ಇದು ವಸಾಹತುಶಾಹಿ ಯುಗವೇ.. ವ್ಯಕ್ತಿಯ ಕೈಯಿಂದ ಕಾಲಿನ ಕವರ್​ ತೆಗೆಸಿದ ಯುಪಿ ಸಚಿವೆ ವಿರುದ್ಧ ಭಾರಿ ಟೀಕೆ

ಉತ್ತರಪ್ರದೇಶ ಉನ್ನಾವೋದಲ್ಲಿನ ಪೌಷ್ಠಿಕ ಆಹಾರ ಘಟಕಕ್ಕೆ ಭೇಟಿ ನೀಡಿದ ವೇಳೆ ಸಚಿವೆ ಬೇಬಿ ರಾಣಿ ಮೌರ್ಯ ಅವರ ಕಾಲಿಗಿದ್ದ ಪ್ಲಾಸ್ಟಿಕ್​ ಕವರ್​ ಅನ್ನು ವ್ಯಕ್ತಿಯೊಬ್ಬರ ಕೈಯಿಂದ ತೆಗೆಸಿದ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ಭಾರಿ ವೈರಲ್​ ಆಗಿ ಸಚಿವೆಯ ವಿರುದ್ಧ ಭಾರಿ ಟೀಕೆ ವ್ಯಕ್ತವಾಗಿದೆ. ಇದು ಯೋಗಿ ಸರ್ಕಾರಕ್ಕೂ ಮುಜುಗರವನ್ನುಂಟು ಮಾಡಿದೆ.

ಉನ್ನಾವೋ:ಉತ್ತರಪ್ರದೇಶ ಕ್ಯಾಬಿನೆಟ್ ಸಚಿವೆ ಬೇಬಿ ರಾಣಿ ಮೌರ್ಯ ಅವರು ವ್ಯಕ್ತಿಯೊಬ್ಬರಿಂದ ಕಾಲಿಗೆ ಧರಿಸಿದ ಶೂ ಕವರ್​ ಅನ್ನು ತೆಗೆಸಿರುವ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ವೈರಲ್​ ಆಗಿದ್ದು, ಇದು ಯೋಗಿ ಆದಿತ್ಯನಾಥ್​ ಸರ್ಕಾರಕ್ಕೆ ಮುಜುಗರ ಉಂಟು ಮಾಡಿದೆ.

ಉನ್ನಾವೋ ನಗರದಲ್ಲಿರುವ ಪೌಷ್ಟಿಕ ಆಹಾರ ಘಟಕಕ್ಕೆ ಸಚಿವೆ ಬೇಬಿ ರಾಣಿ ಮೌರ್ಯ ಅವರು ಭೇಟಿ ನೀಡಿ ಹೊರಬಂದಾಗ ಕಾಲಿಗೆ ತೊಟ್ಟಿದ್ದ ಕವರ್​ ಅನ್ನು ಘಟಕದ ಉದ್ಯೋಗಿಯೊಬ್ಬ ತೆಗೆದಿದ್ದಾನೆ. ಈ ದೃಶ್ಯ ಮೊಬೈಲ್​ನಲ್ಲಿ ಸೆರೆಯಾಗಿದೆ. ಸಚಿವರ ಈ ವರ್ತನೆ ಇದೀಗ ವಿವಾದ ಎಬ್ಬಿಸಿದೆ.

ಉತ್ತರಾಖಂಡದ ರಾಜ್ಯಪಾಲರಾಗಿಯೂ ಸೇವೆ ಸಲ್ಲಿಸಿರುವ ಸಚಿವರ ಬೇಬಿ ರಾಣಿ ಮೌರ್ಯ ಅವರ ಈ ವರ್ತನೆಯ ವಿರುದ್ಧ ವಿಪಕ್ಷಗಳು ಮುಗಿಬಿದ್ದಿವೆ. ಸಚಿವರ ಈ ವರ್ತನೆ ವಸಾಹತುಶಾಹಿ ಯುಗವನ್ನು ನೆನಪಿಸುತ್ತಿದೆ ಎಂದು ಟೀಕಿಸಿವೆ.

ಅಲ್ಲದೇ, ಈ ವಿಡಿಯೋವನ್ನು ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಂಡಿರುವ ಎಸ್‌ಪಿ ಮತ್ತು ಆರ್‌ಎಲ್‌ಡಿ ಪಕ್ಷಗಳು ಸಚಿವರ ವರ್ತನೆಯ ವಿರುದ್ಧ ಹರಿಹಾಯ್ದಿವೆ. ಅಧಿಕಾರದ ಅಮಲಿನಲ್ಲಿರುವ ಸಚಿವರು ಅಹಂಕಾರಿಗಳಾಗಿದ್ದಾರೆ. ಕಾಲಿಗೆ ಹಾಕಿದ ಕವರ್​ ಅನ್ನು ವ್ಯಕ್ತಿಯೊಬ್ಬರಿಂದ ತೆಗೆಸಿದ್ದಕ್ಕೆ ಕ್ಷಮೆ ಕೋರಬೇಕು. ಇದು ಅಕ್ಷಮ್ಯ ಅಪರಾಧ ಎಂದು ಟೀಕಾಪ್ರಹಾರ ಮಾಡಲಾಗಿದೆ.

ಸಾಮಾಜಿಕ ಮಾಧ್ಯಮದಲ್ಲೂ ಕೂಡ ಸಚಿವರ ಈ ನಡೆಗೆ ಭಾರಿ ಟೀಕೆ ವ್ಯಕ್ತವಾಗಿದೆ. ಈ ಬಗ್ಗೆ ಸಚಿವರು ಮೌನವಹಿಸಿದ್ದು, ಯಾವುದೇ ಸ್ಪಷ್ಟನೆ ನೀಡಿಲ್ಲ.

ಓದಿ:ಶರದ್​ ಪವಾರ್​ ಬಗ್ಗೆ ವಿವಾದಾತ್ಮಕ ಪೋಸ್ಟ್: ಮರಾಠಿ ನಟಿ ಪೊಲೀಸ್​ ವಶಕ್ಕೆ