ಅಸ್ತಮಾ ಖಾಯಿಲೆ ನಿರ್ಮೂಲನೆಗಾಗಿ ಜಗತ್ತಿನಾದ್ಯಂತ ಪ್ರತಿ ವರ್ಷ ವಿಶ್ವ ಅಸ್ತಮಾ ದಿನ ಆಚರಿಸುವುದರೊಂದಿಗೆ ಅರಿವು ಮೂಡಿಸಲಾಗುತ್ತಿದೆ. ಅಸ್ತಮಾ ದಿನವನ್ನು ಮೇ ತಿಂಗಳ ಮೊದಲ ಮಂಗಳವಾರ ಆಚರಿಸಲಾಗುತ್ತದೆ. ಗ್ಲೋಬಲ್ ಇನಿಶಿಯೇಟಿವ್ ಫಾರ್ ಅಸ್ತಮಾ (GINA) ಎಂಬ ಸಂಸ್ಥೆ ವಾರ್ಷಿಕ ಕಾರ್ಯಕ್ರಮಗಳನ್ನು ನಡೆಸಿಕೊಂಡು ಬರುತ್ತಿದೆ. ಖಾಯಿಲೆಯ ಬಗ್ಗೆ ಜನರಲ್ಲಿ ಅರಿವು ಮೂಡಿಸುವುದು, ಜಗತ್ತಿನಾದ್ಯಂತ ರೋಗಿಗಳನ್ನು ಆರೈಕೆ ಮಾಡುವ ಮೂಲಕ ಆರೋಗ್ಯ ಸುಧಾರಿಸುವುದು ಇದರ ಮುಖ್ಯ ಗುರಿ.
ಭಾರತದಲ್ಲಿರು ಅಸ್ತಮಾ ರೋಗಿಗಳೆಷ್ಟು?: ಅಸ್ತಮಾ ದಿನವನ್ನು ಮೊದಲ ಬಾರಿಗೆ 1998ರಲ್ಲಿ ಆಚರಿಸಲಾಯಿತು. ವಿಶ್ವ ಆರೋಗ್ಯ ಸಂಸ್ಥೆ(WHO) ಮಾಹಿತಿ ಪ್ರಕಾರ, ಭಾರತದಲ್ಲಿ ಮಗುವಿನಿಂದ ಹಿಡಿದು ಹಿರಿಯರವರೆಗೂ ಸುಮಾರು 20 ಮಿಲಿಯನ್ ಅಸ್ತಮಾ ರೋಗಿಗಳಿದ್ದಾರೆ. ಇದೊಂದು ಉಸಿರಾಟದ ಕಾಯಿಲೆ. ಸೋಂಕಿನ ಅಪಾಯ ಹೆಚ್ಚು. ಎಚ್ಚರಿಕೆ ಮತ್ತು ಅರಿವಿನ ಅಗತ್ಯವಿರುವ ಕೋವಿಡ್ ಸಾಂಕ್ರಾಮಿಕದಂತಹ ಕಾಯಿಲೆ ತಪ್ಪಿಸಲು ಅಸ್ತಮಾಗೆ ಚಿಕಿತ್ಸೆ ಅವಶ್ಯಕ.
ಎಲ್ಲ ವಯೋಮಾನದವರಲ್ಲೂ ಹೆಚ್ಚುತ್ತಿದೆ ಅಸ್ತಮಾ: ಅಸ್ತಮಾ ದಾಳಿಯು ನಿಮ್ಮ ದೇಹದ ವಾಯುಮಾರ್ಗಗಳ ಸುತ್ತ ಸ್ನಾಯುಗಳನ್ನು ಬಿಗಿಗೊಳಿಸುವುದರಿಂದ ಉಂಟಾಗುವ ಸಾಧ್ಯತೆ ಇದೆ. ವಾಯುಮಾರ್ಗಗಳ ಒಳಪದರವು ಊದಿಕೊಳ್ಳುತ್ತದೆ ಅಥವಾ ಉರಿಯುತ್ತದೆ. ಇತ್ತೀಚಿನ ದಿನಗಳಲ್ಲಿ ವಿವಿಧ ಕಾರಣಗಳಿಂದಾಗಿ ಎಲ್ಲ ವಯಸ್ಸಿನ ಜನರಲ್ಲಿ ಹೆಚ್ಚುತ್ತಿದೆ. ಅಸ್ತಮಾದ ಹಲವು ಲಕ್ಷಣಗಳು ವಯಸ್ಕರಲ್ಲಿ ಮಾತ್ರವಲ್ಲದೇ ಮಕ್ಕಳಲ್ಲಿಯೂ ಕಂಡುಬರುತ್ತವೆ. ಶ್ವಾಸನಾಳಗಳು ನಿಸ್ತೇಜಗೊಂಡು ಉಸಿರಾಟದ ಸೋಂಕು ಉಂಟುಮಾಡುತ್ತದೆ. ಪರಿಣಾಮ ರೋಗಿ ತೀವ್ರ ಉಸಿರಾಟದ ತೊಂದರೆ ಅನುಭವಿಸುತ್ತಾನೆ.
ಅಸ್ತಮಾ ಬಾಧಿಸಲು ಕಾರಣವೇನು?: ಅಸ್ತಮಾ 6 ತಿಂಗಳ ಮಗುವಿನಿಂದ ಹಿಡಿದು ವಯಸ್ಸಾದ ವ್ಯಕ್ತಿಯಲ್ಲಿಯೂ ಸಂಭವಿಸುವ ಸಮಸ್ಯೆ. ಆನುವಂಶಿಕತೆ, ಆರೋಗ್ಯ ಸಮಸ್ಯೆಗಳು, ಅಲರ್ಜಿ, ಸೋಂಕು, ಕಾಲೋಚಿತ ಬದಲಾವಣೆಗಳು ಮತ್ತು ಮಾಲಿನ್ಯದಂತಹ ಅಂಶಗಳು ಇದಕ್ಕೆ ಕಾರಣವಾಗುತ್ತವೆ. ಮಕ್ಕಳಿಗೆ ಆನುವಂಶಿಕ ಅಂಶಗಳೂ ಕಾರಣವಂತೆ.
ಆನುವಂಶಿಕತೆಯ ಹೊರತಾಗಿ ಕೆಲವೊಮ್ಮೆ ದೈಹಿಕ ಬಲಹೀನತೆ ಪರಿಸ್ಥಿತಿ ಮತ್ತು ಪರಿಸರ ಹಾನಿಕಾರಕ ಅಂಶಗಳೂ ಸಹ ಈ ಕಾಯಿಲೆಗೆ ಕಾರಣವಾಗುತ್ತವೆ. ಉದಾಹರಣೆಗೆ, ಮಗುವಿನ ಪೋಷಕರಿಬ್ಬರೂ ಅಸ್ತಮಾ ಹೊಂದಿದ್ದರೆ ಮಗುವಿಗೆ ಕಾಯಿಲೆ ಬರುವ ಸಾಧ್ಯತೆ ಹೆಚ್ಚು. ಇದರೊಂದಿಗೆ ಕೆಲವು ದೈಹಿಕ ಕಾಯಿಲೆಗಳು, ಅಲರ್ಜಿ, ಸೋಂಕು ಮತ್ತು ಕೆಲವು ಔಷಧಿಗಳ ಅಡ್ಡ ಪರಿಣಾಮಗಳಿಂದಲೂ ಅಸ್ತಮಾ ಬಾಧಿಸಬಹುದು.