ಮುಂಬೈ: ನರೇಂದ್ರ ಮೋದಿ ಇಲ್ಲವೇ ರಾಹುಲ್ ಗಾಂಧಿ ಈ ಬಾರಿ 'ಲೋಕ'ಗದ್ದುಗೆ ಏರುವ ಸಾಧ್ಯತೆ ಇಲ್ಲ. ತೃತೀಯ ರಂಗದ ಓರ್ವ ನಾಯಕ ದೆಹಲಿ ಪಟ್ಟಕ್ಕೇರಲಿದ್ದಾರೆ ಎಂದು ದಲಿತ ನಾಯಕ ಪ್ರಕಾಶ್ ಅಂಬೇಡ್ಕರ್ ಅಭಿಪ್ರಾಯಪಟ್ಟಿದ್ದಾರೆ.
ವಂಚಿತ್ ಬಹುಜನ ಅಘಾದಿ ಪಕ್ಷದ ಸಂಚಾಲಕರಾಗಿರುವ ಪ್ರಕಾಶ್ ಅಂಬೇಡ್ಕರ್, ಮಾಜಿ ಪ್ರಧಾನಿ ಹೆಚ್.ಡಿ.ದೇವೇಗೌಡ ಮತ್ತೊಮ್ಮೆ ಪ್ರಧಾನಿಯಾಗಲಿದ್ದಾರೆ ಎಂದು ಅನಿಸಿಕೆ ವ್ಯಕ್ತಪಡಿಸಿದ್ದಾರೆ.
"ನನ್ನ ಪ್ರಕಾರ ಯಾವುದೇ ಪಕ್ಷ ಸಂಪೂರ್ಣ ಬಹುಮತವನ್ನು ಪಡೆಯುವುದಿಲ್ಲ. ಹೀಗಾಗಿ ಮೋದಿ ಅಥವಾ ರಾಹುಲ್ ಗಾಂಧಿ ಪ್ರಧಾನಿಯಾಗುವುದು ಸಾಧ್ಯವಿಲ್ಲ. ತೃತೀಯ ರಂಗದಿಂದ ಓರ್ವ ನಾಯಕ ಅಚ್ಚರಿಯ ರೀತಿಯಲ್ಲಿ ಮೇಲೆದ್ದು ಪ್ರಧಾನಿಯಾಗಲಿದ್ದಾರೆ. ನನ್ನ ಪ್ರಕಾರ ಆ ಅಚ್ಚರಿಯ ನಾಯಕ ದೇವೇಗೌಡ ಆಗಿರಲಿದ್ದಾರೆ" ಎಂದು ಪ್ರಕಾಶ್ ಅಂಬೇಡ್ಕರ್ ಮಾಧ್ಯಮಗಳಿಗೆ ತಿಳಿಸಿದ್ದಾರೆ.
ವಂಚಿತ್ ಬಹುಜನ ಅಗದಿ ಪಕ್ಷವನ್ನು ಪ್ರಕಾಶ ಅಂಬೇಡ್ಕರ್ ಹಾಗೂ ಎಐಎಂಐಎಂ ನಾಯಕ ಅಸಾದುದ್ದೀನ್ ಓವೈಸಿ ಮುನ್ನಡೆಸುತ್ತಿದ್ದು, ಈ ಪಕ್ಷ ಮಹಾರಾಷ್ಟ್ರದ 48 ಲೋಕಸಭಾ ಕ್ಷೇತ್ರದಲ್ಲಿ ಸ್ಪರ್ಧೆ ನಡೆಸಿತ್ತು.
