ಹೈದರಾಬಾದ್:ಬೈಕ್ ಓಡಿಸುತ್ತಿದ್ದ ಸವಾರನ ಮೇಲೆ ಹಿಂಬದಿ ಕುಳಿತ್ತಿದ್ದ ವ್ಯಕ್ತಿಯೊಬ್ಬ ಕತ್ತಿಗೆ ಚೂರಿ ಹಾಕಿ ಕೊಲೆ ಮಾಡಿರುವ ಘಟನೆ ಹೈದರಾಬಾದ್ನಲ್ಲಿ ನಡೆದಿದೆ.
ಏನಿದು ಘಟನೆ?
ಶಾರೂಖ್ ಎಂಬ ಯುವಕ ನನ್ನ ಮಗಳಿಗೆ ಲೈಂಗಿಕ ಕಿರುಕುಳ ನೀಡುತ್ತಿದ್ದಾನೆ ಎಂದು ತಂದೆ ಅನ್ವರ್ ಫಲಕ್ನುಮಾ ಪೊಲೀಸ್ ಠಾಣೆಯಲ್ಲಿ ದೂರು ಸಲ್ಲಿಸಿದ್ದರು. ಶಾರೂಖ್ ವಿರುದ್ಧ ಪೊಲೀಸರು ಪೊಕ್ಸೊ ಕಾಯ್ದೆಯಡಿ ಪ್ರಕರಣ ದಾಖಲಿಸಿಕೊಂಡಿದ್ದರು. ಆದ್ರೂ ಶಾರೂಖ್ ಬದಲಾಗಲಿಲ್ಲ. ಅನ್ವರ್ ಮಗಳಿಗೆ ಶಾರೂಖ್ ಮತ್ತೆ ಕಿರುಕುಳ ನೀಡಲು ಪ್ರಾರಂಭಿಸಿದ.
ನಿನ್ನ ಮಗಳನ್ನು ನಾನು ಮದುವೆ ಮಾಡಿಕೊಳ್ಳುತ್ತೇನೆ. ಸಂಸಾರ ಮಾಡಲು ನನ್ನ ಜೊತೆ ಕಳುಹಿಸಿಕೊಡು ಎಂದು ಅನ್ವರ್ಗೆ ಶಾರೂಖ್ ಕಾಟ ನೀಡುತ್ತಿದ್ದನಂತೆ. ಇದರಿಂದ ಅನ್ವರ್ ಮತ್ತು ಆತನ ಮಗಳು ಬೇಸತ್ತು ಹೋಗಿದ್ದರು. ಹೀಗೆ ಬೇಸತ್ತ ಅನ್ವರ್ ಶಾರೂಖ್ನನ್ನು ಮುಗಿಸಲು ತಂತ್ರ ರೂಪಿಸಿದ್ದಾನೆ.
ಹೌದು, ಯೋಜನೆ ಪ್ರಕಾರವೇ ನಿನ್ನ ಜೊತೆ ಮಾತನಾಡುವುದಿದೆ ಮನೆ ಹತ್ತಿರ ಬಾ ಎಂದು ಶಾರೂಖ್ನನ್ನು ಅನ್ವರ್ ಕರೆಯಿಸಿಕೊಂಡಿದ್ದಾನೆ. ಶಾರೂಖ್ ಸಹ ಅನ್ವರ್ ಇದ್ದ ಸ್ಥಳಕ್ಕೆ ಬಂದಿದ್ದಾನೆ. ಬಳಿಕ ಇಬ್ಬರು ಬೈಕ್ ಮೇಲೆ ತೆರಳಿದರು. ಬೈಕ್ ಮೇಲೆ ತೆರಳುತ್ತಿದ್ದಾಗ ಸಮಯ ನೋಡಿ ಅನ್ವರ್ ತಾನೂ ತಂದಿದ್ದ ಚಾಕುವಿನಿಂದ ಶಾರೂಖ್ ಕತ್ತಿಗೆ ಚುಚ್ಚಿದ್ದಾನೆ. ತೀವ್ರ ಗಾಯಗೊಂಡಿದ್ದ ಶಾರೂಖ್ ಫಲಕ್ನುಮಾ ಬಸ್ ಡಿಪೋ ಬಳಿ ಕುಸಿದು ಬಿದ್ದು ಪ್ರಾಣ ಬಿಟ್ಟಿದ್ದಾನೆ.
ಸುದ್ದಿ ತಿಳಿದ ಕೂಡಲೇ ಪೊಲೀಸರು ಸ್ಥಳಕ್ಕೆ ದೌಡಾಯಿಸಿ ಪರಿಶೀಲನೆ ನಡೆಸಿದರು. ಬಳಿಕ ಮೃತದೇಹವನ್ನು ವಶಕ್ಕೆ ಪಡೆದು ಮರಣೋತ್ತರ ಪರೀಕ್ಷೆಗೆ ಕಳುಹಿಸಿದರು. ಪ್ರಕರಣದ ತನಿಖೆ ಮುಂದುವರೆದಿದೆ.