ಧವನ್​,ಪಂತ್​ ಅಬ್ಬರದ ಆಟ... ಕೆಕೆಆರ್​ ವಿರುದ್ಧ ಗೆಲುವಿನ ಕೇಕೆ ಹಾಕಿದ ಡೆಲ್ಲಿ

ಧವನ್​ ಆಕರ್ಷಕ 97 ರನ್​ಗಳ ನೆರವಿನಿಂದ​ ಡೆಲ್ಲಿ ಕ್ಯಾಪಿಟಲ್​ ಬಲಿಷ್ಠ ಕೆಕೆಆರ್​ ತಂಡವನ್ನು 7 ವಿಕೆಟ್​​ಗಳಿಂದ ಮಣಿಸಿ ಅಂಕಪಟ್ಟಿಯಲ್ಲಿ 4ನೇ ಸ್ಥಾನಕ್ಕೇರಿದ್ದಾರೆ

ಕೋಲ್ಕತ್ತಾ: ಬ್ಯಾಟಿಂಗ್​ ಹಾಗೂ ಬೌಲಿಂಗ್​ನಲ್ಲಿ ಅದ್ಭುತ ಪ್ರದರ್ಶನ ನೀಡಿದ ಡೆಲ್ಲಿ ಕ್ಯಾಪಿಟಲ್​ ಬಲಿಷ್ಠ ಕೆಕೆಆರ್​ ತಂಡವನ್ನು 7 ವಿಕೆಟ್​​ಗಳಿಂದ ಮಣಿಸಿ ಅಂಕಪಟ್ಟಿಯಲ್ಲಿ 4ನೇ ಸ್ಥಾನಕ್ಕೇರಿದ್ದಾರೆ.

ಟಾಸ್​ ಗೆದ್ದ ಡೆಲ್ಲಿ ಕೆಕೆಆರ್​ಗೆ ಬ್ಯಾಟಿಂಗ್​ ಅಹ್ವಾನಿಸಿತು. ಮೊದಲ ಓವರ್​ನ ಮೊದಲ ಎಸೆತದಲ್ಲೇ ಇಶಾಂತ್​ ಶರ್ಮಾ ಜೋ ಡೆನ್ಲಿ ವಿಕೆಟ್​ ಪಡೆದು ಕೆಕೆಆರ್​ಗೆ ಆಘಾತ ನೀಡಿದರು. ನಂತರ ಗಿಲ್​ ಜೊತೆ 2 ನೇ ವಿಕೆಟ್​ಗೆ 63 ರನ್​ಗಳ ಜೊತೆಯಾಟ ನಡೆಸಿದ ಉತ್ತಪ್ಪ ತಾಳ್ಮೆ ಆಟಕ್ಕೆ ಮೊರೆ ಹೋದರಾದರೂ ದೊಡ್ಡ ಇನಿಂಗ್ಸ್​ ಕಟ್ಟುವಲ್ಲಿ ವಿಫಲರಾಗಿ ಕೇವಲ 28 ರನ್​ಗಳಿಗೆ ರಬಡಾಗೆ ವಿಕೆಟ್​ ಒಪ್ಪಿಸಿದರು.

ನಂತರ ಬಂದ ನಿತೀಸ್​ ರಾಣಾ 11 ಔಟಾದರು, ಶುಬ್ಮನ್​ ಗಿಲ್​ 65 ರನ್​ಗಳಿಸಿ ಕೀಮೋ ಪಾಲ್​ಗೆ ವಿಕೆಟ್​ ಒಪ್ಪಿಸಿದರೆ, ನಾಯಕ ಕಾರ್ತಿಕ್​ 2 ರನ್​ಗೆ ರಬಡಾ ಬೌಲಿಂಗ್​ನಲ್ಲಿ ಧವನ್​ಗೆ ಕ್ಯಾಚ್​ ನೀಡಿ ನಿರಾಸೆ ಮೂಡಿಸಿದರು. ರಸೆಲ್​ ಕೇವಲ 21 ಎಸೆತಗಳಲ್ಲಿ 3 ಬೌಂಡರಿ ಹಾಗೂ 4 ಸಿಕ್ಸರ್​ ಸಹಿತ 45 ರನ್​ಗಳಿಸಿ ತಂಡದ ಮೊತ್ತೆ ಹೆಚ್ಚಿದರು. ಇನ್ನು ಬ್ರಾತ್​ವೈಟ್​ 6,ಚಾವ್ಲಾ 14, ಕುಲ್ದೀಪ್​ 2 ರನ್​ಗಳಿಸಿದರು. ಒಟ್ಟಾರೆ 20 ಓವರ್​ಗಳಲ್ಲಿ ಕೆಕೆಆರ್​ 178 ರನ್​ಗಳಿಸಿತು.

ರಬಡಾ 2,ಇಶಾಂತ್​ ಶರ್ಮಾ 1, ಕ್ರಿಸ್​ ಮೋರಿಸ್​ 2, ಕೀಮೋ ಪಾಲ್​ 2 ವಿಕೆಟ್​ ಪಡೆದರು.

179 ರನ್​ಗಳ ಗುರಿ ಬೆನ್ನೆತ್ತಿದ ಡೆಲ್ಲಿ ಕೇವಲ 3 ವಿಕೆಟ್​ ಕಳೆದುಕೊಂಡು ಗುರಿ ತಲುಪಿತು. ಆರಂಭಿಕರಾದ ಪೃಥ್ವಿ ಶಾ 14 ಕ್ಕೆ ಹಾಗೂ ನಾಯಕ ಅಯ್ಯರ್ 6 ರನ್​ಗೆ​ ವಿಕೆಟ್​ ಒಪ್ಪಿಸಿದರು. ಆದರೆ ​ಧವನ್ 63 ಎಸೆತಗಳಲ್ಲಿ 11 ಬೌಂಡರಿ 2 ಸಿಕ್ಸರ್​ ಸಹಿತ ಔಟಾಗದೆ​ 97, ಪಂತ್31 ಎಸೆತಗಳಲ್ಲಿ 46 ಹಾಗೂ ಇಂಗ್ರಾಮ್​ ಔಟಾಗದೆ 14 ರನ್​ಗಳಿಸಿ ತಂಡವನ್ನು ಗೆಲುವಿನ ದಡ ಸೇರಿಸಿದರು.

ಕೆಕೆಆರ್​ ಪರ ಪ್ರಸಿದ್ಧ್ ಕೃಷ್ಣ ,ರಸೆಲ್​ ಹಾಗೂ ನಿತೀಸ್​ ರಾಣ ತಲಾ ಒಂದೊಂದು ವಿಕೆಟ್ ಪಡೆದರು.

ಈ ಗೆಲುವಿನೊಂದಿಗೆ 8 ಅಂಕ ಸಂಪಾದಿಸಿದ ಡೆಲ್ಲಿ ನಾಲ್ಕನೇ ಸ್ಥಾನಕ್ಕೆ ಲಗ್ಗೆ ಇಟ್ಟಿತು.