ಹರಿಯಾಣ,ಜಾರ್ಖಂಡ್​ ಬೆನ್ನಲ್ಲೇ ಗುಜರಾತ್​ನಲ್ಲೂ ದುಷ್ಕೃತ್ಯ.. ಕಾನ್ಸ್​​ಟೇಬಲ್​ ಮೇಲೆ ಟ್ರಕ್​ ಹತ್ತಿಸಿ ಕೊಲೆ

ರಾತ್ರಿ ವೇಳೆ ವಾಹನಗಳ ತಪಾಸಣೆ ನಡೆಸುತ್ತಿದ್ದ ಪೊಲೀಸ್ ಕಾನ್ಸ್​ಟೇಬಲ್​​ ಮೇಲೆ ಟ್ರಕ್ ಹರಿಸಿ ಕೊಲೆ ಮಾಡಿರುವ ಘಟನೆ ಗುಜರಾತ್​​ನಲ್ಲಿ ನಡೆದಿದೆ.

ಗಾಂಧಿನಗರ(ಗುಜರಾತ್​):ಹರಿಯಾಣ, ಜಾರ್ಖಂಡ್​​ನಲ್ಲಿ ಪೊಲೀಸ್​ ಅಧಿಕಾರಿಗಳ ಮೇಲೆ ಟ್ರಕ್​ ಹರಿಸಿ ಕೊಲೆ ಮಾಡಿರುವ ಘಟನೆ ಬೆನ್ನಲ್ಲೇ ಗುಜರಾತ್​​ನಲ್ಲೂ ಅಂತಹದೊಂದು ಪ್ರಕರಣ ನಡೆದಿರುವುದು ಬೆಳಕಿಗೆ ಬಂದಿದೆ.

ರಾಜಸ್ಥಾನದ ಲೈಸೆನ್ಸ್​​ ನಂಬರ್​ ಹೊಂದಿದ್ದ ಅನುಮಾನಾಸ್ಪದ ಟ್ರಕ್​ ತಡೆಯಲು ಹೋದ ಗುಜರಾತ್​ ಪೊಲೀಸ್ ಕಾನ್ಸ್​​ಟೇಬಲ್​ ​ ಮೇಲೆ ವಾಹನ ಹರಿಸಿ, ಕೊಲೆ ಮಾಡಲಾಗಿದೆ. ಈ ಮೂಲಕ ಕೇವಲ 24 ಗಂಟೆಗಳ ಅಂತರದಲ್ಲಿ ನಡೆದಿರುವ ಮೂರನೇ ಪ್ರಕರಣ ಇದಾಗಿದೆ.

ಗುಜರಾತ್​​ನ ಬೋರ್ಸಾದ್​​​ ಎಂಬಲ್ಲಿ ಬುಧವಾರ ತಡರಾತ್ರಿ ಈ ಘಟನೆ ನಡೆದಿದೆ. ಅನುಮಾನಾಸ್ಪದ ಟ್ರಕ್​​ ನಿಲ್ಲಿಸಲು ಮುಂದಾದ ಪೊಲೀಸ್ ಸಿಬ್ಬಂದಿ ಮೇಲೆ ಹರಿಸಲಾಗಿದ್ದು, ಇದರ ಬೆನ್ನಲ್ಲೇ ಚಾಲಕ ಸ್ಥಳದಿಂದ ಪರಾರಿಯಾಗಿದ್ದಾನೆ. ಘಟನೆಗೆ ಸಂಬಂಧಿಸಿದಂತೆ ಡಿಎಸ್​​ಪಿ ಅಜಿತ್​ ಆರ್​ ಮಾತನಾಡಿದ್ದು, ಬುಧವಾರ ನಸುಕಿನ ಜಾವ ಕಾನ್ಸ್​​ಟೇಬಲ್​​ ಕಿರಣ್ ರಾಜ್​ ರಾಜಸ್ಥಾನದ ಲೈಸನ್ಸ್ ಹೊಂದಿದ್ದ(ಫಲಕ) ಟ್ರಕ್​​ ತಡೆಯಲು ಮುಂದಾಗಿದ್ದಾರೆ. ಟ್ರಕ್​ ಚಾಲಕ ವೇಗವಾಗಿ ಚಲಾಯಿಸಿ ಕಾನ್ಸ್​​ಟೇಬಲ್​ ಮೇಲೆ ಹರಿಸಿದ್ದಾನೆ.

ಘಟನೆ ಬೆನ್ನಲ್ಲೇ ಸ್ಥಳದಿಂದ ಪರಾರಿಯಾಗಿದ್ದಾನೆ. ಕಿರಣ್ ರಾಜ್​ ಚಿಕಿತ್ಸೆ ವೇಳೆ ಸಾವನ್ನಪ್ಪಿದ್ದಾನೆ ಎಂದು ತಿಳಿಸಿದ್ದಾರೆ. ಟ್ರಕ್​ ಚಾಲಕನನ್ನ ಈಗಾಗಲೇ ಗುರುತಿಸಲಾಗಿದ್ದು, ಆತನ ಬಂಧನಕ್ಕಾಗಿ ಶೋಧಕಾರ್ಯ ಮುಂದುವರೆದಿದೆ ಎಂದಿದ್ದಾರೆ.

ನಿನ್ನೆ ಕೂಡ ಅಕ್ರಮ ಗಣಿಗಾರಿಕೆ ನಡೆಯುತ್ತಿದ್ದ ಸ್ಥಳಕ್ಕೆ ಭೇಟಿ ನೀಡಿದ್ದ ಹರಿಯಾಣದ ಡಿಎಸ್​ಪಿ ಮೇಲೆ ಟ್ರಕ್ ಹರಿಸಿ ಕೊಲೆ ಮಾಡಲಾಗಿತ್ತು. ಇದರ ಬೆನ್ನಲ್ಲೇ ರಾತ್ರಿ ವೇಳೆ ವಾಹನ ತಪಾಸಣೆ ನಡೆಸುತ್ತಿದ್ದ ಮಹಿಳಾ ಪಿಎಸ್​ಐ ಮೇಲೆ ರಾಂಚಿಯಲ್ಲಿ ಟ್ರಕ್ ಹರಿಸಿ ಕೊಲೆ ಮಾಡಲಾಗಿದೆ.