ಎಲೆಕ್ಟ್ರಿಕ್​ ವಾಹನಗಳ ಬೆಂಕಿ ನಂದಿಸಲು ನೀರಿನ ಬದಲು ಎಬಿಸಿ ಪುಡಿ ಬಳಸಿ ; ತಜ್ಞರ ಸಲಹೆ

ತಜ್ಞರು ಹೇಳುವಂತೆ ಎಲೆಕ್ಟ್ರಿಕ್​ ವಾಹನಗಳಲ್ಲಿ ಬೆಂಕಿ ಕಾಣಿಸಿದಾಗ ಯಾವುದೇ ಕಾರಣಕ್ಕೂ ನೀರನ್ನು ಸಿಂಪಡಿಸಬಾರದು. ಅದರ ಬದಲಾಗಿ ಎಬಿಸಿ ಪೌಡರ್​ ಅಥವಾ ಒಣ ಮರಳನ್ನು ಬೆಂಕಿ ನಂದಿಸಲು ಅದರ ಮೇಲೆ ಎಸೆಯಬಹುದು ಎಂದು ಹೇಳುತ್ತಾರೆ..

ಹೈದರಾಬಾದ್ :ತಮಿಳುನಾಡಿನ ಹೊಸೂರು ಪ್ರದೇಶದಲ್ಲಿ ಎಲೆಕ್ಟ್ರಿಕ್ ಬೈಕ್‌ಗೆ ಇದ್ದಕ್ಕಿದ್ದಂತೆ ಬೆಂಕಿ ಹೊತ್ತಿಕೊಂಡಿದ್ದು, ಬೈಕ್ ಮಾಲೀಕ ಹಾಗೂ ಸ್ಥಳೀಯರು ಬೆಂಕಿ ನಂದಿಸಲು ಯತ್ನಿಸಿದ್ದಾರೆ. ಆರಂಭದಲ್ಲಿ ಬೆಂಕಿ ತಗ್ಗಿದರೂ ಕೆಲವೇ ನಿಮಿಷಗಳಲ್ಲಿ ಭಾರೀ ಸದ್ದಿನೊಂದಿಗೆ ಬೈಕ್​ ಸ್ಫೋಟಗೊಂಡಿದೆ. ಅಂತಹ ಸಂದರ್ಭದಲ್ಲಿ ನೀರು ಹಾಕುವುದು ಸಾಮಾನ್ಯವಾಗಿ ಬೆಂಕಿ ನಂದಿಸಲು ಸಹಕರಿಸುತ್ತದೆ. ಆದರೆ, ಇಲ್ಲಿ ವಾಹನ ಸ್ಪೋಟಗೊಂಡು ಸುಟ್ಟು ಕರಕಲಾದ ದೃಶ್ಯ ನೋಡುಗರನ್ನು ಬೆಚ್ಚಿಬೀಳಿಸಿತ್ತು.

ನೀರನ್ನು ಬಳಸಲೇಬೇಡಿ :ಈ ಘಟನೆ ಜನರಲ್ಲಿ ಎಲೆಕ್ಟ್ರಿಕ್ ವಾಹನದಲ್ಲಿ ಬೆಂಕಿ ಕಾಣಿಸಿಕೊಂಡಾಗ ಅದನ್ನು ನಂದಿಸುವುದು ಹೇಗೆ ಎಂಬ ಚರ್ಚೆಯನ್ನು ಹುಟ್ಟು ಹಾಕಿದೆ. ತಜ್ಞರು ಎಲೆಕ್ಟ್ರಿಕ್ ವಾಹನಗಳಲ್ಲಿ ಬೆಂಕಿ ಕಂಡಾಗ ಅದನ್ನು ನಂದಿಸಲು ಯಾವುದೇ ಸಂದರ್ಭದಲ್ಲೂ ನೀರನ್ನು ಬಳಸಬಾರದು ಎಂದು ಎಚ್ಚರಿಸಿದ್ದಾರೆ. ನೀರು ಸಿಂಪಡಿಸುವಾಗ ಇವಿಗಳ ಬ್ಯಾಟರಿಗಳಲ್ಲಿ ಉಂಟಾಗುವ ರಾಸಾಯನಿಕ ಕ್ರಿಯೆ ಅಪಘಾತದ ತೀವ್ರತೆಯನ್ನು ಇನ್ನಷ್ಟು ಹೆಚ್ಚಿಸುವ ಸಾಧ್ಯತೆ ಇದೆ ಎಂಬುದನ್ನು ಅವರು ವಿಶ್ಲೇಷಿಸುತ್ತಾರೆ.

ಎಲೆಕ್ಟ್ರಿಕ್ ಕಾರುಗಳು ಮತ್ತು ಬೈಕುಗಳು ಸಾಮಾನ್ಯವಾಗಿ ಲಿಥಿಯಂ-ಐಯಾನ್ ಬ್ಯಾಟರಿಗಳಿಂದ ಚಲಿಸುತ್ತವೆ. ಕೆಲವೊಂದು ಬಾರಿ ಉತ್ಪಾದನಾ ದೋಷಗಳು ಮತ್ತು ದೋಷಯುಕ್ತ ಪ್ಯಾಕೇಜಿಂಗ್, ಬ್ಯಾಟರಿಯ ಅಧಿಕ ತಾಪಕ್ಕೆ ಕಾರಣವಾಗುತ್ತದೆ.

ಎಬಿಸಿ ಪೌಡರ್​ ಬಳಕೆ ಉತ್ತಮ : ಎಲೆಕ್ಟ್ರಿಕ್​ ವಾಹನಗಳ (EV) ಬ್ಯಾಟರಿಗಳಲ್ಲಿನ ಸಾವಯವ-ಆಧಾರಿತ ವಿದ್ಯುದ್ವಿಚ್ಛೇದ್ಯಗಳು ಆಂತರಿಕ ರಾಸಾಯನಿಕ ಕ್ರಿಯೆಗಳಿಂದಲೂ ಬೆಂಕಿ ಕಾಣಿಸಿಕೊಳ್ಳಲು ಕಾರಣವಾಗಬಹುದು. ಯಾವಾಗ ಅದು ನೀರಿನೊಂದಿಗೆ ಬೆರೆಯುತ್ತದೆಯೋ ಆಗ ಹೈಡ್ರೋಜನ್ ಅನಿಲ ಮತ್ತು ಲಿಥಿಯಂ ಹೈಡ್ರಾಕ್ಸೈಡ್ ಉತ್ಪತ್ತಿಯಾಗುತ್ತದೆ. ಹೈಡ್ರೋಜನ್ ಅನಿಲದ ಸುಡುವ ಸ್ವಭಾವದಿಂದಾಗಿ, ವಾಹನವು ಸ್ಫೋಟಗೊಳ್ಳಬಹುದು.

EVಗಳಲ್ಲಿ ಬೆಂಕಿಯನ್ನು ನಂದಿಸಲು ABC ಪೌಡರ್ ಅನ್ನು ಮಾತ್ರ ಬಳಸಬೇಕು ಎಂದು EV ತಜ್ಞರು ಹೇಳುತ್ತಾರೆ. EV ಬ್ಯಾಟರಿಯ ಮೇಲೆ ABC ಪೌಡರ್ ಸಿಂಪಡಿಸಿದಾಗ ಅದು ಒಂದು ಪದರವನ್ನು ರೂಪಿಸುತ್ತದೆ, ಇದು ಹೆಚ್ಚಿನ ಹಾನಿಯನ್ನು ತಡೆಯುತ್ತದೆ. ಪ್ರಸ್ತುತ ನಗರದ ವಿವಿಧ ಭಾಗಗಳಲ್ಲಿ, ಮುಖ್ಯವಾಗಿ ರಾಣಿಗಂಜ್ ಪ್ರದೇಶದಲ್ಲಿ ಈ ಪುಡಿಯನ್ನು ಮಾರಾಟ ಮಾಡಲಾಗುತ್ತಿದೆ. ಇದು ಇ-ಕಾಮರ್ಸ್ ಸೈಟ್‌ಗಳಲ್ಲಿಯೂ ಲಭ್ಯವಿದೆ.

ಇದು ವಾಣಿಜ್ಯ ಕಟ್ಟಡಗಳು ಮತ್ತು ಕಚೇರಿಗಳ ಗೋಡೆಗಳ ಮೇಲೆ ಕಂಡು ಬರುವ ಪೋರ್ಟಬಲ್ ಫೈರ್ ಸಿಲಿಂಡರ್​ಗಳನ್ನು ಹೋಲುತ್ತದೆ. ಮೊನೊ ಅಮೋನಿಯಂ ಫಾಸ್ಫೇಟ್​ನೊಂದಿಗೆ ಬೆರೆಸಿರುವ ಈ ಪುಡಿ ಸಾಮಾನ್ಯವಾಗಿ ಮಸುಕಾದ ಹಳದಿ ಬಣ್ಣದಲ್ಲಿರುತ್ತದೆ. ಎರಡು ಕೆಜಿ ಪುಡಿಗೆ 1000 ರೂ.ನಿಂದ ಬೆಲೆ ಪ್ರಾರಂಭವಾಗುತ್ತದೆ.

ವಿದ್ಯುತ್ ವಾಹನಗಳಲ್ಲಿ ಬೆಂಕಿ ಹೊತ್ತಿಕೊಂಡಿರುವುದನ್ನು ಇಲಾಖೆ ಇನ್ನೂ ವಿಶ್ಲೇಷಿಸಿಲ್ಲ. ಆದರೆ, ಎಲೆಕ್ಟ್ರಿಕ್​ ವಾಹನಗಳಲ್ಲಿನ ಬೆಂಕಿ ನಂದಿಸಲು ನೀರನ್ನು ಬಳಸಬಾರದು. ಬದಲಾಗಿ ಎಬಿಸಿ ಪುಡಿಯನ್ನು ಬಳಸಬಹುದು. ಒಂದು ವೇಳೆ ಎಬಿಸಿ ಪುಡಿ ಲಭ್ಯವಿಲ್ಲದಿದ್ದರೆ ಒಣ ಮರಳನ್ನು ಬೆಂಕಿಯ ಮೇಲೆ ಎಸೆಯಬಹುದು. ಆದರೆ, ಒದ್ದೆಯಾದ ಮರಳನ್ನು ಬಳಸಬಾರದು ಎಂದು ಹೈದರಾಬಾದ್​ನ ಜಿಲ್ಲಾ ಅಗ್ನಿ ಶಾಮಕದಳ ಅಧಿಕಾರಿ ಶ್ರೀನಿವಾಸ ರೆಡ್ಡಿ ಹೇಳುತ್ತಾರೆ.

ಎಲೆಕ್ಟ್ರಿಕ್​ ವಾಹನಗಳಲ್ಲಿ ಬೆಂಕಿಯನ್ನು ನಂದಿಸಲು ನೀರನ್ನು ಬಳಸುವುದು ಅಪಾಯಕಾರಿ. ಆಂತರಿಕ ರಾಸಾಯನಿಕ ಕ್ರಿಯೆಗಳಿಂದ ವಾಹನವು ಸ್ಫೋಟಗೊಳ್ಳಬಹುದು. ಸದ್ಯಕ್ಕೆ ಎಬಿಸಿ ಪೌಡರ್ ಬಳಸುವುದೊಂದೇ ಪರಿಹಾರ ಎಂದು ರೇಸ್ ಎನರ್ಜಿಯ ಸಿಇಒ ಅರುಣ್ ಶ್ರೇಯಸ್ ಅಭಿಪ್ರಾಯಪಟ್ಟಿದ್ದಾರೆ.

ಇದನ್ನೂ ಓದಿ:ಎಲೆಕ್ಟ್ರಿಕ್ ಬೈಕ್​ಗಳಲ್ಲಿ ಬೆಂಕಿ ಅವಘಡಗಳ ಬಗ್ಗೆ ಕೇಂದ್ರ ಸಾರಿಗೆ ಕಾರ್ಯದರ್ಶಿ ಹೇಳಿದ್ದೇನು?