ಬೈಕ್​​ನಲ್ಲಿ ಅಪಾಯಕಾರಿ ಸ್ಟಂಟ್​: 15 ದಿನ ಜೀವನ್ಮರಣದ ಹೋರಾಟ, ಬದುಕಲಿಲ್ಲ ಯುವಕ

ಗೌರಿ ಸಾಯಿಕೃಷ್ಣ ಎಂಬ ಯುವಕ ಬೈಕ್​ನಲ್ಲಿ ಸ್ಟಂಟ್​ ಮಾಡಲು ಹೋಗಿ ಆಯತಪ್ಪಿ ರಸ್ತೆಗೆ ಬಿದ್ದು ಗಂಭೀರವಾಗಿ ಗಾಯಗೊಂಡಿದ್ದ.

ಅಮರಾವತಿ:ಸಿನಿಮಾದಲ್ಲಿ ತೋರಿಸುವಂತೆ ಬೈಕ್​ನಲ್ಲಿ ಸ್ಟಂಟ್​ ಮಾಡಲು ಹೋಗಿ ಯುವಕನೊಬ್ಬ ಪ್ರಾಣ ಕಳೆದುಕೊಂಡಿರುವ ಘಟನೆ ಆಂಧ್ರ ಪ್ರದೇಶದ ಉಯ್ಯೂರು ಪಟ್ಟಣದಲ್ಲಿ ನಡೆದಿದೆ.

ಗೌರಿ ಸಾಯಿಕೃಷ್ಣ (18) ಎಂಬಾತ ವಿಜಯವಾಡ- ಮಚಲಿಪಟ್ಟಣ ರಾಷ್ಟ್ರೀಯ ಹೆದ್ದಾರಿಯ ಸರ್ವಿಸ್​ ರಸ್ತೆಯಲ್ಲಿ ಸ್ಟಂಟ್​ ಮಾಡುತ್ತಿದ್ದಾಗ ನಿಯಂತ್ರಣ ತಪ್ಪಿ ಬೈಕ್​ನಿಂದ ರಸ್ತೆಗೆ ಬಿದ್ದಿದ್ದಾನೆ. ಪರಿಣಾಮ ಆತನ ಮೆದುಳಿಗೆ ತೀವ್ರವಾಗಿ ಹಾನಿಯಾಗಿತ್ತು. ಗಂಭೀರವಾಗಿ ಗಾಯಗೊಂಡಿದ್ದ ಆತನನ್ನು ಆಸ್ಪತ್ರೆಗೆ ದಾಖಲಿಸಲಾಗಿತ್ತು. 15 ದಿನ ಸಾವು-ಬದುಕಿನೊಂದಿಗೆ ಹೋರಾಡಿದ ಆತ ಸೋಮವಾರ ಆಸ್ಪತ್ರೆಯಲ್ಲಿಯೇ ಮೃತಪಟ್ಟಿದ್ದಾನೆ.

ಎಂಟನೇ ತರಗತಿವರೆಗೆ ಓದಿದ ಬಳಿಕ ಯುವಕ ಸ್ಥಳೀಯ ಬೈಕ್ ಮೆಕ್ಯಾನಿಕ್ ಬಳಿ ಉದ್ಯೋಗಕ್ಕೆ ಸೇರಿಕೊಂಡಿದ್ದ. ಆಗಾಗ್ಗೆ ತನ್ನ ಸ್ನೇಹಿತರೊಂದಿಗೆ ಇಂತಹ ದುಸ್ಸಾಹಸಗಳನ್ನು ಮಾಡುತ್ತಿದ್ದ ಎಂದು ತಿಳಿದುಬಂದಿದೆ. ಇತ್ತೀಚೆಗೆ ಪೊಲೀಸರು ಆತನಿಗೆ ಎಚ್ಚರಿಕೆಯನ್ನೂ ನೀಡಿದ್ದರು.

ಇದನ್ನೂ ಓದಿ:ಪ್ರಾಣಕ್ಕೆ ಕುತ್ತು ತಂದ ಸ್ಟಂಟ್​​.. ಸಮ್ಮರ್​ಸಾಲ್ಟ್​ ಮಾಡಿ ಜೀವ ಕಳೆದುಕೊಂಡ ಕಬಡ್ಡಿ ಪಟು

ಬೈಕ್​ನಲ್ಲಿ ಈ ರೀತಿ ಸ್ಟಂಟ್​ ಮಾಡಬೇಡ ಎಂದು ಹಲವು ಬಾರಿ ಹೇಳಿದ್ದೆ. ಕೊನೆಗೂ ಆ ಸ್ಟಂಟ್​ ನನ್ನ ಮಗನ ಪ್ರಾಣವನ್ನು ತೆಗೆದುಕೊಂಡಿತು. ಇಂತಹ ಸಾಹಸವನ್ನು ಯಾರೂ ಮಾಡಬೇಡಿ ಎಂದು ಮೃತ ಯುವಕನ ತಂದೆ ನಟರಾಜಶೇಖರ್ ಮನವಿ ಮಾಡಿದ್ದಾರೆ.