ಪವಾರ್​ ಬಳಿಕ ಶಾರುಖ್​ ಭೇಟಿ ಮಾಡಿದ ಪ್ರಶಾಂತ್​.. ಸಾರ್ವಜನಿಕ ವಲಯದಲ್ಲಿ ಚರ್ಚೆ

ಶರದ್ ಪವಾರ್ ಭೇಟಿ ಬಳಿಕ ಬಾಲಿವುಡ್ ನಟ ಶಾರುಖ್ ಖಾನ್ ಅವರನ್ನು ಪ್ರಶಾಂತ್ ಕಿಶೋರ್ ಭೇಟಿಯಾಗಿದ್ದಾರೆ. ಈ ಹಿನ್ನೆಲೆಯಲ್ಲಿ ಶಾರುಖ್​ ರಾಜಕೀಯ ಪ್ರವೇಶ ಮಾಡುತ್ತಿದ್ದಾರೆಯೇ ಎಂಬ ಊಹಾಪೋಹಗಳು ಹರಿದಾಡಿದ್ದವು.

ಮುಂಬೈ: ಎನ್​ಸಿಪಿ ಮುಖಂಡ ಶರದ್ ಪವಾರ್ ಭೇಟಿ ಬಳಿಕ ಅದೇ ದಿನ ಸಂಜೆ ಬಾಲಿವುಡ್ ನಟ ಶಾರುಖ್ ಖಾನ್ ಅವರ ಮನೆಯಲ್ಲಿ ಚುನಾವಣಾ ತಂತ್ರಜ್ಞ ಪ್ರಶಾಂತ್ ಕಿಶೋರ್ ಕಾಣಿಸಿಕೊಂಡಿದ್ದಾರೆ. ಈ ವಿಚಾರ ಭಾರಿ ಚರ್ಚೆಗೆ ಗ್ರಾಸವಾಗಿದ್ದು, ಶಾರುಖ್​ ರಾಜಕೀಯ ಪ್ರವೇಶ ಮಾಡುತ್ತಿದ್ದಾರೆಯೇ ಎಂಬ ಊಹಾ - ಪೋಹಗಳು ಹರಿದಾಡಿದ್ದವು.

ಇನ್ನು ಶಾರೂಖ್​ ಅಭಿನಯಿಸುತ್ತಿರುವ ಮುಂಬರುವ ಸಿನಿಮಾ 'ರೆಡ್​ ಚಿಲ್ಲಿಸ್​' ಎಂಬುದು ಪ್ರಶಾಂತ್​ ಕಿಶೋರ್​ ಜೀವನಾಧಾರಿತ ಸಿನಿಮಾವೇ ಎಂಬೆಲ್ಲಾ ಪ್ರಶ್ನೆಗಳು ಉದ್ಭವಗೊಂಡಿದ್ದವು.

ಆದರೆ, ಈ ವದಂತಿಗಳು ಸುಳ್ಳು. ಶಾರುಖ್ ಮತ್ತು ಪ್ರಶಾಂತ್ ಸ್ನೇಹಿತರಾಗಿದ್ದಾರೆ. ಅವರು ಆಗಾಗ ಭೇಟಿಯಾಗುತ್ತಾರೆ. ಅಷ್ಟೇ ಅಲ್ಲದೆ, ಶಾರುಖ್ ಖಾನ್ ಅವರ ರಾಜಕೀಯ ಪ್ರವೇಶದ ವದಂತಿಗಳನ್ನು ನಿಷ್ಪ್ರಯೋಜಕ ಎಂದು ಮೂಲಗಳು ತಿಳಿಸಿದೆ