ಕೋಲ್ಕತ್ತಾ: ಪಶ್ಚಿಮ ಬಂಗಾಳದ ಮುಖ್ಯಮಂತ್ರಿ ಮಮತಾ ಬ್ಯಾನರ್ಜಿ ಮತ್ತು ಶ್ರೀಲಂಕಾ ಅಧ್ಯಕ್ಷ ರಾನಿಲ್ ವಿಕ್ರಮಸಿಂಘೆ ಬುಧವಾರ ದುಬೈ ವಿಮಾನ ನಿಲ್ದಾಣದಲ್ಲಿ ಭೇಟಿಯಾಗಿದ್ದಾರೆ. ಈ ಸಂದರ್ಭದಲ್ಲಿ ರಾನಿಲ್ ವಿಕ್ರಮಸಿಂಘೆ ಅವರು ಮಮತಾ ಬ್ಯಾನರ್ಜಿಗೆ ಕುತೂಹಲಕರ ಪ್ರಶ್ನೆ ಕೇಳಿದರು. "ನೀವು ವಿರೋಧ ಪಕ್ಷದ ಮೈತ್ರಿ ಒಕ್ಕೂಟವಾದ ಇಂಡಿಯಾವನ್ನು ಮುನ್ನಡೆಸುವಿರಾ? ಎಂದಿದ್ದಾರೆ. ಇದಕ್ಕೆ ಮಮತಾ ನಗುತ್ತಾ ಪ್ರತಿಕ್ರಿಯಿಸಿ, "ಜನರು ನಮ್ಮನ್ನು ಬೆಂಬಲಿಸಿದರೆ ನಾವು ಆ ಸ್ಥಾನದಲ್ಲಿರಬಹುದು" ಎಂದರು.
ಮಮತಾ ಬ್ಯಾನರ್ಜಿ 12 ದಿನಗಳ ದುಬೈ ಮತ್ತು ಸ್ಪೇನ್ ದೇಶಗಳ ಅಧಿಕೃತ ಪ್ರವಾಸದಲ್ಲಿದ್ದಾರೆ. ದುಬೈ ವಿಮಾನ ನಿಲ್ದಾಣದ ಲಾಂಜ್‌ನಲ್ಲಿ ಬ್ಯಾನರ್ಜಿ ಅವರನ್ನು ರಾನಿಲ್ ವಿಕ್ರಮಸಿಂಘೆ ಗಮನಿಸಿದ್ದು, ಬನ್ನಿ ಮಾತಾಡೋಣ ಎಂದು ಕರೆದಿದ್ದರು. ಈ ಕುರಿತು ಸಿಎಂ ಬ್ಯಾನರ್ಜಿ, ಸಾಮಾಜಿಕ ಮಾಧ್ಯಮ 'ಎಕ್ಸ್‌' ಖಾತೆಯಲ್ಲಿ ಪೋಸ್ಟ್ ಹಾಕಿಕೊಂಡಿದ್ದಾರೆ. "ಶ್ರೀಲಂಕಾದ ಅಧ್ಯಕ್ಷ ರನಿಲ್ ವಿಕ್ರಮಸಿಂಘೆ ಅವರು ದುಬೈ ಅಂತರರಾಷ್ಟ್ರೀಯ ವಿಮಾನ ನಿಲ್ದಾಣದ ಲಾಂಜ್‌ನಲ್ಲಿ ನನ್ನನ್ನು ನೋಡಿ ಬನ್ನಿ ಮಾತನಾಡೋಣ ಎಂದು ಕರೆದರು. ಅವರ ಆಹ್ವಾನಕ್ಕೆ ನಾನು ಆಭಾರಿ" ಎಂದು ಸಂತಸ ವ್ಯಕ್ತಪಡಿಸಿದ್ದಾರೆ. ಈ ವೇಳೆ ಬ್ಯಾನರ್ಜಿ, ನವೆಂಬರ್ನಲ್ಲಿ ಕೋಲ್ಕತ್ತಾದಲ್ಲಿ ನಡೆಯಲಿರುವ ಬೆಂಗಾಲ್ ಗ್ಲೋಬಲ್ ಬ್ಯುಸಿನೆಸ್ ಶೃಂಗಸಭೆ-2023ಗೆ ಲಂಕಾ ಅಧ್ಯಕ್ಷರನ್ನು ಆಹ್ವಾನಿಸಿದ್ದಾರೆ. ಇದಕ್ಕೆ ಪ್ರತಿಯಾಗಿ ವಿಕ್ರಮಸಿಂಘೆ ಅವರು ಕೂಡಾ ಶ್ರೀಲಂಕಾಕ್ಕೆ ಮಮತಾ ಬ್ಯಾನರ್ಜಿಯನ್ನು ಆಹ್ವಾನಿಸಿದ್ದಾರೆ. ನಮ್ಮ ನಡುವಿನ ಸಂವಾದ ಆಹ್ಲಾದಕರವಾಗಿತ್ತು ಎಂದು ಬ್ಯಾನರ್ಜಿ ಹರ್ಷ ವ್ಯಕ್ತಪಡಿಸಿದ್ದಾರೆ.