ಯುಪಿ ಅಧಿಕಾರಿಗಳಿಗೆ ಕೊರೊನಾ... ಸೆಲ್ಫ್​ ಐಸೋಲೇಷನ್​​ಗೊಳಗಾದ ಸಿಎಂ ಯೋಗಿ!

ಉತ್ತರ ಪ್ರದೇಶದ ಸಿಎಂ ಕಚೇರಿಯ ಕೆಲ ಅಧಿಕಾರಿಗಳಲ್ಲಿ ಕೊರೊನಾ ವೈರಸ್​ ಕಾಣಿಸಿಕೊಂಡಿರುವ ಕಾರಣ ಸಿಎಂ ಯೋಗಿ ಸೆಲ್ಫ್​ ಐಸೋಲೇಷನ್​ಗೊಳಗಾಗಿದ್ದಾರೆ.

ಲಕ್ನೋ:ಉತ್ತರ ಪ್ರದೇಶದಲ್ಲಿ ಕೊರೊನಾ ವೈರಸ್​ ಹಾವಳಿ ಜೋರಾಗಿದ್ದು, ಇದೀಗ ಮುಖ್ಯಮಂತ್ರಿ ಯೋಗಿ ಆದಿತ್ಯನಾಥ್​ರಿಗೂ ಅದರ ಭಯ ಶುರುವಾಗಿದೆ.

ಉತ್ತರ ಪ್ರದೇಶದ ಹೆಚ್ಚುವರಿ ಮುಖ್ಯ ಕಾರ್ಯದರ್ಶಿ ಎಸ್.​​ಪಿ.ಗೋಯಲ್​, ಒಎಸ್​​ಡಿ ಅಭಿಷೇಕ್​​ ಕೌಶಿಕ್​, ವಿಶೇಷ ಕಾರ್ಯದರ್ಶಿ ಅಮಿತ್​ ಸಿಂಗ್​ ಸೇರಿದಂತೆ ಕೆಲ ಅಧಿಕಾರಿಗಳಲ್ಲಿ ಕೊರೊನಾ ಸೋಂಕು ಕಾಣಿಸಿಕೊಂಡಿರುವ ಕಾರಣ ಮುಖ್ಯಮಂತ್ರಿ ಸೆಲ್ಫ್​​ ಐಸೋಲೇಷನ್​ಗೊಳಗಾಗಿದ್ದಾರೆ.

ಇದಕ್ಕೆ ಸಂಬಂಧಿಸಿದಂತೆ ಟ್ವೀಟ್​ ಮಾಡಿರುವ ಯೋಗಿ ಆದಿತ್ಯನಾಥ್​, ಕೆಲ ಅಧಿಕಾರಿಗಳಲ್ಲಿ ಕೊರೊನಾ ವೈರಸ್ ಕಾಣಿಸಿಕೊಂಡಿರುವ ಕಾರಣ ಮುಂಜಾಗ್ರತೆಯಾಗಿ ಸೆಲ್ಫ್​ ಐಸೋಲೇಷನ್​ಗೊಳಗಾಗಿದ್ದೇನೆ ಎಂದು ಹೇಳಿಕೊಂಡಿದ್ದಾರೆ.

ಉತ್ತರ ಪ್ರದೇಶದಲ್ಲಿ ಕಳೆದ 24 ಗಂಟೆಯಲ್ಲಿ 18,021 ಹೊಸ ಕೋವಿಡ್ ಪ್ರಕರಣ ಕಾಣಿಸಿಕೊಂಡಿದ್ದು, 85 ಜನರು ಸಾವನ್ನಪ್ಪಿದ್ದಾರೆ. ಸದ್ಯ 95,980 ಸಕ್ರಿಯ ಪ್ರಕರಣಗಳಿವೆ.