1988ರಲ್ಲೇ ಡಿಜಿಟಲ್​ ಕ್ಯಾಮೆರಾ,ಇಮೇಲ್​ ಬಳಕೆ: ಮೋದಿ ಟೆಕ್ನಾಲಜಿ ಥಿಯೆರಿ ಸಿಕ್ಕಾಪಟ್ಟೆ ಟ್ರೋಲ್​

ಕಳೆದ ಕೆಲ ದಿನಗಳ ಹಿಂದೆ ಖಾಸಗಿ ಚಾನಲ್​ವೊಂದಕ್ಕೆ ಸಂದರ್ಶನ ನೀಡಿದ್ದ ಮೋದಿ 1988ರಲ್ಲೇ ಡಿಜಿಟಲ್​ ಕ್ಯಾಮೆರಾ ಹಾಗೂ ಇಮೇಲ್​ ಬಳಕೆ ಮಾಡಿದ್ದಾಗಿ ಹೇಳಿಕೆ ನೀಡಿದ್ದರು. ಇದೀಗ ಅದೇ ವಿಷಯ ಸಿಕ್ಕಾಪಟ್ಟೆ ಟ್ರೋಲ್​ ಆಗ್ತಿದೆ.

ನವದೆಹಲಿ:ಕಳೆದ ಕೆಲ ದಿನಗಳ ಹಿಂದೆ ಪ್ರಧಾನಿ ನರೇಂದ್ರ ಮೋದಿ ಖಾಸಗಿ ಚಾನಲ್​ವೊಂದಕ್ಕೆ ನೀಡಿದ್ದ ಸಂದರ್ಶನದ ಕೆಲ ವಿಷಯಗಳು ಇದೀಗ ಸಿಕ್ಕಾಪಟ್ಟೆ ಟ್ರೋಲ್​ ಆಗುತ್ತಿದೆ.

ಸಂದರ್ಶನದ ವೇಳೆ ಮೋದಿ ನಾನು 1988ರಲ್ಲೇ ಡಿಜಿಟಲ್​ ಕ್ಯಾಮೆರಾ ಬಳಕೆ ಮಾಡಿ ಎಲ್​ಕೆ ಅಡ್ವಾಣಿ ಅವರ ಕಲರ್​ ಫೋಟೋ ಕ್ಲಿಕ್​ ಮಾಡಿದ್ದೆ ಹಾಗೂ ಇಮೇಲ್​ ಬಳಕೆ ಮಾಡಿರುವೆ ಎಂದು ಹೇಳಿಕೊಂಡಿದ್ದರು. ಇದೀಗ ಅದೇ ವಿಷಯವನ್ನಿಟ್ಟುಕೊಂಡು ಸಾಮಾಜಿಕ ಜಾಲತಾಣದಲ್ಲಿ ಅವರನ್ನು ಟ್ರೋಲ್​ ಮಾಡಲಾಗುತ್ತಿದೆ.

ನೆಟ್ಟಿಗರು ಇದೇ ವಿಷಯವನ್ನಿಟ್ಟುಕೊಂಡು 1988ರಲ್ಲಿ ಡಿಜಿಟಲ್​ ಕ್ಯಾಮೆರಾ ಮತ್ತು ಇಮೇಲ್​ ಎಲ್ಲಿತ್ತು? ಭಾರತಕ್ಕೆ ಮೇಲ್​ ಪರಿಚಯವಾಗಿದ್ದೇ 1995ರಲ್ಲಿ. ಇನ್ನು ಡಿಜಿಟಲ್​​ ಕ್ಯಾಮೆರಾ 1990ರಲ್ಲಿ ಪರಿಚಯಗೊಂಡಿದ್ದು, ನೀವು ನಿಜಕ್ಕೂ ಸಾಮಾನ್ಯ ವ್ಯಕ್ತಿ ಅಲ್ಲ ಎಂದು ಅನೇಕರು ಬರೆದುಕೊಂಡಿದ್ದಾರೆ. 1988ರಲ್ಲಿ ಮೋದಿ ಬಳಿ ಪರ್ಸ್​ ಇರಲಿಲ್ಲ ಯಾಕಂದ್ರೆ ಅವರ ಬಳಿ ಹಣ ಇರಲಿಲ್ಲ ಆದ್ರೆ, ಡಿಜಿಟಲ್ ಕ್ಯಾಮೆರಾ ಇತ್ತು ಎಂದು ಕೆಲವರು ಕಾಲೆಳೆದಿದ್ದಾರೆ.

ಇನ್ನು ಇದೇ ವಿಷಯವನ್ನ ವಿಪಕ್ಷಗಳು ತಮಾಷೆಯಾಗಿ ತೆಗೆದುಕೊಂಡಿದ್ದು, ಅವರು ಯಾವುದೋ ಗಂಭೀರ ಕಾಯಿಲೆಯಿಂದ ಬಳಲುತ್ತಿದ್ದು, ಸರಿಯಾದ ಚಿಕಿತ್ಸೆಯ ಅಗತ್ಯವಿದೆ ಎಂದಿದ್ದಾರೆ.

ರೆಡಾರ್​ ಹೇಳಿಕೆಗೂ ಟ್ರೋಲ್​:

ಬಾಲಕೋಟ್​ ದಾಳಿ ವೇಳೆ ಮೋಡ ಮುಸುಕಿದ ವಾತಾವರಣ ಇದ್ದ ಕಾರಣ ಅದೇ ದಿನ ಸರಿ ಎಂದು ಹೇಳಿದ್ದೆ. ಕಾರಣ ಪಾಕ್​ ರೆಡಾರ್​ಗಳು ನಮ್ಮ ವಿಮಾನಗಳನ್ನು ಪತ್ತೆ ಮಾಡುವುದಿಲ್ಲ ಎಂದು ಮೋದಿ ಇದೇ ಸಂದರ್ಶನದಲ್ಲಿ ಹೇಳಿದ್ದರು. ಆ ಹೇಳಿಕೆಯನ್ನೂ ರಾಜಕೀಯ ನಾಯಕರು ಲೇವಡಿ ಮಾಡಿದ್ದಾರೆ.