ನವದೆಹಲಿ: ವಿಶ್ವಕಪ್ ಹತ್ತಿರವಾಗುತ್ತಿದ್ದಂತೆ ರಾಷ್ಟ್ರೀಯ ತಂಡದಿಂದ ಕರೆ ಬಂದಿರುವ ಹಿನ್ನಲೆ ಇಂಗ್ಲೆಂಡ್, ದಕ್ಷಿಣ ಆಫ್ರಿಕಾ ಹಾಗೂ ಆಸ್ಟ್ರೇಲಿಯಾ ತಂಡದ ಆಟಗಾರರು ಸ್ವದೇಶಕ್ಕೆ ತೆರಳುತ್ತಿರುವುದು ಐಪಿಎಲ್ ತಂಡಗಳಿಗೆ ತುಂಬಲಾರದ ನಷ್ಟವಾಗುತ್ತಿದ್ದರೆ, ಡೆಲ್ಲಿ ಕ್ಯಾಪಿಟಲ್ ಮಾತ್ರ ಒಳಗೊಳಗೆ ಹಿಗ್ಗುತ್ತಿದೆ.
ಹೌದು, ಬೇರೆ ತಂಡಗಳ ವಿದೇಶಿ ಆಟಗಾರರು ಅವರ ತವರಿಗೆ ವಾಪಸ್ ಹೋಗಲೇಬೇಕಾದ ಪರಿಸ್ಥಿತಿ ಎದುರಾಗಿದೆ. ವಿಶ್ವಕಪ್ಗೂ ಮುನ್ನ ನಡೆಯುವ ತರಬೇತಿ ಹಾಗೂ ಕೆಲವು ತಂಡಗಳು ದ್ವಿಪಕ್ಷೀಯ ಸರಣಿಯಲ್ಲಿ ಪಾಲ್ಗೊಳ್ಳಬೇಕಿರುವುದರಿಂದ ಐಪಿಎಲ್ನಲ್ಲಿನ ಆಟ ಮೊಟಕುಗೊಳಿಸಲೇಬೇಕಾಗಿದೆ. ಐಪಿಎಲ್ನಲ್ಲಿ ಇದರ ಪರಿಣಾಮ ಹೆಚ್ಚು ಬೀರುತ್ತಿರುವುದು ಸನ್ರೈಸರ್ಸ್ ಹೈದರಾಬಾದ್, ರಾಜಸ್ಥಾನ ರಾಯಲ್ಸ್, ಆರ್ಸಿಬಿಗೆ ಮಾತ್ರ. ಇನ್ನು ಮುಂಬೈ, ಚೆನ್ನೈ, ಪಂಜಾಬ್ ಹಾಗೂ ಕೆಕೆಆರ್ ತಂಡಗಳಲ್ಲಿ ಕೆಲವೇ ಕೆಲವು ಆಟಗಾರರು ಹೋದರೂ ಇನ್ನುಳಿದ ಸ್ಟಾರ್ ಆಟಗಾರರ ದಂಡೇ ಇರುವುದರಿಂದ ಈ ತಂಡಗಳ ಮೇಲೆ ಹೆಚ್ಚಿನ ಪರಿಣಾಮ ಬೀರುತ್ತಿಲ್ಲ.
ಆದರೆ, ಈ ಸಮಸ್ಯೆಯಿಂದ ಡೆಲ್ಲಿ ತಂಡ ಮುಕ್ತವಾಗಿದೆ. ಏಕೆಂದರೆ ಡೆಲ್ಲಿ ತಂಡದಲ್ಲಿರುವ ರಬಾಡಾರನ್ನು ಬಿಟ್ಟರೆ, ಉಳಿದ ಯಾವ ಆಟಗಾರರು ತಂಡ ಬಿಟ್ಟು ಹೋಗುತ್ತಿಲ್ಲ. ರಬಾಡಾ ಕೂಡ ಹೋಗುವುದು ಇನ್ನೂ ಖಚಿತವಾಗಿಲ್ಲ. ಇದರಿಂದ ಚೊಚ್ಚಲ ಐಪಿಎಲ್ ಕನಸು ಕಾಣುತ್ತಿರುವ ಡೆಲ್ಲಿ ಯುವಪಡೆಗೆ ಬೇರೆ ತಂಡಗಳ ಆಟಗಾರರು ಐಪಿಎಲ್ನಿಂದ ದೂರವಾಗುತ್ತಿರುವುದು ಒಂದು ರೀತಿಯ ಅದೃಷ್ಟ ಸಿಕ್ಕಂತಾಗಿದೆ.
ತವರಿಗೆ ಮರಳಲಿರುವ ವಿದೇಶಿ ಆಟಗಾರರು ರಾಜಸ್ಥಾನ ರಾಯಲ್ಸ್ನಲ್ಲಿ ಈಗಾಗಲೇ ಜಾಸ್ ಬಟ್ಲರ್, ಬೆನ್ಸ್ಟೋಕ್ಸ್, ಜೋಫ್ರಾ ಆರ್ಚರ್ ತಂಡದಿಂದ ಹೊರ ನಡೆದಿದ್ದಾರೆ. ಇನ್ನು ಮೇ ಮೊದಲ ವಾರದಲ್ಲಿ ಸ್ಟಿವ್ ಸ್ಮಿತ್, ಕೂಡ ತಂಡ ಬಿಡುವ ಸಾಧ್ಯತೆಯಿದೆ.
ಚೆನ್ನೈ ಸೂಪರ್ ಕಿಂಗ್ಸ್ನಲ್ಲಿ ಸ್ಯಾಮ್ ಬಿಲ್ಲಿಂಗ್ಸ್, ಡೇವಿಡ್ ವಿಲ್ಲೆ, ಆರ್ಸಿಬಿಯಲ್ಲಿ ಮೊಯಿನ್ ಅಲಿ ಹಾಗೂ ಮಾರ್ಕಸ್ ಸ್ಟೋಯ್ನಿಸ್, ಮುಂಬೈನಲ್ಲಿ ಬಹ್ರೆನ್ಡ್ರಾಫ್,ಡಿಕಾಕ್, ಲಸಿತ್ ಮಲಿಂಗಾ, ಪಂಜಾಬ್ ತಂಡದಲ್ಲಿ ಮುಜೀಬ್ ಉರ್ ರೆಹಮಾನ್, ಕೋಲ್ಕತ್ತಾ ನೈಟ್ ರೈಡರ್ಸ್ನಲ್ಲಿ ಜೋ ಡೆನ್ಲಿ, ಸನ್ರೈಶರ್ಸ್ ಪರ ಜಾನಿ ಬೈರ್ಸ್ಟೋವ್, ಶಕಿಬ್ ಅಲ ಹಸನ್, ರಶೀದ್ ಖಾನ್, ಮೊಹಮ್ಮದ್ ನಬಿ ಪೂರ್ತಿ ಐಪಿಎಲ್ನಿಂದ ಹೊರ ಹೋಗಲಿದ್ದಾರೆ.
ನ್ಯೂಜಿಲ್ಯಾಂಡ್, ವೆಸ್ಟ್ ವಿಂಡೀಸ್, ದಕ್ಷಿಣ ಆಫ್ರಿಕಾ ಕ್ರಿಕೆಟ್ ಮಂಡಳಿ ಸಂಪೂರ್ಣ ಐಪಿಎಲ್ ಆಡಲು ಅನುಮತಿ ನೀಡಿವೆ. ಅಫ್ಘಾನಿಸ್ತಾನ ಪೂರ್ಣ ಐಪಿಎಲ್ ಆಡುವುದರ ಬಗ್ಗೆ ಇನ್ನೂ ಯಾವುದೇ ಸ್ಪಷ್ಟನೆ ನೀಡಿಲ್ಲ. ಒಂದು ವೇಳೆ ರಾಷ್ಟ್ರೀಯ ತಂಡದಿಂದ ಕರೆ ಬಂದರೆ ಮೂವರು ಅಫ್ಘನ್ ಆಟಗಾರರಾದ ರಶೀದ್, ನಬಿ ಹಾಗೂ ಮುಜೀಬ್ ಸ್ವದೇಶಕ್ಕೆ ತೆರಳಲಿದ್ದಾರೆ.
ವಿದೇಶಿ ಆಟಗಾರರನ್ನೇ ನಂಬಿಕೊಂಡಿದ್ದ ಸನ್ರೈಸರ್ಸ್ ಹೈದರಾಬಾದ್ ತಂಡ ಹಾಗೂ ರಾಜಸ್ಥಾನ ತಂಡಗಳು ತೀವ್ರ ಹಿನ್ನಡೆ ಅನುಭವಿಸಲಿವೆ. ಉಳಿದ ತಂಡಗಳಿಗೆ ಬದಲಿ ಆಟಗಾರರ ಲಭ್ಯತೆ ಇರುವುದರಿಂದ ಹೆಚ್ಚು ಹೊಡೆತ ಬೀಳುವುದಿಲ್ಲ. ಆದರೆ ಡೆಲ್ಲಿ ಕ್ಯಾಪಿಟಲ್ ಮಾತ್ರ ಯಾವ ಆಟಗಾರನೂ ಹೋಗದಿರುವುದರಿಂದ ತಂಡಕ್ಕೆ ಹೆಚ್ಚಿನ ಬಲ ಬರಲಿದೆ. ಈ ಮೂಲಕ ಚೊಚ್ಚಲ ಐಪಿಎಲ್ ಕಪ್ ಗೆಲ್ಲಲು ಅದ್ಭುತ ಅವಕಾಶ ದೊರೆತಿದೆ.
