ಫಿಂಚ್​ ಶತಕದಬ್ಬರ,ಬೌಲರ್​ಗಳ ಸಾಂಘಿಕ ದಾಳಿಗೆ ಲಂಕಾ ತತ್ತರ: ಅಂಕಪಟ್ಟಿಯಲ್ಲಿ ಆಸೀಸ್‌ಗೆ ಅಗ್ರಸ್ಥಾನ

ಆಸ್ಟ್ರೇಲಿಯಾ ನೀಡಿದ್ದ ಬೃಹತ್​​ 334 ರನ್​ ಬೆನ್ನಟ್ಟಿದ್ದ ಲಂಕಾ ಪಡೆ ಉತ್ತಮ ಆರಂಭ ಪಡೆದುಕೊಂಡರೂ, ಮಧ್ಯಮ ಕ್ರಮಾಂಕದಲ್ಲಿ ದಿಢೀರ್ ಕುಸಿತ ಕಂಡಿದ್ದರಿಂದ ಸೋಲು ಕಂಡಿದೆ.

ಲಂಡನ್​:ಫಿಂಚ್ ಸಿಡಿಲಬ್ಬರದ ಶತಕ​ ಹಾಗೂ ಬೌಲರ್​ಗಳ ಸಾಂಘಿಕ ದಾಳಿಯ ಎದುರು ಏಕಾಏಕಿ ಕುಸಿದ ಶ್ರೀಲಂಕಾ ಐಸಿಸಿ ವಿಶ್ವಕಪ್​​ನಲ್ಲಿ ಮತ್ತೊಂದು ಸೋಲು ಕಂಡಿದೆ. ಇತ್ತ ಜವಾಬ್ದಾರಿಯುತ ಗೆಲುವು ದಾಖಲು ಮಾಡಿರುವ ಕಾಂಗರೂ ಪಡೆ ಅಂಕಪಟ್ಟಿಯಲ್ಲಿ ಮೊದಲ ಸ್ಥಾನಕ್ಕೇರಿದೆ.

ಟಾಸ್​ ಸೋತು ಮೊದಲು ಬ್ಯಾಟಿಂಗ್‌ಗಿಳಿದ ಆಸ್ಟ್ರೇಲಿಯಾ ನಾಯಕ ಆ್ಯರನ್ ಫಿಂಚ್ ಅಮೋಘ ಶತಕ ಹಾಗೂ ಸ್ಟೀವ್ ಸ್ಮಿತ್ ಅರ್ಧಶತಕದ ನೆರವಿನಿಂದ ನಿಗದಿತ 50 ಓವರ್‌ಗಳಲ್ಲಿ 7 ವಿಕೆಟ್ ನಷ್ಟಕ್ಕೆ 334 ರನ್‌ಗಳ ಬೃಹತ್ ಮೊತ್ತ ಪೇರಿಸಿತ್ತು.

ಬೃಹತ್ ಗುರಿ ಬೆನ್ನಟ್ಟಿದ ಲಂಕಾ ಬಿರುಸಿನ ಆರಂಭ ಪಡೆದುಕೊಂಡಿತು. ಆರಂಭಿಕರಾಗಿ ಕಣಕ್ಕಿಳಿದ ಕ್ಯಾಪ್ಟನ್​ ದಿಮುತ್ ಕರುಣರತ್ನೆ ಹಾಗೂ ಕುಸಾಲ್ ಪರೇರಾ ಮೊದಲ ವಿಕೆಟ್​​ ನಷ್ಟಕ್ಕೆ 15.3 ಓವರ್​ಗಳಲ್ಲೇ 115ರನ್​ ಪೇರಿಸಿತು. ಈ ವೇಳೆ 56 ರನ್​ ಗಳಿಸಿದ್ದ ಪರೇರಾ ವಿಕೆಟ್​ ಒಪ್ಪಿಸಿದರು. ಇದಾದ ಬಳಿಕ ಕರುಣರತ್ನೆ ಜತೆ ಕ್ರೀಸ್‌ ಹಂಚಿಕೊಂಡ ತಿರುಮನ್ನೆ 16 ರನ್​ ಗಳಿಸಿ ನಿರಾಸೆ ಮೂಡಿಸಿದರು. ಇದಾದ ಬಳಿಕ ಬಂದ ಕುಸಾಲ್​ ಮೆಂಡಿಸ್​ 30 ರನ್ ​ಗಳಿಸಿ ವಿಕೆಟ್​ ಒಪ್ಪಿಸಿದ್ರು.

ಈ ಮಧ್ಯೆ ಅದ್ಭುತ ಬ್ಯಾಟಿಂಗ್ ಪ್ರದರ್ಶಿಸಿದ ದಿಮುತ್ 97 ರನ್ ಗಳಿಸಿದ ವೇಳೆ ವಿಕೆಟ್​ ಒಪ್ಪಿಸಿದರು. ಇದರ ಬೆನ್ನಲ್ಲೇ ಆಸೀಸ್​ ಬೌಲಿಂಗ್​ ದಾಳಿ ಎದುರು ಏಂಜೆಲೋ ಮ್ಯಾಥ್ಯೂಸ್ (9), ಮಿಲಿಂದ ಸಿರಿವರ್ಧನ್​ (3) ತಿಸಾರಾ ಪರೇರಾ (7), ಉದ್ದನ್​​(8), ಮಲಿಂಗಾ(1), ಪ್ರದೀಪ್​(0) ಹಾಗೂ ಸಿಲ್ವಾ ಅಜೇಯ(16)ರನ್ ​ಗಳಿಸಿ ಪೆವಿಲಿಯನ್ ಸೇರಿಕೊಂಡರು.

ಕೊನೆಯದಾಗಿ ತಂಡ ತನ್ನೆಲ್ಲಾ ವಿಕೆಟ್​ ಕಳೆದುಕೊಂಡು 45.5 ಓವರ್​ಗಳಲ್ಲಿ 247 ರನ್​ಗಳಿಗೆ ಆಲೌಟ್​ ಆಗುವುದರ ಮೂಲಕ 87 ರನ್​ಗಳ ಸೋಲು ಕಾಣುವಂತಾಯಿತು. ಆಸ್ಟ್ರೇಲಿಯಾ ಪರ ಮಿಚೆಲ್​ ಸ್ಟಾರ್ಕ್‌ ​ 4 ವಿಕೆಟ್​, ಕೇನ್​ ರಿಚರ್ಡ್​ಸನ್​ 3 ವಿಕೆಟ್​ ಪಡೆದು ಮಿಂಚಿದರೆ, ಕುಮಿನ್ಸ್‌ ​ 2 ವಿಕೆಟ್​ ಹಾಗೂ ಜಾಸನ್​ ಬಹ್ರೆನ್​ಡ್ರಾಫ್ 1ವಿಕೆಟ್​ ಪಡೆದುಕೊಂಡರು.

ಆಸ್ಟ್ರೇಲಿಯಾ ಇಲ್ಲಿಯವರೆಗೆ ತಾನು ಆಡಿರುವ ಐದು ಪಂದ್ಯಗಳ ಪೈಕಿ ನಾಲ್ಕರಲ್ಲಿ ಗೆದ್ದಿದ್ದು, ಭಾರತದ ವಿರುದ್ಧ ಮಾತ್ರ ಸೋಲು ಕಂಡಿದೆ. ಅಂಕಪಟ್ಟಿಯಲ್ಲಿ 8 ಅಂಕ ಗಳಿಸಿರುವ ಆಸ್ಟ್ರೇಲಿಯಾ ಅಗ್ರಸ್ಥಾನಕ್ಕೇರಿದೆ.