ನವದೆಹಲಿ: 12 ತಿಂಗಳ ಬಳಿಕ ಹಳದಿ ಜರ್ಸಿ ತೊಡುತ್ತಿರುವ ಡೇವಿಡ್ ವಾರ್ನರ್ ಮತ್ತೆ ಅಂತಾರಾಷ್ಟ್ರೀಯ ಕ್ರಿಕೆಟ್ನಲ್ಲಿ ತಮ್ಮ ಚಕ್ರಾಧಿಕಪತ್ಯ ಸ್ಥಾಪಿಸಲಿದ್ದಾರೆ ಎಂದು ಆಸೀಸ್ ನಾಯಕ ಆ್ಯರೋನ್ ಪಿಂಚ್ ಅಭಿಪ್ರಾಯ ಪಟ್ಟಿದ್ದಾರೆ.
ದ. ಅಫ್ರಿಕಾ ವಿರುದ್ಧದ ಟೆಸ್ಟ್ ಸರಣಿಯಲ್ಲಿ ಬಾಳ್ ಟ್ಯಾಂಪರಿಂಗ್ ಪ್ರಕರಣದಲ್ಲಿ ಭಾಗಿಯಾಗಿದ್ದ ಕಾರಣ 12 ತಿಂಗಳುಗಳ ಕಾಲ ಕ್ರಿಕೆಟ್ನಿಂದ ನಿಷೇದಕ್ಕೊಳಪಟ್ಟಿದ್ದರು. ಈ ವೇಳೆ ತಮ್ಮ ಕುಟುಂಬದ ಜೊತೆ ಸಮಯ ಕಳೆದಿದ್ದ ವಾರ್ನರ್ ಕ್ರಿಕೆಟ್ನ ಬಗ್ಗೆ ಇರುವ ಅಭಿಮಾನವನ್ನು ಮಾತ್ರ ಕಳೆದುಕೊಳ್ಳದೆ ಐಪಿಎಲ್ನಲ್ಲಿ ತಮ್ಮ ಆರ್ಭಟ ಮುಂದುವರಿಸಿ ಪ್ರಾಂಚೈಸಿಗಳ ಅವರ ಮೇಲೆ ಇಟ್ಟಿದ್ದ ನಂಬಿಕೆಯನ್ನು ಉಳಿಸಿಕೊಂಡಿದ್ದಾರೆ ಎಂದು ಫಿಂಚ್ ತಮ್ಮ ಸ್ನೇಹಿತನ ಬಗ್ಗೆ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ.
ಅಂತಾರಾಷ್ಟ್ರೀಯ ಕ್ರಿಕೆಟ್ನಲ್ಲಿ ಒಂದು ವರ್ಷದಿಂದ ಹೊರಗಿರುವ ವಾರ್ನರ್ ಕ್ರಿಕೆಟ್ ಆಡದೆ ಹಸಿದಿದ್ದಾರೆ. ಅವರೊಬ್ಬ ಸೂಪರ್ ಪ್ಲೇಯರ್ ಎಂಬುದು ಇಡೀ ವಿಶ್ವಕ್ಕೆ ಗೊತ್ತಿದೆ. ಧೀರ್ಘ ಸಮಯದ ನಂತರ ರಾಷ್ಟ್ರೀಯ ತಂಡಕ್ಕೆ ಮರಳಿದ್ದು, ಜೊತೆಗೆ ಇದೇ ವೇಳೆ ವಿಶ್ವಕಪ್ ಆರಂಭವಾಗುತ್ತಿರುವುದರಿಂದ ತಮ್ಮ ಬ್ಯಾಟ್ ಮೂಲಕ ಅಂತಾರಾಷ್ಟ್ರೀಯ ಕ್ರಿಕೆಟ್ನಲ್ಲಿ ಸುನಾಮಿ ಸೃಷ್ಠಿಸಿ ಮತ್ತೆ ಸೀಮಿತ ಓವರ್ನ ಸಾಮ್ರಾಟ್ ಆಗಲಿದ್ದಾರೆ. ವಾರ್ನರ್ ಸ್ಮಿತ್ ಆಗಮನ ನಮ್ಮ ತಂಡಕ್ಕೆ ಮತ್ತಷ್ಟು ಶಕ್ತಿ ನೀಡಿದೆ. ಈಗಾಗಲೆ ಭಾರತ ಹಾಗೂ ಪಾಕಿಸ್ತಾನ ವಿರುದ್ಧ ಸರಣಿ ಜಯಿಸಿದ್ದ ನಮ್ಮ ತಂಡ ಸ್ಮಿತ್-ವಾರ್ನರ್ ಜೋಡಿ ಪುನಾರಾಗಮನ ಮತ್ತಷ್ಟು ಬಲಿಷ್ಠವಾಗಲಿದೆ ಎಂದು ಆಸೀಸ್ ನಾಯಕ ತಿಳಿಸಿದ್ದಾರೆ..
ವಾರ್ನರರ ಪ್ರಸ್ತುತ ನಡೆಯುತ್ತಿರುವ ಇಂಡಿಯನ್ ಪ್ರೀಮಿಯರ್ ಲೀಗ್ನಲ್ಲಿ 12 ಪಂದ್ಯಗಳಿಂದ 7 ಅರ್ಧಶತಕ ಹಾಗೂ 1 ಶತಕ ಸಹಿತ 692 ರನ್ಗಳಿಸಿ ಟೂರ್ನಿಯಲ್ಲಿ ಗರಿಷ್ಠ ಸ್ಕೋರರ್ ಎನಿಸಿಕೊಂಡಿದ್ದರು. ಇನ್ನು 2 ಲೀಗ್ ಪಂದ್ಯವಿರುವಂತೆಯೇ ಗರಿಷ್ಠ ಸ್ಕೋರರ್ ಪಟ್ಟಿಯಲ್ಲಿ 2 ನೇ ಸ್ಥಾನದಲ್ಲಿರುವ ಕನ್ನಡಿಗ ರಾಹಲ್ಗಿಂತ 172 ರನ್ಗಳಿಂದ ಮುಂದಿದ್ದು ಟೂರ್ನಿ ಮುಗಿದರು ಆರೆಂಜ್ ಕ್ಯಾಪ್ ತನ್ನಲ್ಲೇ ಉಳಿಸಿಕೊಳ್ಳುವ ಸಾಧ್ಯತೆ ಹೆಚ್ಚಿದೆ.
ಒಟ್ಟಿನಲ್ಲಿ ಬಾಲ್ ಟ್ಯಾಂಪರಿಂಗ್ ಪ್ರಕರಣದಿಂದ ನೊಂದಿದ್ದ ವಾರ್ನರ್ ಒಂದು ವರ್ಷದ ನಂತರ ಸ್ಪರ್ಧಾತ್ಮಕ ಕ್ರಿಕೆಟ್ಗೆ ಮತ್ತೆ ಎಂಟ್ರಿಕೊಡುತ್ತಿರುವುದು ಕೇವಲ ಆಸ್ಟ್ರೇಲಿಯಕ್ಕಲ್ಲದೆ ಕ್ರಿಕೆಟ್ ಪ್ರೇಮಿಗಳಿಗೆ ಖುಷಿಯ ವಿಚಾರವಾಗಿದೆ. ಅವರ ಸ್ಫೋಟಕ ಆಟವನ್ನು ಕಣ್ತುಂಬಿಕೊಳ್ಳಲು ಕಾಯುತ್ತಿದ್ದಾರೆ.
