ಅವಳಿ ಗಂಡು ಮಕ್ಕಳ ತಂದೆಯಾದ ಉಸೇನ್​ ಬೋಲ್ಟ್​.. ಈ ರೀತಿ ನಾಮಕರಣ!

ಅವಳಿ ಮಕ್ಕಳ ತಂದೆಯಾಗಿರುವ 34 ವರ್ಷದ ಉಸೇನ್​ ಬೋಲ್ಟ್​ ಇನ್​ಸ್ಟಾಗ್ರಾಮ್​ನಲ್ಲಿ ಫೋಟೋ ಶೇರ್​ ಮಾಡುವ ಮೂಲಕ ಮಾಹಿತಿ ಹಂಚಿಕೊಂಡಿದ್ದಾರೆ.

ಹೈದರಾಬಾದ್​​: ವಿಶ್ವದ ವೇಗದ ಓಟಗಾರ ಉಸೇನ್​ ಬೋಲ್ಟ್​​ ಅವಳಿ ಮಕ್ಕಳ ತಂದೆಯಾಗಿದ್ದಾರೆ. ಇದಕ್ಕೆ ಸಂಬಂಧಿಸಿದ ಮಾಹಿತಿಯನ್ನ ಇನ್​​ಸ್ಟಾಗ್ರಾಮ್​ನಲ್ಲಿ ಫೋಟೋ ಶೇರ್ ಮಾಡಿಕೊಳ್ಳುವುದರ ಮೂಲಕ ಹೊರಹಾಕಿದ್ದಾರೆ.

ವಿಶ್ವ ಅಪ್ಪಂದಿರ ದಿನವಾದ ನಿನ್ನೆ ಈ ಫೋಟೋ ಹಂಚಿಕೊಂಡಿರುವ ಉಸೇನ್​ ಬೋಲ್ಟ್​, ಮಕ್ಕಳಿಗೂ ವಿಚಿತ್ರವಾಗಿ ನಾಮಕರಣ ಮಾಡಿದ್ದಾರೆ. ನವಜಾತ ಶಿಶುಗಳಿಗೆ ಥಂಡರ್​ ಬೋಲ್ಟ್​ ಮತ್ತು ಸೇಂಟ್​ ಲಿಯೋ ಬೋಲ್ಟ್​​ ಎಂದು ಹೆಸರಿಡಲಾಗಿದೆ. ಉಸೇನ್​ ಬೋಲ್ಟ್​ಗೆ ಈಗಾಗಲೇ ಹೆಣ್ಣು ಮಗುವಿದ್ದು, 2019ರಲ್ಲಿ ಜನಿಸಿದೆ. ಮಗುವಿಗೆ ಒಲಿಂಪಿಯಾ ಎಂದು ಹೆಸರಿಟ್ಟಿದ್ದಾರೆ.

ವಿಶ್ವದ ವೇಗದ ಓಟಗಾರನಾಗಿರುವ ಉಸೇನ್​ ಬೋಲ್ಟ್​ 2008, 2012, 2016ರ ಒಲಿಂಪಿಕ್​ ಕ್ರೀಡಾಕೂಟಗಳಲ್ಲಿ 100 ಹಾಗೂ 200 ಮೀಟರ್ ಓಟದಲ್ಲಿ ಚಿನ್ನದ ಪದಕ ಗೆದ್ದಿದ್ದಾರೆ. 2019ರಲ್ಲಿ ಅವರು ಕ್ರೀಡೆಗೆ ನಿವೃತ್ತಿ ಘೋಷಣೆ ಮಾಡಿದ್ದಾರೆ. ತನ್ನ ವೃತ್ತಿ ಜೀವನದ ವೇಳೆ ಬೋಲ್ಟ್​ ಒಟ್ಟು 23 ಚಿನ್ನದ ಪದಕ ಗೆದ್ದಿದ್ದು, ಯಾರು ಸಹ ನಿರ್ಮಾಣ ಮಾಡದಂತಹ ದಾಖಲೆ ಬರೆದಿದ್ದಾರೆ.