ಸೈಕಲ್​ ಮೇಲೆ ಬಟ್ಟೆ ಮಾರುವವನ ಮಗ UPSC ಪಾಸ್​​.. 45ನೇ ರ್‍ಯಾಂಕ್​​ ಪಡೆದ ಅನಿಲ್​!

ಸೈಕಲ್​ ಮೇಲೆ ಹಳ್ಳಿ ಹಳ್ಳಿಗೆ ತೆರಳಿ ಬಟ್ಟೆ ವ್ಯಾಪಾರ ಮಾಡುತ್ತಿದ್ದ ವ್ಯಕ್ತಿಯೊಬ್ಬನ ಮಗ 2020ನೇ ಸಾಲಿನ UPSC ಪರೀಕ್ಷೆ ಪಾಸ್​ ಮಾಡಿದ್ದು, 45ನೇ ರ್‍ಯಾಂಕ್ ಪಡೆದುಕೊಂಡಿದ್ದಾರೆ.

ಪಾಟ್ನಾ(ಬಿಹಾರ): 2020ನೇ ಸಾಲಿನ ಯುಪಿಎಸ್​​ಸಿ ಅಂತಿಮ ಫಲಿತಾಂಶ ಪ್ರಕಟಗೊಂಡಿದ್ದು, ಅನೇಕ ಪ್ರತಿಭೆಗಳು ಪಾಸ್​​ ಆಗಿದ್ದು, ಇದೀಗ ಕೇಂದ್ರದ ವಿವಿಧ ಇಲಾಖೆಗಳಲ್ಲಿ ಹುದ್ದೆ ಅಲಂಕರಿಸಲು ಸಜ್ಜುಗೊಂಡಿದ್ದಾರೆ. ನಿನ್ನೆ ಪ್ರಕಟಗೊಂಡಿರುವ ಫೈನಲ್​​ ರಿಸಲ್ಟ್​ನ ಲಿಸ್ಟ್​​ನಲ್ಲಿ ಸೈಕಲ್​ ಮೇಲೆ ಬಟ್ಟೆ ಮಾರಾಟ ಮಾಡುತ್ತಿದ್ದ ವ್ಯಕ್ತಿಯೊಬ್ಬನ ಮಗನು ಸೇರಿಕೊಂಡಿದ್ದಾನೆ.

ಕಿಶನ್​ಗಂಜ್​​ನಗರದ ಕಾಲೋನಿವೊಂದರಲ್ಲಿ ವಾಸವಾಗಿರುವ ಅನಿಲ್​ ಬೋಸಾಕ್​ ಇದೀಗ ಯುಪಿಎಸ್​​ಸಿ ಫೈನಲ್​ ಫಲಿತಾಂಶದಲ್ಲಿ 45ನೇ ಸ್ಥಾನ ಪಡೆದುಕೊಂಡಿದ್ದು, ಡಿಸಿ ಆಗುವ ತವಕದಲ್ಲಿದ್ದಾರೆ. 2019ರಲ್ಲಿನ UPSC ಪರೀಕ್ಷೆಯಲ್ಲಿ 616ನೇ ಸ್ಥಾನ ಪಡೆದುಕೊಂಡಿದ್ದ ಅನಿಲ್​, ಇದರಿಂದ ತೃಪ್ತರಾಗಿರಲಿಲ್ಲ.

2020ನೇ ಸಾಲಿನ ಪರೀಕ್ಷೆಯಲ್ಲಿ ಮತ್ತೊಮ್ಮೆ ಭಾಗಿಯಾಗಿ, ತೇರ್ಗಡೆಯಾಗಿದ್ದು, 45ನೇ ಸ್ಥಾನಗಳಿಸಿದ್ದಾರೆ. ಅನಿಲ್​ ಅವರ ತಂದೆ ಸಂಜಯ್​ ಬೋಸಾಕ್​​ ಸೈಕಲ್​ ಮೇಲೆ ಹಳ್ಳಿ ಹಳ್ಳಿಗೆ ತೆರಳಿ ಬಟ್ಟೆ ಮಾರಾಟ ಮಾಡುತ್ತಿದ್ದರು. ನಾಲ್ವರು ಸಹೋದರರಲ್ಲಿ ಅನಿಲ್​ ಎರಡನೇಯವನಾಗಿದ್ದು, 2014ರಲ್ಲಿ ಐಐಟಿ ದೆಹಲಿಯಲ್ಲಿ ಸಿವಿಲ್​ ಇಂಜಿನಿಯರಿಂಗ್​ ಪಡೆದುಕೊಂಡಿದ್ದಾರೆ.

8ನೇ ತರಗತಿವರೆಗೆ ಕಿಶನ್​ಗಂಜ್​​ನ ಶಾಲೆಯಲ್ಲಿ ಓದಿದ್ದ ಅನಿಲ್​, 2011ರಲ್ಲಿ ಪಬ್ಲಿಕ್​ ಸ್ಕೂಲ್​ನಿಂದ ಮೆಟ್ರಿಕ್ಯುಲೇಷನ್​, ತದನಂತರ ಮಾಧ್ಯಮಿಕ ಶಾಲೆ ಕಿಶನ್​ಗಂಜ್​ನಿಂದ 12ನೇ ತರಗತಿ ವ್ಯಾಸಂಗ ಮಾಡಿದ್ದರು. ಆರ್ಥಿಕ ಸಂಕಷ್ಟದ ಹೊರತಾಗಿ ಕೂಡ ಮಗನಿಗೆ ಉತ್ತಮ ಶಿಕ್ಷಣ ನೀಡುವಲ್ಲಿ ಕುಟುಂಬ ಹಿಂದೆ ಬಿದ್ದಿರಲಿಲ್ಲ.

2018ರಲ್ಲಿ ದೆಹಲಿ IITಯಿಂದ ಪದವಿಧರನಾಗಿ ಹೊರಹೊಮ್ಮಿದ ಅನಿಲ್​​, ಮೂರನೇ ಪ್ರಯತ್ನದಲ್ಲಿ ಯುಪಿಎಸ್​ಸಿ ಪರೀಕ್ಷೆ ಪಾಸ್​ ಮಾಡಿದ್ದಾರೆ. 2020ನೇ ಸಾಲಿನ ಯುಪಿಎಸ್​ಸಿ ಪರೀಕ್ಷೆಯ ಫೈನಲ್​ ಫಲಿತಾಂಶದಲ್ಲಿ ಒಟ್ಟು 761 ಅಭ್ಯರ್ಥಿಗಳು ರ್‍ಯಾಂಕ್ ಪಡೆದುಕೊಂಡಿದ್ದು, 545 ಪುರುಷರು ಹಾಗೂ 216 ಮಹಿಳೆಯರು ಇದ್ದಾರೆ. ರ್‍ಯಾಂಕ್​ನ ಮೊದಲ 25 ಸ್ಥಾನ ಪಡೆದವರಲ್ಲಿ 13 ಪುರುಷರು ಹಾಗೂ 12 ಮಹಿಳಾ ಅಭ್ಯರ್ಥಿಗಳಿದ್ದಾರೆ.