ನವದೆಹಲಿ:"ಮಹಿಳೆಗೆ ಮಗು ಬೇಡವಾದಲ್ಲಿ 26 ವಾರಗಳ ಸಮಯದಲ್ಲಿ ಗರ್ಭಪಾತ ಮಾಡಿಸಿಕೊಳ್ಳಲು ಅವಕಾಶವಿದ್ದರೂ, ಹುಟ್ಟುವ ಮಗುವಿನ ಹಕ್ಕನ್ನು ನಾವು ಕಸಿದಂತಾಗುತ್ತದೆ. ಕಾನೂನಿನ ಮೂಲಕ ನಾವು ಜನಿಸಬೇಕಿರುವ ಮಗುವಿನ ಹಕ್ಕುಗಳನ್ನು ಹರಣ ಮಾಡಲು ಸಾಧ್ಯವಿಲ್ಲ" ಎಂದು ಸುಪ್ರೀಂ ಕೋರ್ಟ್ ಗುರುವಾರ ಹೇಳಿದೆ.
ಮಹಿಳೆಯೊಬ್ಬರು ತನಗೆ ಮೂರನೇ ಮಗು ಬೇಡವಾಗಿದ್ದು, 26 ವಾರಗಳ ಗರ್ಭಪಾತಕ್ಕೆ ಅನುಮತಿ ನೀಡಬೇಕು ಎಂದು ಕೋರಿ ಸಲ್ಲಿಸಿದ್ದ ಅರ್ಜಿಯ ವಿಚಾರಣೆಯ ವೇಳೆ ಕೋರ್ಟ್ ಈ ಅಭಿಪ್ರಾಯ ವ್ಯಕ್ತಪಡಿಸಿದೆ. "ಇಲ್ಲಿ ಮಗು ಮತ್ತು ಮಹಿಳೆಯ ಹಕ್ಕುಗಳೆರಡೂ ಅಡಗಿವೆ. ಹೀಗಾಗಿ ಅಷ್ಟು ಸುಲಭವಾಗಿ ಆದೇಶ ನೀಡಲು ಸಾಧ್ಯವಿಲ್ಲ. ಯಾವುದೇ ಸಮಸ್ಯೆಯಿಲ್ಲದೇ ಮಗುವಿಗೆ ಜನ್ಮ ನೀಡಲು ಸಾಧ್ಯವೇ ಎಂಬುದನ್ನು ಮತ್ತೊಮ್ಮೆ ಯೋಚಿಸಿ" ಎಂದು ಮುಖ್ಯ ನ್ಯಾಯಮೂರ್ತಿ ಡಿ.ವೈ.ಚಂದ್ರಚೂಡ್ ನೇತೃತ್ವದ ನ್ಯಾಯಮೂರ್ತಿಗಳಾದ ಜೆ.ಬಿ.ಪರ್ದಿವಾಲಾ ಮತ್ತು ಮನೋಜ್ ಮಿಶ್ರಾ ಅವರನ್ನೊಳಗೊಂಡ ಪೀಠವು ಅರ್ಜಿದಾರರಿಗೆ ಸಲಹೆ ನೀಡಿದೆ.
ವಿಚಾರಣೆಯ ಹಂತ ಹೀಗಿತ್ತು..:26 ವಾರಗಳ ಗರ್ಭಪಾತದ ಕುರಿತು ಬುಧವಾರ ನಡೆದ ವಿಚಾರಣೆಯಲ್ಲಿ ನ್ಯಾಯಮೂರ್ತಿಗಳಿಬ್ಬರು ಭಿನ್ನ ತೀರ್ಪು ನೀಡಿದ್ದರಿಂದ ಪ್ರಕರಣ ವಿಸ್ತೃತ ಪೀಠಕ್ಕೆ ಬಂದಿತ್ತು. ಇಂದು ನಡೆದ ವಿಚಾರಣೆಯಲ್ಲಿ ಮಹಿಳೆಯ ಜೊತೆಗೆ ಮಗುವಿನ ಹಕ್ಕೂ ಮುಖ್ಯವಾಗಿದೆ ಎಂದು ಕೋರ್ಟ್ ಹೇಳಿತು. ಆದರೆ, 29 ವಾರಗಳ ಗರ್ಭಪಾತಕ್ಕೂ ಕೋರ್ಟ್ಗಳು ಅವಕಾಶ ನೀಡಿವೆ ಎಂದು ಅರ್ಜಿದಾರೆ ಪರವಾಗಿ ವಕೀಲರು ವಾದಿಸಿದರು.