ಮೂರು ರಾಜಧಾನಿಗಳ ವಿರೋಧಿ ಹೋರಾಟಕ್ಕೆ ಸಿಕ್ಕ ಗೆಲುವು: ಹೆಜ್ಜೆ ಹೆಜ್ಜೆಗೂ ಪ್ರತಿಭಟನಾಕಾರರಿಗೆ ಇತ್ತು ಭೀತಿ

ಮೂರು ರಾಜಧಾನಿ ಎಂದು ಆಂಧ್ರ ಸರ್ಕಾರ ಘೋಷಣೆ ಮಾಡುತ್ತಿದ್ದಂತೆ ಆರಂಭವಾದ ರೈತ ಹೋರಾಟ ಗೆಲುವು ಸಾಧಿಸಿದೆ. ಸುಮಾರು 807 ದಿನಗಳ ನಂತರ ಸಿಕ್ಕ ಗೆಲುವಿಗೆ ರೈತರು ಅನುಭವಿಸಿದ ಕಷ್ಟಗಳು ಅಷ್ಟಿಷ್ಟಲ್ಲ.

ಅಮರಾವತಿ (ಆಂಧ್ರಪ್ರದೇಶ): ಈಗಾಗಲೇ ರಾಜಧಾನಿ ವಿಚಾರದಲ್ಲಿ ಆಂಧ್ರಪ್ರದೇಶದಲ್ಲಿ ನಡೆಯುತ್ತಿದ್ದ ವಿವಾದಕ್ಕೆ ಅಲ್ಲಿನ ಹೈಕೋರ್ಟ್​ ಅಂತ್ಯ ಹಾಡಿದೆ. ಅಮರಾವತಿಯೇ ಆಂಧ್ರಪ್ರದೇಶದ ರಾಜಧಾನಿಯಾಗಿರಲಿದೆ ಎಂದು ತೀರ್ಪು ನೀಡಿದ್ದು, ಒಂದು ರಾಜ್ಯಕ್ಕೆ ಮೂರು ರಾಜಧಾನಿಗಳಿರಲು ಸಾಧ್ಯವಿಲ್ಲ ಎಂದು ಅಭಿಪ್ರಾಯಪಟ್ಟಿದೆ.

ಆಂಧ್ರ ಹೈಕೋರ್ಟ್​ನ ಈ ತೀರ್ಪಿನ ಹಿಂದೆ ಅತಿ ದೊಡ್ಡ ರೈತ ಪ್ರತಿಭಟನೆಗಳಿವೆ. ಮೂರು ರಾಜಧಾನಿ ಎಂದು ಆಂಧ್ರ ಸರ್ಕಾರ ಘೋಷಣೆ ಮಾಡುತ್ತಿದ್ದಂತೆ ಆರಂಭವಾದ ರೈತ ಹೋರಾಟ ಗೆಲುವು ಸಾಧಿಸಿದೆ. ಸುಮಾರು 807 ದಿನಗಳ ನಂತರ ಸಿಕ್ಕ ಗೆಲುವಿಗೆ ರೈತರು ಅನುಭವಿಸಿದ ಕಷ್ಟಗಳು ಅಷ್ಟಿಷ್ಟಲ್ಲ.

ಎರಡು ವರ್ಷ ಮೂರು ತಿಂಗಳು ನಡೆದ ಈ ಪ್ರತಿಭಟನೆ ವೇಳೆ ಆಂಧ್ರ ಸರ್ಕಾರ ದಾಖಲಿಸಿದ್ದು ಬರೋಬ್ಬರಿ 3,852 ಪ್ರಕರಣಗಳು. ಇದರಲ್ಲಿ ರೈತರನ್ನು ಮಾತ್ರವಲ್ಲದೇ ಮಹಿಳೆಯರು, ದಲಿತರು, ವೃದ್ಧರನ್ನು ಆರೋಪಿಗಳನ್ನಾಗಿ ಗುರುತಿಸಲಾಗಿದೆ.

ಈ ಹೋರಾಟವನ್ನು ಹತ್ತಿಕ್ಕಲು ಆಂಧ್ರ ಸರ್ಕಾರ ಕೈಗೊಂಡ ಕ್ರಮಗಳು ಒಂದೆರಡಲ್ಲ. ನೂರಾರು ಹಳ್ಳಿಗಳಲ್ಲಿ ಪೊಲೀಸರನ್ನು ನಿಯೋಜನೆ ಮಾಡಲಾಗಿದ್ದು, ಯಾರೇ ಪ್ರತಿಭಟನೆ ನಡೆಸಿದರೂ ಬಂಧಿಸಲಾಗುವುದು ಎಂಬ ವಾತಾವರಣವನ್ನು ನಿರ್ಮಾಣ ಮಾಡಲಾಗಿತ್ತು.

ಇದನ್ನೂ ಓದಿ: ಅಮರಾವತಿಯೇ ಆಂಧ್ರಪ್ರದೇಶದ ರಾಜಧಾನಿ: ಹೈಕೋರ್ಟ್​

ಸುಮಾರು 29 ಗ್ರಾಮಗಳ ಜನರ ಮೇಲೆ ಪ್ರಕರಣಗಳನ್ನು ದಾಖಲು ಮಾಡಲಾಗಿದ್ದು, ಭಾರತೀಯ ದಂಡಸಂಹಿತೆ 143, 188, 324, 341, 353, 469, 465, 120b, 505, 506 ಅಡಿಯಲ್ಲಿ, ಸಿಆರ್​ಪಿಸಿ ಸೆಕ್ಷನ್ 154ರ ಅಡಿಯಲ್ಲಿ, ಎಸ್​​ಸಿ-ಎಸ್ಟಿ ದೌರ್ಜನ್ಯ ಕಾಯ್ದೆಯಡಿಯಲ್ಲೂ ದೂರು ದಾಖಲಾಗಿದೆ.

ಅಮರಾವತಿ ನಗರದ ಜನರ ಮೇಲೆ ಒಟ್ಟು 3,852 ದೂರುಗಳು ದಾಖಲಾಗಿದ್ದು, 1585 ಮಹಿಳೆಯರು, 1915 ಪುರುಷರು, 35 ರೈತರ ಮೇಲೆ ದೂರುಗಳನ್ನು ದಾಖಲು ಮಾಡಲಾಗಿದೆ ಎಂದು ಅಂಕಿ ಅಂಶಗಳಿಂದ ತಿಳಿದುಬಂದಿದೆ.