ಮುಂಬೈ: ಈಗಾಗಲೆ ನಡೆಯುತ್ತಿರುವ ಐಪಿಎಲ್ನ ಲೀಗ್ ಪಂದ್ಯಗಳು ಸಾಯಂಕಾಲ 4 ಹಾಗೂ ಸಂಜೆ 8 ಗಂಟೆಗೆ ನಡೆಯುತ್ತಿದ್ದು, ಪ್ಲೇ-ಆಫ್ ಪಂದ್ಯಗಳ ಸಮಯವನ್ನು ಬದಲಾವಣೆ ಮಾಡುವ ಸಾಧ್ಯತೆ ಕೇಳಿಬರುತ್ತಿದೆ.
ಲೀಗ್ನ ಎಲ್ಲಾ ಪಂದ್ಯಗಳು ರಾತ್ರಿ 8 ಗಂಟೆಗೆ ಆರಂಭವಾಗುತ್ತಿದ್ದವು. ಇದರಿಂದ ಪಂದ್ಯಗಳು ಮುಗಿಯುವ ವೇಳೆಗೆ ಮಧ್ಯರಾತ್ರಿಯಾಗುತ್ತಿತ್ತು. ಇದು ವೀಕ್ಷಕರ ಜತೆಗೆ ಆಟಗಾರರಿಗೆ ಹೆಚ್ಚಿನ ಒತ್ತಡವನ್ನುಂಟು ಮಾಡುತ್ತಿರುವುದರಿಂದ ನಿನ್ನೆ ನಡೆದ ಆಡಳಿತ ಸಮಿತಿ ಸಭೆಯಲ್ಲಿ ಸಮಯ ಬದಲಾವಣೆ ಬಗ್ಗೆ ಚಿಂತಿಸಿಲಾಗಿದೆ.
ಈ ಬಗ್ಗೆ ಪ್ರತಿಕ್ರಿಯಿಸಿರುವ ಬಿಸಿಸಿಐ ಹಿರಿಯ ಅಧಿಕಾರಿಯೊಬ್ಬರು ಸಮಯ ಬದಲಾವಣೆ ಬಗ್ಗೆ ಪ್ರಾಯೋಜಕರೊಂದಿಗೆ ಮಾತುಕತೆ ನಡೆಸಿದ್ದೇವೆ ಎಂದು ಆಡಳಿತಗಾರರ ಸಮಿತಿ ಸಭೆಯ ಬಳಿಕ ತಿಳಿಸಿದ್ದಾರೆ. ಕಳೆದ ಆವೃತ್ತಿಯ ಪಂದ್ಯಗಳೂ ಸಂಜೆ 7 ಗಂಟೆಗೆ ಆರಂಭವಾಗಿದ್ದವು. ಆದರೆ ಈ ಕುರಿತು ಮತ್ತೊಂದು ಸಭೆ ಮೇ 3 ರಂದು ನಡೆಯಲಿದ್ದು, ಅಂದು ಪಂದ್ಯದ ಸಮಯ ಬದಲಾವಣೆ ಬಗ್ಗೆ ತೀರ್ಮಾನ ಮಾಡಬಹುದು ಎಂಬ ಮಾಹಿತಿ ತಿಳಿದುಬಂದಿದೆ.
ಮೊದಲ ಕ್ವಾಲಿಫೈಯರ್ ಮೇ 7ರಂದು ಚೆನ್ನೈನಲ್ಲಿ, ಎಲಿಮಿನೇಟರ್ ಹಾಗೂ ಕ್ವಾಲಿಫೈಯರ್ 2 ಪಂದ್ಯಗಳು ವಿಶಾಖಪಟ್ಟಣದಲ್ಲಿ ಮೇ 8 ಮತ್ತು 10ಕ್ಕೆ ನಡೆಯಲಿವೆ. ಫೈನಲ್ ಪಂದ್ಯ ಮೇ 12ರಂದು ಹೈದಾರಾಬಾದ್‌ನಲ್ಲಿ ನಡೆಯಲಿದೆ.