ಹಬ್ಬದಂದೇ ದುರಂತ... ಬೆಂಕಿ ಹಚ್ಚಿಕೊಂಡ ಪತ್ನಿ, ಕಾಪಾಡಲು ಮುಂದಾದ ಪತಿಯೂ ಅಗ್ನಿಗಾಹುತಿ!

ಹಬ್ಬದ ದಿನದಂದೇ ದುರಂತ ಘಟನೆಯೊಂದು ಸಂಭವಿಸಿದ್ದು, ಬೆಂಕಿ ಹಚ್ಕೊಂಡು ಸಾಯಲು ಯತ್ನಿಸಿದ ಪತ್ನಿಯನ್ನು ಕಾಪಾಡಲು ತೆರಳಿದ ಪತಿಯೂ ಬೆಂಕಿಗಾಹುತಿಯಾಗಿ ಸಾವನ್ನಪ್ಪಿರುವ ಘಟನೆ ತೆಲಂಗಾಣದ ಸಂಗಾರೆಡ್ಡಿ ಜಿಲ್ಲೆಯಲ್ಲಿ ನಡೆದಿದೆ.

ಸಂಗಾರೆಡ್ಡಿ:ಹಬ್ಬದ ದಿನದಂದೇ ಬೆಂಕಿ ಹಚ್ಚಿಕೊಂಡು ಆತ್ಮಹತ್ಯೆಗೆ ಯತ್ನಿಸಿದ ಪತ್ನಿಯನ್ನು ಕಾಪಾಡಲು ತೆರಳಿದ ಪತಿಯೂ ಬೆಂಕಿಗಾಹುತಿಯಾಗಿರುವ ಘಟನೆ ಪುಲ್ಕಲ್​ ತಾಲೂಕಿನ ಲಿಂಗಂಪಲ್ಲಿಯಲ್ಲಿ ನಡೆದಿದೆ.

ಈ ಗ್ರಾಮದ ನಿವಾಸಿ ಎಲ್ಲೇಶ್​ ಮತ್ತು ಸುನೀತಾ ದಂಪತಿಗೆ ಮುದ್ದಾದ ಮಗು ಇದೆ. ದಂಪತಿ ಮಧ್ಯೆ ಆಗಾಗ್ಗೆ ಕೌಟುಂಬಿಕ ಕಲಹಗಳು ನಡೆಯುತ್ತಿದ್ದವು. ಆದ್ರೆ ಇಂದು ಇವರ ಜಗಳ ವಿಕೋಪಕ್ಕೆ ತಿರುಗಿದೆ. ಈ ವೇಳೆ ಪತ್ನಿ ಸುನೀತಾ ಹಿಂದೆ-ಮುಂದೆ ನೋಡದೆ ಮೈ-ಮೇಲೆ ಸೀಮೆಎಣ್ಣೆ ಸುರಿದುಕೊಂಡು ಬೆಂಕಿ ಹಚ್ಚಿಕೊಂಡಿದ್ದಾಳೆ. ಧಗ ಧಗನೇ ಬೆಂಕಿಯಿಂದ ಉರಿಯುತ್ತಿದ್ದುದನ್ನು ನೋಡಿದ ಎಲ್ಲೇಶ್​ ಪತ್ನಿಯನ್ನ ಕಾಪಾಡಲು ಮುಂದಾಗಿದ್ದಾನೆ. ಆದ್ರೆ ಆ ಬೆಂಕಿಯ ಕೆನ್ನಾಲಿಗೆ ಇಬ್ಬರಿಗೂ ಆವರಿಸಿದೆ. ಇದನ್ನು ನೋಡಿದ ಮಗಳು ಗಟ್ಟಿಯಾಗಿ ಕಿರುಚಿಕೊಂಡಿದ್ದಾಳೆ.

ಎಲ್ಲೇಶ್​ ಮತ್ತು ಸುನೀತಾ ದಂಪತಿ ಮನೆಯಿಂದ ಶಬ್ದ ಕೇಳಿದ ನೆರೆಹೊರೆಯವರು ಕೂಡಲೇ ಸ್ಥಳಕ್ಕೆ ದೌಡಾಯಿಸಿದ್ದಾರೆ. ಬೆಂಕಿಯಿಂದ ಸುಡುತ್ತಿದ್ದ ದಂಪತಿಯನ್ನು ರಕ್ಷಿಸಿ ಸಂಗಾರೆಡ್ಡಿ ಜಿಲ್ಲಾಸ್ಪತ್ರೆಗೆ ದಾಖಲಿಸಿದ್ದರು. ಆದ್ರೆ ಸುನೀತಾ ಚಿಕಿತ್ಸೆ ಫಲಿಸದೇ ಸಾವನ್ನಪ್ಪಿದ್ದಳು.

ಎಲ್ಲೇಶ್​ ಪರಿಸ್ಥಿತಿ ಗಂಭೀರವಾಗಿದ್ದರಿಂದ ಹೆಚ್ಚಿನ ಚಿಕಿತ್ಸೆಗಾಗಿ ಹೈದರಾಬಾದ್​ನ ಆಸ್ಪತ್ರೆಗೆ ದಾಖಲಿಸಲು ಪ್ರಯತ್ನಿಸುತ್ತಿದ್ದರು. ಆದ್ರೆ ಎಲ್ಲೇಶ್​ ಮಾರ್ಗ ಮಧ್ಯೆದಲ್ಲೇ ಮೃತಪಟ್ಟಿದ್ದಾನೆ. ಹಬ್ಬದ ದಿನದಂದೇ ಸಂತೋಷದಿಂದ ನಲಿದು ಆಟವಾಡ ಬೇಕಾಗಿದ್ದ ಮಗಳು ತಂದೆ-ತಾಯಿ ಕಳೆದುಕೊಂಡು ಅನಾಥವಾಗಿದ್ದಾಳೆ.

ಈ ಘಟನೆ ಕುರಿತು ಪೊಲೀಸ್​ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದ್ದು, ಪೊಲೀಸರು ಮುಂದಿನ ಕ್ರಮ ಕೈಗೊಂಡಿದ್ದಾರೆ.