ಕೊಪ್ಪಳ‌ದಲ್ಲೊಬ್ಬರು 'ಪ್ಯಾಡ್ ವುಮನ್'... ಈ ಮಹಿಳೆಗೆ ಪ್ರೇರಣೆಯಾಯ್ತು ಬಾಲಿವುಡ್​ ಸಿನಿಮಾ

ಋತುಚಕ್ರದ ಸಂದರ್ಭದಲ್ಲಿ ಮಹಿಳೆಯರಿಗೆ ಜಾಗೃತಿ ಮೂಡಿಸುವ ನಿಟ್ಟಿನಲ್ಲಿ ಕಳೆದ ವರ್ಷ ಅಕ್ಷಯ್‌ಕುಮಾರ್ ಅಭಿನಯದ ಪ್ಯಾಡ್​ಮನ್ ಎಂಬ ಸಿನಿಮಾ ತೆರೆ ಕಂಡಿತ್ತು. ಆ ಸಿನಿಮಾ ನೋಡಿದವರು ಬೆರಗಾಗಿದ್ದರು. ಅದೆಷ್ಟೋ ಜನರಿಗೆ ಈ ಸಿನಿಮಾ ಪ್ರರೇಣೆಯಾಗಿತ್ತು. ಕೊಪ್ಪಳದ ಈ ಮಹಿಳೆ ಸಹ ಅದೇ ಚಿತ್ರದಿಂದ ಪ್ರೇರಣೆಗೊಂಡು ಹೊಸ ಪ್ರಯತ್ನಕ್ಕಿಳಿದು ಯಶಸ್ಸು ಕಂಡಿದ್ದಾರೆ.

ಕೊಪ್ಪಳ:ಬಾಲಿವುಡ್​ ಆ್ಯಕ್ಷನ್ ಕಿಂಗ್ಅಕ್ಷಯ್‌ಕುಮಾರ್ ​​ಅಭಿನಯದ 'ಪ್ಯಾಡ್‌ಮನ್' ಸಿನಿಮಾದಿಂದ ಪ್ರೇರಣೆಗೊಂಡ ಮಹಿಳೆವೋರ್ವಳು ನೈಸರ್ಗಿಕ ಸ್ನೇಹಿ ಸ್ಯಾನಿಟರಿ ಪ್ಯಾಡ್ ತಯಾರಿಸಿ ಋತುಚಕ್ರದ ಸಂದರ್ಭದಲ್ಲಿ ಅನುಸರಿಸಬೇಕಾದ ಕ್ರಮಗಳ ಬಗ್ಗೆ ಜಾಗೃತಿ ಮೂಡಿಸುತ್ತಿದ್ದಾರೆ. ಹಾಗಾದ್ರೆ ಆ ಪ್ಯಾಡ್ ವುಮನ್ ಕುರಿತು ಕಂಪ್ಲೀಟ್​ ಈ ಸ್ಟೋರಿ ಇಲ್ಲಿದೆ ನೋಡಿ...

ಹೌದು, ಕೊಪ್ಪಳ‌ದ ಗವಿಶ್ರೀ ನಗರದ ನಿವಾಸಿಯಾಗಿರುವ ಭಾರತಿ ಗುಡ್ಲಾನೂರು ಎಂಬುವರೇ ಈ ಪ್ಯಾಡ್ ವುಮನ್. ಕಳೆದ ವರ್ಷ ತೆರೆಕಂಡಿದ್ದ ಅಕ್ಷಯ್ ಕುಮಾರ್ ಅಭಿನಯದ ಪ್ಯಾಡ್​ಮನ್ ಸಿನಿಮಾದಿಂದ‌ ಭಾರತಿ ಗುಡ್ಲಾನೂರು ಪ್ರೇರಣೆಗೊಂಡು, ಕಡಿಮೆ ಬೆಲೆಯಲ್ಲಿ ಮಹಿಳೆಯರಿಗೆ ಸ್ಯಾನಿಟರಿ ಪ್ಯಾಡ್ ತಯಾರಿಸಿ ನೀಡುತ್ತಿದ್ದಾರೆ. ಈ ಮೂಲಕ ಋತುಚಕ್ರದ ಬಗೆಗೆ ಅರಿವು ಮೂಡಿಸುತ್ತಿದ್ದಾರೆ. ಋತುಚಕ್ರದ ಸಂದರ್ಭದಲ್ಲಿ ಕಡ್ಡಾಯವಾಗಿ ಸ್ಯಾನಿಟರಿ ಪ್ಯಾಡ್​ಗಳನ್ನು ಮಹಿಳೆಯರು ಬಳಸಬೇಕು ಎಂಬ ನಿಟ್ಟಿನಲ್ಲಿ ಗ್ರಾಮೀಣ ಪ್ರದೇಶದಲ್ಲಿ ಜಾಗೃತಿ‌‌ಯನ್ನು ಮೂಡಿಸುತ್ತಿದ್ದಾರೆ.

ಭಾರತಿ ಕಳೆದೊಂದು ವರ್ಷದಿಂದ ನೈಸರ್ಗಿಕವಾದ ಸ್ಯಾನಿಟರಿ ಪ್ಯಾಡ್​ಗಳನ್ನು ತಯಾರಿಸುತ್ತಿದ್ದಾರೆ. ಮಾರುಕಟ್ಟೆಯಲ್ಲಿ ಬಗೆ ಬಗೆಯ ಬ್ರಾಂಡ್​ನ ಸ್ಯಾನಿಟರಿ ಪ್ಯಾಡ್​ಗಳು ಲಭ್ಯವಿವೆ. ಅವುಗಳಲ್ಲಿ ಪ್ಲಾಸ್ಟಿಕ್ ಇರುವುದರಿಂದ ಮಹಿಳೆಯರ ಆರೋಗ್ಯದ ಮೇಲೆ ವ್ಯತಿರಿಕ್ತ ಪರಿಣಾಮ ಬೀರುವ ಸಾಧ್ಯತೆ ಇರುತ್ತದೆ. ಹೀಗಾಗಿ, ಯಾವುದೇ ಅಡ್ಡ ಪರಿಣಾಮವಿಲ್ಲದ, ವಾಸನೆ ತಡೆಗಟ್ಟುವ ಈ ಪ್ಯಾಡ್​ಗಳನ್ನು ಕಡಿಮೆ ಪ್ರಮಾಣದಲ್ಲಿ ತಯಾರಿಸುತ್ತಿದ್ದು, ಕಡಿಮೆ ಬೆಲೆಗೆ ನೇರವಾಗಿ ತಲುಪಿಸುತ್ತಿದ್ದೇವೆ. ಇದಕ್ಕೆಲ್ಲಾ ಪ್ಯಾಡ್​ಮನ್ ಚಿತ್ರವೇ ಪ್ರೇರಣೆ ಎನ್ನುತ್ತಾರೆ ಭಾರತಿ ಗುಡ್ಲಾನೂರು.

ಗ್ರಾಮೀಣ ಪ್ರದೇಶದಲ್ಲಿನ ಬಹಳಷ್ಟು ಮಹಿಳೆಯರು ಋತುಚಕ್ರದ ಸಂದರ್ಭದಲ್ಲಿ ಸ್ಯಾನಿಟರಿ ಪ್ಯಾಡ್​ಗಳನ್ನು ಬಳಕೆ ಮಾಡುತ್ತಿಲ್ಲ. ಹೀಗಾಗಿ, ಗ್ರಾಮೀಣ ಪ್ರದೇಶದ ಮಹಿಳೆಯರಿಗೆ ಭಾರತಿ ಗುಡ್ಲಾನೂರು ವಿಶೇಷವಾಗಿ ಜಾಗೃತಿ ಮೂಡಿಸುತ್ತಿದ್ದಾರೆ. ವಿವಿಧ ಕಾನ್ಸೆಪ್ಟ್​ಗಳೊಂದಿಗೆ ಸ್ಯಾನಿಟರಿ ಪ್ಯಾಡ್ ಬಳಕೆ ಕುರಿತು ಜಾಗೃತಿ ಮೂಡಿಸುತ್ತಿದ್ದಾರೆ‌.

ಗ್ರಾಮೀಣ ಪ್ರದೇಶದ ಮಹಿಳೆಯರು ಪ್ರತಿ ತಿಂಗಳು ಸ್ಯಾನಿಟರಿ ಪ್ಯಾಡ್ ಪಡೆದುಕೊಳ್ಳುವ ಬಗ್ಗೆ ಬ್ಯಾಂಕ್‌ ಪಾಸ್​ಬುಕ್ ರೀತಿಯಲ್ಲಿ ವಿವರಗಳನೊಳಗೊಂಡ ಖಾತೆ ಪುಸ್ತಕ ಮಾಡಿದ್ದಾರೆ. ಇದು ಈ ಬಾರಿಯ ವಿಶೇಷ ಪರಿಕಲ್ಪನೆ. ಅಲ್ಲದೆ ಭಾರತಿ, ಸುಮಾರು 8 ಜನ ಮಹಿಳೆಯರಿಗೆ ಉದ್ಯೋಗವಕಾಶ ಕೂಡ ಕಲ್ಪಿಸಿದ್ದಾರೆ.

ಒಟ್ಟಾರೆಯಾಗಿ ಸಿನಿಮಾಗಳು ಸಾಮಾಜಿಕ ಪರಿವರ್ತನೆಯ ಸಂದೇಶ ಸಾರುತ್ತವೆ ಅನ್ನೋದನ್ನು ಭಾರತಿ ಅವರ ಕೆಲಸವೇ ಸಾಕ್ಷಿಯಂತಿದೆ. ಮಹಿಳೆಯರ ಜಾಗೃತಿಗೆ ಕಾರಣವಾದ ಪ್ಯಾಡ್​ಮನ್​ ಸಿನಿಮಾ ಇಲ್ಲೋರ್ವ ಪ್ಯಾಡ್ ವುಮನ್ ಬೆಳೆಯಲು ಕಾರಣವಾಗಿದೆ ಎಂದರೆ ಅತಿಶಯೋಕ್ತಿಯಲ್ಲ.