎಡವಿದ ಕೆಕೆಆರ್​, ಸನ್​ರೈಸರ್ಸ್​ ವಿರುದ್ಧ 9 ವಿಕೆಟ್​ಗಳಿಂದ ಸೋಲನುಭವಿಸಿದ್ದರಿಂದ ಅದರ ಪ್ಲೇ ಆಫ್​ ಹಾದಿ ಮತ್ತಷ್ಟು ಕಠಿಣವಾಗಿದೆ.

ಹೈದರಾಬಾದ್​: ವಾರ್ನರ್​ ಹಾಗೂ ಜಾನಿ ಬ್ಯಾರ್ಸ್ಟೋವ್​ ಅವರ ಸ್ಫೋಟಕ ಬ್ಯಾಟಿಂಗ್​ ನೆರವಿನಿಂದ ಹೈದರಾಬಾದ್​ ತಂಡ 9 ವಿಕೆಟ್​ಗಳ ಭರ್ಜರಿ ಜಯ ಸಾಧಿಸಿದೆ.

ಕೆಕೆಆರ್‌ ನೀಡಿದ 159 ರನ್​ಗಳ ಗುರಿಯನ್ನು ಬೆನ್ನೆತ್ತಿದ ಹೈದರಾಬಾದ್​ ಆರಂಭದಿಂದಲೇ ಅಬ್ಬರದ ಆಟಕ್ಕೆ ಮೊರೆ ಹೋಯಿತು. ಪವರ್​ ಪ್ಲೇನಲ್ಲಿ ಆರಂಭಿಕರಿಬ್ಬರ ಆಟದ ಮುಂದೆ ಕೆಕೆಆರ್​ ಬೌಲರ್​ಗಳ ಆಟ ನಡೆಯಲಿಲ್ಲ. ಆರಂಭಿಕ ಆಟಗಾರರಾದ ಡೇವಿಡ್​ ವಾರ್ನರ್​ 38 ಎಸೆತಗಳಲ್ಲಿ 67 ರನ್​ಗಳಿಸಿದರು. ಇದರಲ್ಲಿ 5 ಸಿಕ್ಸರ್​ 3 ಬೌಂಡರಿ ಒಳಗೊಂಡಿತ್ತು. ವಾರ್ನರ್​ ಇಂದೇ ತನ್ನ ಮೊದಲ ಪಂದ್ಯವಾಡಿದ ಯರ್ರ್ ಪೃಥ್ವಿರಾಜ್​ಗೆ ವಿಕೆಟ್​ ಒಪ್ಪಿಸಿದರು. ಆದರೆ, ಜಾನಿ ಬೈರ್ಸ್ಟೋವ್​ ಮಾತ್ರ ತನ್ನ ಅಬ್ಬರದ ಆಟವನ್ನು ಮುಂದುವರಿಸಿ 43 ಎಸೆತಗಳಲ್ಲಿ 7 ಬೌಂಡರಿ 4 ಸಿಕ್ಸರ್​ ಸಹಿತ 80 ರನ್​ಗಳಿಸಿ ತಂಡವನ್ನು ಗೆಲುವಿನ ದಡ ಸೇರಿಸಿದರು. ವಿಲಿಯಮ್ಸನ್​ ಔಟಾಗದೆ 9 ರನ್​ಗಳಿಸಿದರು.

ಕೆಕೆಆರ್​ ರನ್​ಗಳಿಸಲು ಪರದಾಡಿದ ಇದೇ ಪಿಚ್​ನಲ್ಲಿ ಲೀಲಾಜಾಲವಾಗಿ ರನ್​ಗಳಿಸಿದ ವಾರ್ನರ್​ ಹಾಗೂ ಬ್ಯಾರ್ಸ್ಟೋವ್​ ಮೊದಲ ವಿಕೆಟ್​ಗೆ 12.2 ಓವರ್​ಗಳಲ್ಲಿ 131 ರನ್​ಗಳ ಸೂರೆಗೈದರು. 15 ಓವರ್​ಗಳಲ್ಲಿ ಕೆಕೆಆರ್​ ನೀಡಿದ್ದ 159 ರನ್​ಗಳ ಗುರಿಯನ್ನು ತಲುಪಿ ಅಂಕಪಟ್ಟಿಯಲ್ಲಿ 4 ನೇ ಸ್ಥಾನಕ್ಕೆ ಲಗ್ಗೆ ಇಟ್ಟರು.

ಇದಕ್ಕು ಮುನ್ನ ಟಾಸ್​ ಸೋತು ಬ್ಯಾಟಿಂಗ್​ ನಡೆಸಿದ ಕೆಕೆಆರ್​ ಕ್ರಿಸ್​ ಲಿನ್(51)​ ಅವರ ಅರ್ಧಶತಕದ ನೆರವಿನಿಂದ 158 ರನ್​ಗಳಿಸಿತ್ತು. ಆದರೆ, ಇವರಿಗೆ ಉಳಿದ ಯಾವುದೇ ಬ್ಯಾಟ್ಸ್​ಮನ್​ಗಳ ಬೆಂಬಲ ಸಿಗದಿದ್ದರಿಂದ ಬೃಹತ್​ ಮೊತ್ತ ದಾಖಲಿಸುವಲ್ಲಿ ಕೆಕೆಆರ್​ ವಿಫಲವಾಯಿತು. ರಿಂಕು ಸಿಂಗ್​ 30 ರನ್​ಗಳಿಸಿ ತಂಡದ ಮೊತ್ತ 150 ದಾಟುವಂತೆ ಮಾಡಿದರು.

ಹೈದರಾಬಾದ್​​ ಪರ ಖಲೀಲ್​ ಅಹ್ಮದ್(3 ವಿಕೆಟ್​)​ ಸುನಿಲ್​ ನರೈನ್​, ಗಿಲ್​ ಹಾಗೂ ಕ್ರಿಸ್​ ಲಿನ್​ ವಿಕೆಟ್​ ಪಡೆದರೆ, ಭುನೇಶ್ವರ್​ ನಿತೀಸ್​ ರಾಣಾ ಹಾಗೂ ರಸೆಲ್​ ವಿಕೆಟ್​ ಪಡೆದುಕೊಂಡರು. ಇವರಿಗೆ ಬೆಂಬಲ ನೀಡಿದ ಸಂದೀಪ್​ ಶರ್ಮಾ ಹಾಗೂ ರಶೀದ್​ ಖಾನ್ ತಲಾ ಒಂದು ವಿಕೆಟ್​ ಪಡೆದು ಮಿಂಚಿದರು.

ಈ ಗೆಲುವಿನೊಂದಿಗೆ ಹೈದರಾಬಾದ್​ 10 ಅಂಕಗಳೊಂದಿಗೆ 4 ನೇ ಸ್ಥಾನಕ್ಕೇರಿತು. ಕೋಲ್ಕತಾ ನೈಟ್​ರೈಡರ್ಸ್​ 6ನೇ ಸ್ಥಾನಕ್ಕೆ ಕುಸಿಯಿತು. ಒಟ್ಟಾರೆ ಹೈದರಾಬಾದ್​ 9 ಪಂದ್ಯಗಳಲ್ಲಿ 4 ಸೋಲು 5 ಗೆಲುವು ಪಡೆದರೆ, ಕೆಕೆಆರ್​10 ಪಂದ್ಯಗಳಲ್ಲಿ 6 ಸೋಲು 4 ಗೆಲುವಿನೊಂದಿಗೆ ಪ್ಲೇ ಆಫ್​ ಹಾದಿಯನ್ನ ದುರ್ಘಮಗೊಳಿಸಿಕೊಂಡಿತು.