ಕೊಚ್ಚಿಯ ಅರಬ್ಬಿ ಸಮುದ್ರದಲ್ಲಿ ಕಾಣಿಸಿಕೊಂಡ ಚಿಕ್ಕ ದ್ವೀಪ!

ಕೇರಳದ ಕೊಚ್ಚಿ ಬಳಿಯ ಅರಬ್ಬಿ ಸಮುದ್ರದಲ್ಲಿ ದ್ವೀಪವೊಂದು ಕಾಣಿಸಿಕೊಂಡಿದ್ದು, ದಿಢೀರ್​ ಆಗಿ ಈ ಕಡಲತೀರ ಕಾಣಿಸಿಕೊಂಡಿದ್ದು ಅನೇಕ ಗೊಂದಲಗಳಿಗೆ ಕಾರಣವಾಗಿದೆ.

ಎರ್ನಾಕುಲಂ(ಕೇರಳ):ಕೇರಳದ ಕೊಚ್ಚಿ ಬಳಿಯ ಅರಬ್ಬಿ ಸಮುದ್ರದಲ್ಲಿ ಚಿಕ್ಕದಾದ ದ್ವೀಪವೊಂದು ಕಾಣಿಸಿಕೊಂಡಿದ್ದು, ಕೊಚ್ಚಿ ಬಂದರು ಗೇಟ್​ನಿಂದ ಪಶ್ಚಿಮಕ್ಕೆ 7 ಕಿಲೋ ಮೀಟರ್​ ದೂರದಲ್ಲಿ ಸುಮಾರು 8 ಕಿಲೋ ಮೀಟರ್​​ ಉದ್ದ ಹಾಗೂ 3.5 ಕಿ.ಮೀ ಅಗಲವಿದೆ ಎಂದು ತಿಳಿದು ಬಂದಿದೆ.

ಕೇರಳದ ಕೊಚ್ಚಿಯ ಕರಾವಳಿಯಿಂದ ಸ್ವಲ್ಪ ದೂರದಲ್ಲಿನ ಅರೇಬಿಯನ್​ ಸಮುದ್ರದಲ್ಲಿ ದಿಡೀರ್​ ಆಗಿ ಈ ದ್ವೀಪ ಕಂಡು ಬಂದಿರುವುದು ಅನೇಕ ಆಶ್ಚರ್ಯಗಳಿಗೆ ದಾರಿ ಮಾಡಿಕೊಟ್ಟಿದೆ. ಪ್ರಾಥಮಿಕ ಮಾಹಿತಿ ಪ್ರಕಾರ ಸಮುದ್ರದಲ್ಲೇ ರಚನೆಯಾಗಿದೆ ಎಂದು ಹೇಳಲಾಗುತ್ತಿದ್ದು, ಕೇರಳ ಮೀನುಗಾರಿಕೆ ಮತ್ತು ಸಾಗರ ಅಧ್ಯಯನ ವಿಶ್ವವಿದ್ಯಾಲಯದ ಅಧಿಕಾರಿಗಳು ಇದೀಗ ಹೆಚ್ಚಿನ ಸಂಶೋಧನೆ ಮಾಡಲು ಮುಂದಾಗಿದ್ದಾರೆ.

ಕೊಚ್ಚಿಯ ಅರಬ್ಬಿ ಸಮುದ್ರದಲ್ಲಿ ಕಾಣಿಸಿಕೊಂಡ ಚಿಕ್ಕ ದ್ವೀಪ

ಕಳೆದ ಕೆಲ ದಿನಗಳ ಹಿಂದೆ ಒಖೀ ಚಂಡಮಾರುತ ನಡೆದ ಬಳಿಕ ಈ ದ್ವೀಪ ಕಾಣಿಸಿಕೊಂಡಿದ್ದು, ಚೆಲ್ಲಮ್​​ ಕೃಷಿ ಪ್ರವಾಸೋದ್ಯಮ ಅಭಿವೃದ್ಧಿ ಇಲಾಖೆ ಇದರ ಬಗ್ಗೆ ಮೊದಲ ಮಾಹಿತಿ ನೀಡಿದೆ. ವಿಶೇಷವಾಗಿ ಗೂಗಲ್​ ಮ್ಯಾಪ್​ನಲ್ಲೂ ಈ ಕಡಲತೀರ ಕಾಣಿಸಿಕೊಳ್ಳುತ್ತಿದೆ. ಇದಕ್ಕೆ ಸಂಬಂಧಿಸಿದಂತೆ ಅಧ್ಯಯನ ನಡೆಸಲು ಈಗಾಗಲೇ ಕೇರಳ ಮೀನುಗಾರಿಕೆ ಮತ್ತು ಸಾಗರ ಅಧ್ಯಯನ ವಿಶ್ವವಿದ್ಯಾಲಯಕ್ಕೆ ತಿಳಿಸಲಾಗಿದೆ ಎಂದು ಈಟಿವಿ ಭಾರತಗೆ ಚೆಲ್ಲಮ್​ ಪ್ರವಾಸೋದ್ಯಮ ಇಲಾಖೆ ಅಧ್ಯಕ್ಷರು ತಿಳಿಸಿದ್ದಾರೆ.