ಬಸ್​-ಸ್ಕೂಟರ್​ ಡಿಕ್ಕಿ: ಪಡಿತರ ಅಕ್ಕಿಗಾಗಿ ಹೋಗ್ತಿದ್ದ ತಂದೆ-ಮಗ ಸಾವು!

ಪಡಿತರ ಅಕ್ಕಿಗಾಗಿ ಥಂಬ್​ ಇಂಪ್ರೆಷನ್​ ಕೊಡಲು ತೆರಳುತ್ತಿರುವಾಗ ಸಂಭವಿಸಿದ ಅಪಘಾತದಲ್ಲಿ ತಂದೆ-ಮಗ ಸ್ಥಳದಲ್ಲೇ ಸಾವನ್ನಪ್ಪಿರುವ ಘಟನೆ ಮೈಸೂರಿನಲ್ಲಿ ನಡೆದಿದೆ.

ಮೈಸೂರು:ಪಡಿತರ ಅಕ್ಕಿಗಾಗಿ ಥಂಬ್​ ಇಂಪ್ರೆಷನ್​ ಕೊಡಲು ತೆರಳುತ್ತಿರುವಾಗ ಸಂಭವಿಸಿದ ಅಪಘಾತವೊಂದರಲ್ಲಿ ತಂದೆ-ಮಗನ ಪ್ರಾಣ ಪಕ್ಷಿ ಹಾರಿ ಹೋಗಿರುವ ಘಟನೆ ಮೈಸೂರಿನ ಕೋಟೆಹುಂಡಿ ಸರ್ಕಲ್​ನಲ್ಲಿ ನಡೆದಿದೆ.

ಹೌದು, ಕಟ್ಟೆಹುಣಸೂರು ನಿವಾಸಿ ಪ್ರಕಾಶ್​ ಕುಟುಂಬ ಇತ್ತೀಚೆಗೆ ಜಿ.ಪಿ ನಗರಕ್ಕೆ ಶಿಪ್ಟ್​ ಆಗಿದ್ದರು. ಬೆಳಗ್ಗೆ ರೇಷನ್​ ಅಕ್ಕಿಗಾಗಿ ಥಂಬ್​ ಇಂಪ್ರೆಷನ್​ ಕೊಡಲು ಜಿ.ಪಿ ನಗರದಲ್ಲಿ ವಾಸವಿದ್ದ ಪ್ರಕಾಶ್​ (50) ತಮ್ಮ ಮಗ ಸುರೇಶ್​ (23) ಜೊತೆ ಕಟ್ಟೆಹುಣಸೂರಿಗೆ ಸ್ಕೂಟರ್​ನಲ್ಲಿ ತೆರಳುತ್ತಿದ್ದರು. ಈ ವೇಳೆ ಸರ್ಕಾರಿ ಬಸ್​ ಮತ್ತು ಪ್ರಕಾಶ್​ ತೆರಳುತ್ತಿದ್ದ ಸ್ಕೂಟರ್​ ಮಧ್ಯೆ ಡಿಕ್ಕಿಯಾಗಿ ಅಪಘಾತ ಸಂಭವಿಸಿದೆ.

ಇನ್ನು ಅಪಘಾತದಲ್ಲಿ ಪ್ರಕಾಶ್​ ಮತ್ತು ಆತನ ಮಗ ಸುರೇಶ್​ ಇಬ್ಬರು ಸ್ಥಳದಲ್ಲೇ ಮೃತಪಟ್ಟಿದ್ದಾರೆ. ತಂದೆ-ಮಗನನ್ನು ಕಳೆದುಕೊಂಡ ಕುಟುಂಬಸ್ಥರ ಆಕ್ರಂದನ ಮುಗಿಲು ಮುಟ್ಟಿದೆ. ಇನ್ನು ಈ ಘಟನಾಸ್ಥಳಕ್ಕೆ ಪೊಲೀಸರು ದೌಡಾಯಿಸಿ ಮೃತದೇಹಗಳನ್ನು ಮರಣೋತ್ತರ ಪರೀಕ್ಷೆ ಕಳಹಿಸಿದ್ದಾರೆ.

ಈ ಘಟನೆ ಕುರಿತು ಮೈಸೂರು ಗ್ರಾಮಾಂತರ ಪೊಲೀಸ್​ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದ್ದು, ಪೊಲೀಸರು ಮುಂದಿನ ಕ್ರಮ ಕೈಗೊಂಡಿದ್ದಾರೆ.