ಸಕಾಲದಲ್ಲಿ ಸಿಗದ ಆರೋಗ್ಯ ಸೇವೆ: ಗರ್ಭಿಣಿ ಹೊತ್ತೊಯ್ಯುತ್ತಿದ್ದಾಗ ಅವಳಿ ಮಕ್ಕಳು ಸಾವು

ಹೆರಿಗೆ ನೋವಿನಿಂದ ಬಳಲುತ್ತಿದ್ದ ಗರ್ಭಿಣಿಯೋರ್ವಳು ಅವಳಿ ಮಕ್ಕಳಿಗೆ ಜನ್ಮ ನೀಡಿದ್ದು, ಸಕಾಲದಲ್ಲಿ ಚಿಕಿತ್ಸೆ ಸಿಗದ ಮಕ್ಕಳು ಸಾವನ್ನಪ್ಪಿವೆ.

ಪಾಲ್ಘರ್​(ಮಹಾರಾಷ್ಟ್ರ): ದೇಶಕ್ಕೆ ಸ್ವಾತಂತ್ರ್ಯ ದೊರೆತು 75 ವರ್ಷ ಕಳೆದರೂ ಇನ್ನೂ ಅನೇಕ ಕಡೆಗಳಲ್ಲಿ ಜನರಿಗೆ ಸರಿಯಾದ ರಸ್ತೆ ಸಂಪರ್ಕ, ಆರೋಗ್ಯ ಸೇವೆ ಮರೀಚಿಕೆಯಾಗಿದೆ. ಮಹಾರಾಷ್ಟ್ರದ ಪಾಲ್ಘರ್​​ನಲ್ಲಿ ಗರ್ಭಿಣಿಯೊಬ್ಬರು ನರಕಯಾತನೆ ಅನುಭವಿಸಿದ್ದು ಇದಕ್ಕೊಂದು ಹೊಸ ಉದಾಹರಣೆಯಷ್ಟೇ. ಪಾಲ್ಘರ್​​ನ ಬೋಟೋಶಿ ಗ್ರಾಮ ಪಂಚಾಯ್ತಿಯ ಮರ್ಕಟವಾಡಿಯಲ್ಲಿ ಈ ಘಟನೆ ನಡೆಯಿತು.

ತುರ್ತು ಆರೋಗ್ಯ ಸಮಸ್ಯೆಯಾದರೆ ರೋಗಿಗಳನ್ನು ತಕ್ಷಣ ಆಸ್ಪತ್ರೆಗೆ ದಾಖಲಿಸಲು ಸರಿಯಾದ ರಸ್ತೆ ಸಂಪರ್ಕ ಇಲ್ಲಿಲ್ಲ. ಇದರ ಪರಿಣಾಮ, ರೋಗಿಗಳನ್ನು ಮೂರು ಕಿಲೋ ಮೀಟರ್ ನಡೆದುಕೊಂಡೇ ಸಾಗಿಸಬೇಕಾದ ದುಸ್ಥಿತಿ ಇದೆ.

ವಿಪರೀತ ಹೆರಿಗೆ ನೋವಿನಿಂದ ಬಳಲುತ್ತಿದ್ದ ವಂದನಾ ಎಂಬುವವರನ್ನು ಗ್ರಾಮಸ್ಥರು ಹೆಗಲ ಮೇಲೆ ಹೊತ್ತುಕೊಂಡು ತೆರಳುತ್ತಿದ್ದರು. ಈ ಸಂದರ್ಭದಲ್ಲಿ ಆಕೆಗೆ ಹೆರಿಗೆಯಾಗಿದ್ದು, ಅವಳಿ ಮಕ್ಕಳು ದಾರುಣ ಸಾವನ್ನಪ್ಪಿವೆ. ಸಕಾಲಕ್ಕೆ ಆರೋಗ್ಯ ಸೇವೆ ಸಿಗದಿರುವುದಕ್ಕೆ ಶಿಶುಗಳು ಪ್ರಾಣ ಕಳೆದುಕೊಂಡಿವೆ ಎಂದು ಕುಟುಂಬಸ್ಥರು ತೀವ್ರ ಬೇಸರ ವ್ಯಕ್ತಪಡಿಸಿದರು.