ತಂದೆ ಕೈಗಾಡಿಯಲ್ಲಿ ಚಾಟ್ ಮಾರಾಟ: ಯುಪಿಎಸ್​​​ಸಿಯಲ್ಲಿ 93ನೇ ರ‍್ಯಾಂಕ್ ಪಡೆದ ಮಗಳು

ಕಡುಬಡತನದ ಮಧ್ಯೆ ಕೂಡ ಯುವತಿಯೊಬ್ಬಳು ಯುಪಿಎಸ್​​ಸಿ ಪರೀಕ್ಷೆ ಪಾಸ್ ಮಾಡುವಲ್ಲಿ ಯಶಸ್ವಿಯಾಗಿದ್ದು, 93ನೇ ರ‍್ಯಾಂಕ್ ಪಡೆದುಕೊಂಡು ಇದೀಗ ಐಎಎಸ್​ ಆಗಲು ಸಜ್ಜಾಗಿದ್ದಾರೆ.

ಭರತ್​​ಪುರ್​(ರಾಜಸ್ಥಾನ):ಕಳೆದ ಕೆಲ ದಿನಗಳ ಹಿಂದೆ ಪ್ರಕಟಗೊಂಡಿರುವ ಲೋಕಸೇವಾ ಆಯೋಗದ ಪರೀಕ್ಷೆಯಲ್ಲಿ ಅನೇಕ ತೆರೆ ಮರೆಯ ಪ್ರತಿಭೆಗಳು ಪಾಸ್ ಆಗುವ ಮೂಲಕ ಜನಪ್ರಿಯರಾಗಿದ್ದಾರೆ. ಅದರಲ್ಲಿ ರಾಜಸ್ಥಾನದ ಭರತ್​ಪುರ ಜಿಲ್ಲೆಯ ದೀಪೇಶ್ ಕುಮಾರಿ ಕೂಡ ಒಬ್ಬರು. ಇವರ ತಂದೆ ಬೀದಿ ಬದಿ ಕೈಗಾಡಿಯಲ್ಲಿ ಚಾಟ್ ಮಾರುವ ಕೆಲಸ ಮಾಡ್ತಿದ್ದು, ಕಡು ಬಡತನದ ಮಧ್ಯೆ ಕೂಡ ಮಗಳು ಅತ್ಯದ್ಭುತ ಸಾಧನೆ ಮಾಡಿದ್ದಾರೆ. ಯುಪಿಎಸ್​​ಸಿಯಲ್ಲಿ 93ನೇ ರ‍್ಯಾಂಕ್‌ ಪಡೆದುಕೊಳ್ಳುವಲ್ಲಿ ದೀಪೇಶ್ ಕುಮಾರಿ ಯಶಸ್ವಿಯಾಗಿದ್ದು, ಕುಟುಂಬದ ಜೊತೆಗೆ ಜಿಲ್ಲೆಯ ಹೆಸರು ಉಜ್ವಲಗೊಳಿಸಿದ್ದಾರೆ.

ದೀಪೇಶ್ ಕುಮಾರಿ ತಂದೆ ಗೋವಿಂದ್ ಪ್ರಸಾದ್​ ಬೀದಿ ಬದಿ ತಿಂಡಿ ಮಾರಾಟ ಮಾಡುವ ಮೂಲಕ ಕುಟುಂಬ ನಿರ್ವಹಿಸುತ್ತಿದ್ದಾರೆ. ಕಡು ಬಡತನದ ಮಧ್ಯೆ ಕೂಡ ತಮ್ಮ ಮಕ್ಕಳಿಗೆ ಸಾಕಷ್ಟು ಶಿಕ್ಷಣ ಕೊಡಿಸಿದ್ದಾರೆ. ಇದೀಗ ಹಿರಿಯ ಮಗಳು ದೀಪೇಶ್ ಕುಮಾರಿ ಐಎಎಸ್​ ಅಗುವುದು ಖಚಿತವಾಗಿದ್ದು, ಉಳಿದ ಓರ್ವ ತಂಗಿ ಹಾಗೂ ಇಬ್ಬರು ಸಹೋದರರು ಎಂಬಿಬಿಎಸ್ ಮಾಡ್ತಿದ್ದಾರೆ. ಮಗಳು ಯುಪಿಎಸ್​​ಸಿ ಪರೀಕ್ಷೆ ಪಾಸ್ ಮಾಡಿರುವ ನಂತರ ಸಹ ಗೋವಿಂದ್ ಕೈಗಾಡಿಯಲ್ಲಿ ಚಾಟ್ ಮಾರಾಟ ಮಾಡ್ತಿದ್ದಾರೆ.

ತಂದೆ ಕೈಗಾಡಿಯಲ್ಲಿ ಚಾಟ್ ಮಾರಾಟ

ಕಡು ಬಡತನದ ಮಧ್ಯೆ ತಂದೆ ಉತ್ತಮ ಶಿಕ್ಷಣ ಕೊಡಿಸಿದ್ದರಿಂದ ಇದೀಗ ಇಂತಹ ಪರೀಕ್ಷೆ ಪಾಸ್ ಮಾಡಲು ಸಾಧ್ಯವಾಯಿತು. ಜೊತೆಗೆ ವಿದ್ಯಾರ್ಥಿ ವೇತನ ಪಡೆದುಕೊಂಡು ಅಧ್ಯಯನ ಮಾಡಿದ್ದೇನೆಂದು ದೀಪೇಶ್ ಕುಮಾರಿ ಹೇಳಿಕೊಂಡಿದ್ದಾರೆ. 12ನೇ ತರಗತಿವರೆಗೆ ಭರತ್​ಪುರ ಖಾಸಗಿ ಶಾಲೆವೊಂದರಲ್ಲಿ ವ್ಯಾಸಂಗ ಮಾಡಿರುವ ದೀಪೇಶ್​, ತದನಂತರ ಜೋಧ್​ಪುರದ ಬಿಟೆಕ್​ ಸಿವಿಲ್​ನಲ್ಲಿ ಪದವಿ ಪಡೆದುಕೊಂಡಿದ್ದಾರೆ.

ಬಿಟೆಕ್​ ಮುಗಿಸಿದ ಬಳಿಕ ಮುಂಬೈನ ಐಐಟಿಯಲ್ಲಿ ಎಂಟೆಕ್​ ಮುಗಿಸಿ, ಖಾಸಗಿ ಕಂಪನಿಯಲ್ಲಿ ಒಂದು ವರ್ಷ ಕೆಲಸ ಮಾಡಿದ್ದಾರೆ. 2019ರಿಂದಲೂ ಯುಪಿಎಸ್​​ಸಿ ಪರೀಕ್ಷೆಗೆ ತಯಾರಿ ನಡೆಸಿದ್ದ ಅವರು, ಮೊದಲ ಪರೀಕ್ಷೆಯಲ್ಲಿ ಸಂದರ್ಶನದ ವೇಳೆ ಫೇಲ್​ ಆಗಿದ್ದರು. ಆದರೆ, ಎರಡನೇ ಪ್ರಯತ್ನದಲ್ಲಿ ತೇರ್ಗಡೆಯಾಗಿ 93ನೇ ಸ್ಥಾನ ಗಿಟ್ಟಿಸಿಕೊಂಡಿದ್ದಾರೆ.

ದೀಪೇಶ್ ಕುಮಾರಿ ಯುಪಿಎಸ್​ಸಿ ಪಾಸ್​ ಆಗಿರುವ ವಿಷಯ ಗೊತ್ತಾಗುತ್ತಿದ್ದಂತೆ ಭರತ್​ಪುರದಲ್ಲಿ ಸಂಭ್ರಮ ಮನೆ ಮಾಡಿದ್ದು, ಅವರಿಗೆ ಅದ್ಧೂರಿಯಾಗಿ ಸ್ವಾಗತಿಸಿಲಾಗಿದೆ. ಜಿಲ್ಲಾಧಿಕಾರಿ ಅಲೋಕ್ ರಂಜನ್ ಕೂಡ ದೀಪೇಶ್ ಕುಮಾರಿ ಅವರನ್ನು ಭೇಟಿ ಮಾಡಿ ಶುಭ ಹಾರೈಸಿದರು.