ಚಂಡೀಗಢ (ಹರಿಯಾಣ): ಹರಿಯಾಣದಲ್ಲಿ ಆಡಳಿತಾರೂಢ ಬಿಜೆಪಿ ಹಾಗೂ ಜೆಜೆಪಿ ಮತ್ತು ಭಾರತೀಯ ರಾಷ್ಟ್ರೀಯ ಲೋಕದಳಕ್ಕೆ (ಐಎನ್‌ಎಲ್‌ಡಿ) ಶಾಕ್ ಎದುರಾಗಿದೆ. ಮೂವರು ಮಾಜಿ ಶಾಸಕರು, ಪುರಸಭೆ ಅಧ್ಯಕ್ಷರು ಹಾಗೂ ಸುಮಾರು 15 ಹಾಲಿ ಮತ್ತು ಮಾಜಿ ಕೌನ್ಸಿಲರ್‌ಗಳು ಬುಧವಾರ ಕಾಂಗ್ರೆಸ್ ಪಕ್ಷಕ್ಕೆ ಸೇರ್ಪಡೆಗೊಂಡಿದ್ದಾರೆ.
ಚಂಡೀಗಢದಲ್ಲಿ ಮಾಜಿ ಮುಖ್ಯಮಂತ್ರಿ, ಪ್ರತಿಪಕ್ಷದ ನಾಯಕ ಭೂಪಿಂದರ್ ಸಿಂಗ್ ಹೂಡಾ, ಕಾಂಗ್ರೆಸ್ ರಾಜ್ಯಾಧ್ಯಕ್ಷ ಉದಯಭಾನ್ ಮತ್ತು ಸಂಸದ ದೀಪೇಂದರ್ ಹೂಡಾ ಸಮ್ಮುಖದಲ್ಲಿ ಮೂವರು ಮಾಜಿ ಶಾಸಕರು, ಪುರಸಭೆ ಅಧ್ಯಕ್ಷರು ತಮ್ಮ ಬೆಂಬಲಿಗರೊಂದಿಗೆ ಪಕ್ಷಕ್ಕೆ ಸೇರ್ಪಡೆಗೊಂಡರು. ಈ ಸಂದರ್ಭದಲ್ಲಿ ಮಾಜಿ ಕೇಂದ್ರ ಸಚಿವ ಜೈ ಪ್ರಕಾಶ್, ಮಾಜಿ ಸಚಿವ ಅಶೋಕ್ ಅರೋರಾ, ಮಾಜಿ ಸಂಸದ ಸುಶೀಲ್ ಇಂದೋರಾ ಸಹ ಉಪಸ್ಥಿತರಿದ್ದರು.
ಮಾಜಿ ಶಾಸಕರಾದ ಕರ್ನಲ್ (ನಿವೃತ್ತ) ರಘುಬೀರ್ ಸಿಂಗ್ ಛಿಲ್ಲರ್, ಫೂಲ್ ಸಿಂಗ್ ಖೇರಿ ಮತ್ತು ನಿರ್ಪೇಂದರ್ ಸಿಂಗ್ ಹಾಗೂ ಜುಲ್ಲಾನಾ ಮುನ್ಸಿಪಲ್ ಸಮಿತಿ ಅಧ್ಯಕ್ಷ ಮತ್ತು ಜೆಜೆಪಿಯ ಮಾಜಿ ಫರಿದಾಬಾದ್ ಜಿಲ್ಲಾ ಅಧ್ಯಕ್ಷ ರಾಜಾ ರಾಮ್ ಠಾಕೂರ್ ಸೇರಿ ಎಲ್ಲರನ್ನು ಪಕ್ಷಕ್ಕೆ ಸ್ವಾಗತಿಸಿ ಮಾತನಾಡಿ, ಭೂಪಿಂದರ್ ಹೂಡಾ, ಈ ಸಮ್ಮಿಶ್ರ ಸರ್ಕಾರವು ಇನ್ನು ಕೆಲವು ತಿಂಗಳುಗಳ ಕಾಲ ಅತಿಥಿಯಾಗಿದೆ. ಲೋಕಸಭೆ ಚುನಾವಣೆಗೆ ಕೇವಲ ಎಂಟು ತಿಂಗಳು ಮಾತ್ರ ಬಾಕಿ ಉಳಿದಿದ್ದು, ಮಾರ್ಚ್ ವೇಳೆಗೆ ಚುನಾವಣಾ ದಿನಾಂಕಗಳು ಪ್ರಕಟವಾಗುವ ಸಾಧ್ಯತೆ ಇದೆ ಎಂದು ಹೇಳಿದರು. ಅಲ್ಲದೇ, ಕಳೆದ ಎಂಟು ತಿಂಗಳಲ್ಲಿ ಸುಮಾರು 30 ಮಾಜಿ ಶಾಸಕರು ಮತ್ತು ಮಾಜಿ ಸಚಿವರು ಸೇರಿ ಬಹುತೇಕ ಮುಖಂಡರು ಆಡಳಿತಾರೂಢ ಜೆಜೆಪಿ ಮತ್ತು ಬಿಜೆಪಿ ತೊರೆದು ಕಾಂಗ್ರೆಸ್ ಸೇರಿದ್ದಾರೆ. ಹರಿಯಾಣದಲ್ಲಿ ರಿವರ್ಸ್ ಆಪರೇಷನ್ ಕಮಲ ನಡೆಯುತ್ತಿದೆ ಎಂದರು.