ಹೀಗೂ ಉಂಟು; ಒಂದಲ್ಲ, ಎರಡಲ್ಲ, ಬರೋಬ್ಬರಿ ಮೂರು ಸಲ ಕೋವಿಡ್ ಸೋಂಕಿಗೊಳಗಾದ ವ್ಯಕ್ತಿ!

ಕೊರೊನಾ ಸೋಂಕಿಗೊಳಗಾಗುವ ವ್ಯಕ್ತಿಗಳು ಚೇತರಿಸಿಕೊಂಡ ಬಳಿಕ ಅವರಲ್ಲಿ ಮತ್ತೊಮ್ಮೆ ಆ ಗುಣಲಕ್ಷಣ ಕಾಣಿಸಿಕೊಳ್ಳುವುದು ಅತಿ ವಿರಳ. ಆದರೆ ಮಧ್ಯಪ್ರದೇಶದಲ್ಲಿ ಓರ್ವ ವ್ಯಕ್ತಿಗೆ ಮೂರು ಸಲ ಕೊರೊನಾ ಸೋಂಕು ತಗುಲಿದೆ.

ಗ್ವಾಲಿಯರ್​​(ಮಧ್ಯಪ್ರದೇಶ):30 ವರ್ಷದ ವ್ಯಕ್ತಿಯೋರ್ವ 9 ತಿಂಗಳ ಅವಧಿಯಲ್ಲಿ ಬರೋಬ್ಬರಿ ಮೂರು ಸಲ ಕೋವಿಡ್ ಸೋಂಕಿಗೊಳಗಾಗಿರುವ ಘಟನೆ ನಡೆದಿದೆ.

ಮಧ್ಯಪ್ರದೇಶ ಗ್ವಾಲಿಯಾರ್​ನಲ್ಲಿ ಈ ಘಟನೆ ನಡೆದಿದ್ದು, 30 ವರ್ಷದ ವ್ಯಕ್ತಿ ಮೇಲಿಂದ ಮೇಲೆ ಕೊರೊನಾ ಸೋಂಕಿಗೊಳಗಾಗಿದ್ದಾನೆ. ಜುಲೈ 26, 2020ರಲ್ಲಿ ಪ್ರಥಮ ಬಾರಿಗೆ ಕೋವಿಡ್ ಸೋಂಕಿಗೊಳಗಾಗಿದ್ದ ವ್ಯಕ್ತಿ ತದನಂತರ ಮನೆಯಲ್ಲೇ ಚೇತರಿಸಿಕೊಂಡಿದ್ದನು. ಇದಾದ ಬಳಿಕ ಮತ್ತೊಮ್ಮೆ ಅಕ್ಟೋಬರ್​ 15, 2020ರಲ್ಲಿ ಕೊರೊನಾ ಸೋಂಕಿಗೊಳಗಾಗಿ, ಚೇತರಿಕೆ ಕಂಡಿದ್ದನು. ಆದರೆ, ಇದೀಗ ಮತ್ತೊಮ್ಮೆ ಸೋಂಕಿಗೊಳಗಾಗಿದ್ದಾನೆ.

ಓರ್ವ ವ್ಯಕ್ತಿಯಲ್ಲಿ ಕೊರೊನಾ ವೈರಸ್ ಸೋಂಕಿಗೊಳಗಾಗಿ ಗುಣಮುಖನಾದ ಬಳಿಕ ಆತನಲ್ಲಿ ಪ್ರತಿಕಾಯ ಅಭಿವೃದ್ಧಿಗೊಳ್ಳುತ್ತದೆ. ಜತೆಗೆ ಹೊಸದಾಗಿ ಕೊರೊನಾ ಸೋಂಕು ಒಳಗಾಗದಂತೆ ರಕ್ಷಣೆ ಮಾಡುತ್ತದೆ. ಆದರೆ, ಈ ವ್ಯಕ್ತಿಗೆ 9 ತಿಂಗಳಲ್ಲಿ ಮೂರು ಸಲ ಕೋವಿಡ್ ಸೋಂಕು ತಗುಲಿರುವುದು ನಿಜಕ್ಕೂ ಅಚ್ಚರಿ ಮೂಡಿಸಿದೆ.

ಇದಕ್ಕೆ ಸಂಬಂಧಿಸಿದಂತೆ ಮಾತನಾಡಿರುವ ಜಿಲ್ಲಾ ಆರೋಗ್ಯಧಿಕಾರಿ ಡಾ. ಮನೀಶ್ ಶರ್ಮಾ, ಇಂತಹ ಪ್ರಕರಣದ ಬಗ್ಗೆ ತಮಗೆ ಮಾಹಿತಿ ಇಲ್ಲ ಎಂದಿದ್ದಾರೆ. ಈ ಯುವಕ ಯಾವಾಗ ಮತ್ತು ಹೇಗೆ ಸೋಂಕಿಗೊಳಗಾಗಿದ್ದನು ಎಂಬುದರ ಬಗ್ಗೆ ಮಾಹಿತಿ ಪಡೆದುಕೊಳ್ಳುತ್ತೇನೆ. ತದನಂತರ ಆತನ ರಕ್ತದ ಹಾಗೂ ಸ್ವ್ಯಾಬ್​ ಮಾದರಿ ಪರೀಕ್ಷೆಗೊಳಪಡಿಸಲಾಗುವುದು ಎಂದಿದ್ದಾರೆ.

ಒಬ್ಬ ವ್ಯಕ್ತಿ ಪದೇ ಪದೇ ಕೊರೊನಾ ಸೋಂಕಿಗೊಳಗಾಗುವ ಪ್ರಕರಣ ಕಡಿಮೆ ಎಂದು ವೈದ್ಯರು ತಿಳಿಸಿದ್ದು, ಇದರ ಬಗ್ಗೆ ಮಾಹಿತಿ ಕಲೆ ಹಾಕಲಾಗುವುದು ಎಂಬ ಮಾಹಿತಿ ಹಂಚಿಕೊಂಡಿದ್ದಾರೆ.