ಪತಿಯ ಆಸ್ತಿ ವಿವರ ಕೋರಿ ಪತ್ನಿ ಆರ್​ಟಿಐ ಅರ್ಜಿ.. 15 ದಿನದಲ್ಲಿ ನೀಡಲು ಕೇಂದ್ರ ಮಾಹಿತಿ ಆಯೋಗ ಸೂಚನೆ

ಆರ್​ಟಿಐ ಕಾಯ್ದೆಯ ಅನುಕೂಲವನ್ನು ಹೇಗೆಲ್ಲಾ ಬಳಸಿಕೊಳ್ಳಬಹುದಾಗಿದೆ. ವಿಚ್ಛೇದನಕ್ಕೆ ಮುಂದಾಗಿರುವ ಪತ್ನಿಯೊಬ್ಬರು ತಮ್ಮ ಪತಿಯ ಆಸ್ತಿ ವಿವರ, ಆದಾಯದ ಬಗ್ಗೆ ಕಾಯ್ದೆಯಡಿ ಅರ್ಜಿ ಸಲ್ಲಿಸಿದ್ದಾರೆ. 15 ದಿನದಲ್ಲಿ ಮಾಹಿತಿ ಒದಗಿಸಲು ಕೇಂದ್ರ ಮಾಹಿತಿ ಆಯೋಗವೇ ಸೂಚಿಸಿದೆ.

ನವದೆಹಲಿ:ಪತಿಯ ಆದಾಯ ಎಷ್ಟು?, ಆಸ್ತಿಯ ವಿವರಗಳನ್ನು ಅವರು ಒಂದಾಗಿದ್ದಾಗ ತಿಳಿದುಕೊಳ್ಳುವುದು ಸಾಮಾನ್ಯ. ಆದರೆ, ಅವರಿಬ್ಬರು ಬೇರೆಯಾದಾಗ ಈ ಮಾಹಿತಿ ಪಡೆಯುವುದು ಹೇಗೆ?. ವಿಚ್ಛೇದನಕ್ಕೆ ಮುಂದಾದಾಗ ಭಾವನೆಗಳ ಜೊತೆಗೆ ಹಣಕಾಸಿನ ವಿಚಾರಗಳೂ ಮಹತ್ವ ಪಡೆಯುತ್ತವೆ. ಇಲ್ಲೊಬ್ಬ ಗೃಹಿಣಿ ತಮ್ಮ ಪತಿಯ ಆದಾಯವನ್ನು ತಿಳಿದುಕೊಳ್ಳಲು ಆರ್​ಟಿಐ ಹಕ್ಕನ್ನು ಬಳಸಿಕೊಂಡಿದ್ದಾರೆ.

ಸಂಜು ಗುಪ್ತಾ ಎಂಬುವರು ತನ್ನ ಗಂಡನಿಂದ ವಿಚ್ಛೇದನಕ್ಕೆ ಮುಂದಾಗಿದ್ದು, ಅವರು ತಮ್ಮ ಪತಿಯ ಆಸ್ತಿಯ ವಿವರ ತಿಳಿದುಕೊಳ್ಳಲು ಮಾಹಿತಿ ಹಕ್ಕು ಕಾಯ್ದೆಯಡಿ ಅರ್ಜಿ ಸಲ್ಲಿಸಿದ್ದಾರೆ. ಪತಿ ತಮ್ಮ ವೈಯಕ್ತಿಕ ವಿವರ ನೀಡಲು ನಿರಾಕರಿಸಿದ್ದರಿಂದ ಅಧಿಕಾರಿಗಳು ಸಂಜು ಗುಪ್ತಾರಿಗೆ ಮಾಹಿತಿ ನೀಡಿಲ್ಲ.

ಬಳಿಕ ಮಹಿಳೆ ಈ ಬಗ್ಗೆ ಎಫ್​ಎಎಗೆ(ಫಸ್ಟ್​ ಅಪಿಲೇಟ್​ ಅಥಾರಿಟಿ)ಗೆ ಮೇಲ್ಮನವಿ ಸಲ್ಲಿಸಿದ್ದಾರೆ. ಅರ್ಜಿ ಪರಿಶೀಲಿಸಿದ ಎಪ್​ಎಎ ಮಾಹಿತಿ ನೀಡಲಾಗಲ್ಲ ಎಂದಿದ್ದ ಅಧಿಕಾರಿಯ ನಿರ್ಣಯವನ್ನು ಎತ್ತಿ ಹಿಡಿದಿದೆ. ಇದರಿಂದ ಮಹಿಳೆ ನೇರವಾಗಿ ಕೇಂದ್ರ ಮಾಹಿತಿ ಆಯೋಗಕ್ಕೆ ಮೇಲ್ಮನವಿ ಸಲ್ಲಿಸಿದ್ದಾರೆ.

ಮಹಿಳೆ ಸಲ್ಲಿಸಿದ ಮೇಲ್ಮನವಿ ಅರ್ಜಿಯನ್ನು ವಿಚಾರಣೆ ನಡೆಸಿದ ಸಿಐಸಿ ತನ್ನ ಹಿಂದಿನ ಕೆಲವು ಆದೇಶಗಳು, ಸುಪ್ರೀಂಕೋರ್ಟ್ ಮತ್ತು ಹೈಕೋರ್ಟ್‌ಗಳ ತೀರ್ಪುಗಳನ್ನು ಪರಿಶೀಲನೆ ನಡೆಸಿತು. ಬಳಿಕ ಪತಿಯ ಆದಾಯದ ಮಾಹಿತಿ ಕೇಳಿದ ಪತ್ನಿಗೆ ಅರ್ಜಿ ಸಲ್ಲಿಸಿದ 15 ದಿನಗಳ ಒಳಗಾಗಿ ಮಾಹಿತಿ ನೀಡಬೇಕು ಎಂದು ತೆರಿಗೆ ಇಲಾಖೆಗೆ ನಿರ್ದೇಶಿಸಿದೆ.

ಮಾಹಿತಿ ಹಕ್ಕು ಪ್ರಕಾರ ಸರ್ಕಾರಿ ಸೇವೆಯಲ್ಲಿರುವವರಿಗೆ ಆಸ್ತಿ ಅಥವಾ ಆದಯಾದ ಮೂಲಗಳ ವಿವರವನ್ನು ಸಾರ್ವಜನಿಕರು ಕೇಳಬಹುದು. ಆದ್ರೆ ಇಲ್ಲಿ ಪತ್ನಿಯೇ ಪತಿಯ ಆಸ್ತಿಯ ಮಾಹಿತಿ ಕೇಳಿದ್ದಾರೆ. ಆವರಿಗೆ ವಿವರ ನೀಡಲು ಮಾಹಿತಿ ಹಕ್ಕು ಆಯೋಗವೇ ಸೂಚಿಸಿದೆ.

ಇತ್ತೀಚೆಗೆ ಕರ್ನಾಟಕದ ಕೋಲಾರ ಜಿಲ್ಲೆಯ ಆರ್​ಟಿಐ ಕಾರ್ಯಕರ್ತನೊಬ್ಬ ಅಧಿಕಾರಿಯ ವೈಯಕ್ತಿಕ ಮಾಹಿತಿಯನ್ನು ಕೇಳಿದ್ದಕ್ಕೆ ಆತನನ್ನು ಬಂಧಿಸಲಾಗಿದೆ.

ಓದ:ಎಷ್ಟು ಬಾರಿ ಮದುವೆ, ಸದ್ಯ ಯಾರೊಂದಿಗೆ ಸಂಸಾರ.. ಮಹಿಳಾ ಅಧಿಕಾರಿಗೆ ಮಾಹಿತಿ ಕೇಳಿದವನಿಗೆ ಸಂಕಷ್ಟ