ನೀರಿನ ಹೊಂಡದಲ್ಲಿ ಮುಳುಗಿ ಮೂವರು ಮಕ್ಕಳು ಸಾವು

ರಂಗಾರೆಡ್ಡಿ ಜಿಲ್ಲೆಯ ಶಾದ್​ನಗರ ಪುರಸಭೆ ವ್ಯಾಪ್ತಿಯ ಸೋಲಿಪುರ ನಗರದಲ್ಲಿ ನೀರಿನ ಹೊಂಡದಲ್ಲಿ ಮುಳುಗಿ ಮೂವರು ಮಕ್ಕಳು ಸಾವನ್ನಪ್ಪಿರುವ ಘಟನೆ ನಡೆದಿದೆ.

ಶಾದ್‌ನಗರ (ರಂಗಾರೆಡ್ಡಿ): ರಂಗಾರೆಡ್ಡಿ ಜಿಲ್ಲೆಯ ಶಾದ್​ನಗರ ಪುರಸಭೆ ವ್ಯಾಪ್ತಿಯ ಸೋಲಿಪುರ ನಗರದಲ್ಲಿ ನೀರಿನ ಹೊಂಡಕ್ಕೆ ಬಿದ್ದು ಮೂವರು ಮಕ್ಕಳು ಮೃತಪಟ್ಟಿರುವ ದಾರುಣ ಘಟನೆ ನಡೆದಿದೆ. ಮೃತ ಮಕ್ಕಳನ್ನು ಅಕ್ಷಿತ್ ಗೌಡ್, ಫರೀದ್ ಮತ್ತು ಫರೀನ್ ಎಂದು ಗುರುತಿಸಲಾಗಿದ್ದು, ಮೃತ ಮಕ್ಕಳು ಹತ್ತು ವರ್ಷದೊಳಗಿನವರು ಎಂದು ಹೇಳಲಾಗಿದೆ.

ಇಂದು ಬೆಳಗ್ಗೆ ಅಕ್ಷಿತ್ ಗೌಡ್, ಫರೀದ್ ಮತ್ತು ಫರೀನ್ ಆಟವಾಡಲು ಹೋಗಿದ್ದರು. ಈ ಸಂದರ್ಭ ಅಲ್ಲೇ ಇದ್ದ ಒಂದು ನೀರಿನ ಹೊಂಡಕ್ಕೆ ಮೀನು ಹಿಡಿಯಲು ಇಳಿದಿದ್ದಾರೆ. ಈ ವೇಳೆ ನೀರಿನಲ್ಲಿ ಮುಳುಗಿದ್ದು, ಸ್ಥಳದಲ್ಲೇ ಮೂವರು ಸಾವನ್ನಪ್ಪಿದ್ದಾರೆ ಎಂದು ತಿಳಿದುಬಂದಿದೆ.

ಆಟ ಆಡುತ್ತಿದ್ದ ಮಕ್ಕಳನ್ನು ಹುಡುಕಿಕೊಂಡು ಬಂದ ಮಕ್ಕಳ ಪಾಲಕರಿಗೆ ನೀರಿನ ಹೊಂಡದಲ್ಲಿ ಮಕ್ಕಳ ಶವ ತೇಲುತ್ತಿರುವುದು ಕಂಡು ಬಂದಿದೆ. ಬಳಿಕ ಸ್ಥಳೀಯರು ಆಗಮಿಸಿ ನೀರಿನ ಹೊಂಡದಿಂದ ಮಕ್ಕಳ ಶವವನ್ನು ಹೊರತೆಗೆದಿದ್ದಾರೆ. ಮೃತ ಮಕ್ಕಳ ಪೋಷಕರ ಆಕ್ರಂದನ ಮುಗಿಲು ಮುಟ್ಟಿದೆ. ಪ್ರಕರಣ ಸಂಬಂಧ ಪೊಲೀಸರು ಸ್ಥಳಕ್ಕಾಗಮಿಸಿ ಪರಿಶೀಲನೆ ನಡೆಸಿದ್ದಾರೆ.

ಇದನ್ನೂ ಓದಿ :ಟ್ರ್ಯಾಕ್ಟರ್ ಟ್ರಾಲಿ​ ಕೆರೆಗೆ ಪಲ್ಟಿ.. 8 ಮಹಿಳೆಯರು ಇಬ್ಬರು ಮಕ್ಕಳು ಸಾವು