ದಿವಾಳಿತನದ ಪ್ರಕ್ರಿಯೆಯಲ್ಲಿ ಸಾವಿರಾರು ಕೋಟಿ ಮೌಲ್ಯದ ಭೂಮಿ ಆಂಧ್ರ ಸಿಎಂ ಮತ್ತು ಕಂಪನಿ ಪಾಲು

ವೈ.ಎಸ್.ರಾಜಶೇಖರ ರೆಡ್ಡಿ ಅವರು ಅಖಂಡ ಆಂಧ್ರಪ್ರದೇಶದ ಮುಖ್ಯಮಂತ್ರಿಯಾಗಿದ್ದಾಗ ಲೇಪಾಕ್ಷಿ ನಾಲೆಡ್ಜ್ ಹಬ್ ಹೆಸರಿನಲ್ಲಿ ಅನಂತಪುರ ಜಿಲ್ಲೆಯಲ್ಲಿ ಸಾವಿರಾರು ಎಕರೆ ಭೂಮಿಯನ್ನು ಅವರ ಆಪ್ತರಿಗೆ ಮಂಜೂರು ಮಾಡಲಾಗಿತ್ತು. ಪುತ್ರ ಜಗನ್​ಮೋಹನ್ ರೆಡ್ಡಿ ಅವರ ಪ್ರಚೋದನೆಯಿಂದ ಇದೆಲ್ಲವನ್ನೂ ಮಾಡಲಾಗಿದೆ ಎಂದು ಸಿಬಿಐ ಕೂಡ ನಿರ್ಧರಿಸಿದೆ.

ಅಮರಾವತಿ (ಆಂಧ್ರಪ್ರದೇಶ): ಒಂದು ಕಾಲದಲ್ಲಿ ಲೇಪಾಕ್ಷಿ ನಾಲೆಡ್ಜ್ ಹಬ್ ಹೆಸರಿನಲ್ಲಿ ಲೂಟಿ ಮಾಡಿದ್ದ ಆಂಧ್ರಪ್ರದೇಶದ ಮುಖ್ಯಮಂತ್ರಿ ವೈ.ಎಸ್.ಜಗನ್​ಮೋಹನ್ ರೆಡ್ಡಿ ಅಂಡ್ ಕಂಪನಿ ಇಂದೂ ಪ್ರಾಜೆಕ್ಟ್‌ಗಳು ದಿವಾಳಿತನದ ಹೆಸರಲ್ಲಿ ಏಕಾಏಕಿ ಲಾಭ ಗಳಿಕೆಯ ಯತ್ನದಲ್ಲಿದೆ. ವಿವಿಧ ಬ್ಯಾಂಕ್‌ಗಳಲ್ಲಿ ಇಂದೂ ಪ್ರಾಜೆಕ್ಟ್‌ಗಳು ಒತ್ತೆ ಇಟ್ಟಿರುವ ಅತ್ಯಮೂಲ್ಯವಾದ ಲೇಪಾಕ್ಷಿ ನಾಲೆಡ್ಜ್ ಹಬ್ ಭೂಮಿಯನ್ನು ಲೂಟಿ ಮಾಡುವ ಯೋಜನೆಯನ್ನು ರೂಪಿಸಲಾಗಿದೆ.

2,500 ಕೋಟಿ ರೂ. ಮೌಲ್ಯದ ಭೂಮಿಯನ್ನು ಕೇವಲ 500 ಕೋಟಿ ರೂ.ಗೆ ಖರೀದಿಸಲಾಗಿದೆ. 4,531 ಕೋಟಿ ಸಾಲದಲ್ಲಿರುವ 2,500 ಕೋಟಿ ರೂಪಾಯಿ ಮೌಲ್ಯದ ಭೂಮಿಯನ್ನು ಇಷ್ಟು ಅಲ್ಪ ಮೊತ್ತಕ್ಕೆ ಬಿಟ್ಟುಕೊಡಲು ಬ್ಯಾಂಕ್‌ಗಳು ಏಕೆ ಸಿದ್ಧವಾಗಿವೆ?. ಇಡೀ ಪ್ರಕ್ರಿಯೆಯಲ್ಲಿ ರಾಜ್ಯ ಸರ್ಕಾರದ ಪಾತ್ರವೇನು?. ಇಂದೂ ಪ್ರಾಜೆಕ್ಟ್‌ಗಳ ದಿವಾಳಿತನದ ಪ್ರಕ್ರಿಯೆಯನ್ನು ಗಮನಿಸಿದರೆ, ಪ್ರತಿ ಹಂತದಲ್ಲೂ ಅಕ್ರಮಗಳು ಕಂಡು ಬರುತ್ತವೆ.

ಜಗನ್​ ಪ್ರಚೋದನೆ: ವೈ.ಎಸ್.ರಾಜಶೇಖರ ರೆಡ್ಡಿ ಅವರು ಅಖಂಡ ಆಂಧ್ರಪ್ರದೇಶದ ಮುಖ್ಯಮಂತ್ರಿಯಾಗಿದ್ದಾಗ ಲೇಪಾಕ್ಷಿ ನಾಲೆಡ್ಜ್ ಹಬ್ ಹೆಸರಿನಲ್ಲಿ ಅನಂತಪುರ ಜಿಲ್ಲೆಯಲ್ಲಿ ಸಾವಿರಾರು ಎಕರೆ ಭೂಮಿಯನ್ನು ಅವರ ಆಪ್ತರಿಗೆ ಮಂಜೂರು ಮಾಡಲಾಗಿತ್ತು. ಪುತ್ರ ಜಗನ್​ಮೋಹನ್ ರೆಡ್ಡಿ ಅವರ ಪ್ರಚೋದನೆಯಿಂದ ಇದೆಲ್ಲವನ್ನೂ ಮಾಡಲಾಗಿದೆ ಎಂದು ಕೇಂದ್ರ ತನಿಖಾ ಸಂಸ್ಥೆ ಸಿಬಿಐ ಕೂಡ ತೀರ್ಮಾನಿಸಿದೆ.

ಇಂದೂ ಪ್ರಾಜೆಕ್ಟ್‌ಗಳ ಈ ಪ್ರಕ್ರಿಯೆಯಲ್ಲಿ ಪ್ರಮುಖ ಪಾತ್ರ ವಹಿಸಿದ್ದ ಶ್ಯಾಮಪ್ರಸಾದ್ ರೆಡ್ಡಿಯವರ ಕಂಪನಿಯಾಗಿತ್ತು. ಸಾಲದ ಸುಳಿಯಲ್ಲಿ ಸಿಲುಕಿದ್ದ ಇಂದೂ ಪ್ರಾಜೆಕ್ಟ್‌ಗಳು ಕೆಲ ಸಮಯದ ಹಿಂದೆ ದಿವಾಳಿಯಾದವು. ಮಾರ್ಚ್ 2019ರ ಹೊತ್ತಿಗೆ ಕಂಪನಿಯು ಬ್ಯಾಂಕ್‌ಗಳು ಮತ್ತು ಇತರ ಸಂಸ್ಥೆಗಳಿಗೆ 4,531.44 ಕೋಟಿ ರೂಪಾಯಿಗಳ ಬಾಕಿ ಸಾಲವನ್ನು ಹೊಂದಿತ್ತು.

ದಿವಾಳಿತನದ ಪ್ರಕ್ರಿಯೆಯಲ್ಲಿ ಸಾವಿರಾರು ಕೋಟಿ ಮೌಲ್ಯದ ಭೂಮಿ ಆಂಧ್ರ ಸಿಎಂ ಮತ್ತು ಕಂಪನಿ ಪಾಲು

ಕಂಪನಿಯ ದಿವಾಳಿತನ ಪರಿಹಾರ ಪ್ರಕ್ರಿಯೆಯನ್ನು ಹೈದರಾಬಾದ್‌ನಲ್ಲಿರುವ ರಾಷ್ಟ್ರೀಯ ಕಂಪನಿ ಕಾನೂನು ನ್ಯಾಯಮಂಡಳಿ (NCLT) ಕೈಗೆತ್ತಿಕೊಂಡಿತ್ತು. ಈ ಇತ್ಯರ್ಥದ ಭಾಗವಾಗಿ ಸಾಲಗಾರರು ಕ್ಲೈಮ್ ಮಾಡಿದ 4,531.44 ಕೋಟಿ ರೂ.ಗಳಲ್ಲಿ 4,138.54 ಕೋಟಿ ರೂ. ಸಾಲಗಳನ್ನು ದಿವಾಳಿತನದ ಕಾರ್ಯವಿಧಾನದಿಂದ ಅನುಮೋದಿಸಲಾಗಿದೆ.

ಈ ಮೊತ್ತವನ್ನು ಮನ್ನಾ ಮಾಡಲು ರಾಮಚಂದ್ರ ರಾವ್ ಟ್ರಾನ್ಸ್‌ಮಿಷನ್ ಮತ್ತು ಪ್ರಾಜೆಕ್ಟ್‌ಗಳ ಜೊತೆಗೆ 500 ಕೋಟಿ ರೂ. ಪಾವತಿಸಲು ಅರ್ಥಿನ್ ಪ್ರಾಜೆಕ್ಟ್‌ಗಳ ಪ್ರಸ್ತಾವನೆಗೆ ಸಾಲಗಾರರ ಸಮಿತಿ ಒಪ್ಪಿಗೆ ನೀಡಿದೆ. ಈ ಮಟ್ಟಿಗೆ ಕಾನೂನು ನ್ಯಾಯಮಂಡಳಿಯ ಅನುಮೋದನೆಯೂ ಪೂರ್ಣಗೊಂಡಿದೆ.

ಮಾಲೀಕತ್ವ ಬದಲಾದ ನಂತರ ಕೈಗೆತ್ತಿಕೊಳ್ಳಲಿರುವ ಕಾಮಗಾರಿಗಳಿಗೆ ಕಂಪನಿಯು ಹೆಚ್ಚುವರಿಯಾಗಿ 40 ಕೋಟಿ ರೂ.ಗಳನ್ನು ಬಂಡವಾಳವಾಗಿ ನೀಡಬೇಕಾಗುತ್ತದೆ. ಇನ್ನು, 1 ಕೋಟಿ ರೂ.ಗಳನ್ನು ದಿವಾಳಿತನ ಪ್ರಕ್ರಿಯೆಗೆ ಪಾವತಿಸಬೇಕಾಗುತ್ತದೆ. ಬ್ಯಾಂಕ್‌ಗಳು ಮತ್ತು ಇತರ ಸಾಲದಾತರಿಗೆ ಕೇವಲ 500 ಕೋಟಿ ರೂ.ಗಳನ್ನು ಪಾವತಿಸುವ ಅರ್ಥಿನ್ ಕನ್ಸೋರ್ಟಿಯಂ ಬ್ಯಾಂಕ್‌ಗಳಿಂದ ಎಲ್ಲ ಜಮೀನುಗಳನ್ನು ಒತ್ತೆಯಾಗಿ ಪಡೆಯುತ್ತದೆ.

ಬೆಂಗಳೂರು ಮಾರ್ಗದ ಎರಡೂ ಬದಿಯಲ್ಲಿ ಲೇಪಾಕ್ಷಿ ಜಮೀನುಗಳು:ಅನಂತಪುರ ಜಿಲ್ಲೆಯ 4,191 ಎಕರೆ ಲೇಪಾಕ್ಷಿ ನಾಲೆಡ್ಜ್ ಹಬ್ ಜೊತೆಗೆ ಹೈದರಾಬಾದ್​ನಲ್ಲಿ ಅದರ ಅಂಗ ಸಂಸ್ಥೆಗಳ ಹೆಸರಿನಲ್ಲಿ ಬೆಲೆಬಾಳುವ ಜಮೀನು ಹಾಗೂ ಷೇರುಗಳಿವೆ. ಬೆಂಗಳೂರಿನಿಂದ ಹೈದರಾಬಾದ್‌ಗೆ ಹೋಗುವ ಮಾರ್ಗದಲ್ಲಿ ಆಂಧ್ರಪ್ರದೇಶದ ಗಡಿಯಿಂದ ಆರಂಭವಾಗಿ 18 ಕಿ.ಮೀ ವ್ಯಾಪ್ತಿಯಲ್ಲಿ ರಸ್ತೆಯ ಎರಡೂ ಬದಿಯಲ್ಲಿ ಲೇಪಾಕ್ಷಿ ಜಮೀನುಗಳಿವೆ.

ಆಂಧ್ರದ ಗಡಿಯಿಂದ ಕರ್ನಾಟಕದ ಕಡೆಗೆ ಸುಮಾರು 65 ಕಿ.ಮೀ ದೂರದಲ್ಲಿ ಬೆಂಗಳೂರು ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣವು ಇದೇ ರಸ್ತೆಯಲ್ಲಿದೆ. ಅಂದರೆ, ರಿಯಲ್ ಎಸ್ಟೇಟ್ ದೃಷ್ಟಿಕೋನದಿಂದ ಈ ಭೂಮಿಗಳು ಎಷ್ಟು ಮೌಲ್ಯಯುತವಾಗಿವೆ ಎಂಬುದನ್ನು ನಾವು ಅರ್ಥಮಾಡಿಕೊಳ್ಳಬಹುದು. ಲೇಪಾಕ್ಷಿ ಭೂ ಹಗರಣಕ್ಕೆ ಸಂಬಂಧಿಸಿದಂತೆ 2013ರಲ್ಲಿ ಸಿಬಿಐ ಸಲ್ಲಿಸಿದ್ದ ಚಾರ್ಜ್‌ಶೀಟ್‌ನಲ್ಲೇ ಅವುಗಳ ಮೌಲ್ಯ ಅಂದು ಎಕರೆಗೆ ಸರಾಸರಿ 15 ಲಕ್ಷ ರೂ. ಆಗಿದ್ದು, ಒಟ್ಟಾರೆ 8,844 ಎಕರೆಯ ಒಟ್ಟು ಮೌಲ್ಯ 1,326.60 ಕೋಟಿ ರೂಪಾಯಿ ಆಗಲಿದೆ ಎಂದು ಸ್ಪಷ್ಟವಾಗಿ ಹೇಳಲಾಗಿದೆ.

ಪ್ರಸ್ತುತ ದಿವಾಳಿ ಪ್ರಕ್ರಿಯೆಯ ಪ್ರಕಾರ ಅರ್ಥಿನ್ ಪ್ರಾಜೆಕ್ಟ್ಸ್ ಒಡೆತನಕ್ಕೆ ಬರಲಿರುವ 4,191 ಎಕರೆಯ ಮೌಲ್ಯ 2013ರ ಅಂದಾಜಿನ ಪ್ರಕಾರ 628.65 ಕೋಟಿ ರೂ.ಗಳಾಗಿದ್ದು, ಈ ಒಂಬತ್ತು ವರ್ಷಗಳಲ್ಲಿ ಕ್ಷೇತ್ರದಲ್ಲಿ ಹಲವು ಬದಲಾವಣೆಗಳಾಗಿವೆ. ಆಂಧ್ರಪ್ರದೇಶದ ಗಡಿಯಿಂದ ಹೈದರಾಬಾದ್ ಕಡೆಗೆ 25 ಕಿ.ಮೀ. ದೂರದಲ್ಲಿ ಕಿಯಾ ಕಾರು ಉದ್ಯಮ ತಲೆ ಎತ್ತಿದೆ. ಸುತ್ತ-ಮುತ್ತಲಿನ ಪ್ರದೇಶಗಳಲ್ಲಿ ಹಲವಾರು ಕೈಗಾರಿಕೆಗಳು ಸಹ ಬಂದಿವೆ. ಪರಿಣಾಮವಾಗಿ ಭೂಮಿಯ ಮೌಲ್ಯವು ಸಹಜವಾಗಿಯೇ ಹೆಚ್ಚಾಗಿದೆ. ಪ್ರಸ್ತುತ ಲೇಪಾಕ್ಷಿ ನಾಲೆಡ್ಜ್ ಹಬ್ ಪ್ರದೇಶದಲ್ಲಿ ಪೆರಿಫೆರಲ್ ಜಮೀನುಗಳು 1 ಕೋಟಿ ರೂ.ವರೆಗೆ ಮೌಲ್ಯದ್ದಾಗಿದ್ದು, ಒಳಭಾಗದ ಜಮೀನುಗಳು 30 ರಿಂದ 40 ಲಕ್ಷ ರೂ. ಮೌಲ್ಯ ಹೊಂದಿವೆ.

ಹೈದರಾಬಾದ್​ನಲ್ಲಿ ಎಷ್ಟು ಆಸ್ತಿ?: ಬ್ಯಾಂಕ್‌ಗಳಲ್ಲಿ ಇಂದೂ ಪ್ರಾಜೆಕ್ಟ್‌ಗಳ ಜಾಮೀನುಗಳಲ್ಲಿ ಹೈದರಾಬಾದ್‌ನ ದುರ್ಗಂ ಚೆರುವುನಲ್ಲಿ ಐದು ಎಕರೆ ಜಮೀನು ವಿಕೆ ಪ್ರಾಜೆಕ್ಟ್‌ಗೆ ಸೇರಿದೆ. ಸಿಂಧೂರ ಮತ್ತು ಅಸ್ತಿವಾ ಕಂಪನಿಗಳು ಮಿಯಾಪುರದಲ್ಲಿ 11.3 ಎಕರೆ, ಶಮೀರ್‌ಪೇಟ್‌ನಲ್ಲಿ ಸುಂದರಿ ಕಂಪನಿ ಹೆಸರಿನಲ್ಲಿ 35 ಎಕರೆ, ಕುಕಟ್‌ಪಲ್ಲಿಯ ಇಂದೂ ಫಾರ್ಚೂನ್ ಫೀಲ್ಡ್‌ನಲ್ಲಿ 2,595.69 ಗಜಗಳ ಕ್ಲಬ್ ಹೌಸ್, ಸೈಬರಾಬಾದ್ ಹೈಟೆಕ್ ಇಂಟಿಗ್ರೇಟೆಡ್ ಟೌನ್‌ಶಿಪ್ ಡೆವಲಪ್​ಮೆಂಟ್​ ಕಾರ್ಪೊರೇಷನ್ ಪ್ರೈವೇಟ್ ಲಿಮಿಟೆಡ್‌ನಲ್ಲಿ ಷೇರುಗಳನ್ನು ಹೊಂದಿವೆ.

ಈ ಪೈಕಿ ದುರ್ಗಂ ಚೆರುವಿನಲ್ಲಿ ಐದು ಎಕರೆ ಜಮೀನಿನ ಮೌಲ್ಯವೇ 400 ಕೋಟಿ ರೂ.ಗೂ ಅಧಿಕವಾದರೆ, ಮಿಯಾಪುರದ 11 ಎಕರೆ ಜಮೀನು 200 ಕೋಟಿ ಎಂದು ಅಂದಾಜಿಸಲಾಗಿದೆ. ಶಾಮೀರ್ ಪೇಟೆಯಲ್ಲಿರುವ 35 ಎಕರೆ ಮೌಲ್ಯ 200 ಕೋಟಿ ರೂ. ಷೇರುಗಳಂತಹ ಇತರ ಸ್ವತ್ತುಗಳು ಸಹ ಮೌಲ್ಯಯುತವಾಗಿವೆ. ಇವೆಲ್ಲವುಗಳ ಕೇವಲ 477 ಕೋಟಿ ರೂ.ಗೆ ಮನ್ನಾ ಮಾಡಲು ಬ್ಯಾಂಕ್​ಗಳು ಸಿದ್ಧವಾಗಿರುವುದು ಗಮನಾರ್ಹ.

ಸಾಮಾನ್ಯರು ಮನೆ ಖರೀದಿಸಲು ಸಾಲ ಮಾಡಿ ಕಂತು ಕಟ್ಟಲು ವಿಫಲರಾದರೆ ಪತ್ರಿಕೆಗಳಲ್ಲಿ ಪ್ರಕಟಿಸಿ ಬ್ಯಾಂಕ್​ಗಳು ಆಸ್ತಿ ಹರಾಜು ಹಾಕುತ್ತವೆ. ಈ ಆಸ್ತಿಗಳಲ್ಲೂ ಪ್ರತ್ಯೇಕವಾಗಿ ಹರಾಜು ವಿಧಾನವನ್ನು ಅನುಸರಿಸಿದರೆ ಬ್ಯಾಂಕ್‌ಗಳು ನೀಡುವ ಬಡ್ಡಿ ಮತ್ತು ಸಾಲದ ಮೇಲೆ ಯಾವುದೇ ಪರಿಣಾಮ ಬೀರುವುದಿಲ್ಲ. ಆದರೆ, ಆ ಮಾರ್ಗವನ್ನು ಏಕೆ ತೆಗೆದುಕೊಂಡಿಲ್ಲ ಎಂಬುದನ್ನು ಬ್ಯಾಂಕ್‌ಗಳೇ ಹೇಳಬೇಕು.

ಇಂದೂ ಪ್ರಾಜೆಕ್ಟ್‌ಗಳು ಸಾಲದ ವಿವರ..

• ಬ್ಯಾಂಕ್ ಮತ್ತು ಸಾಲ (ಕೋಟಿಗಳಲ್ಲಿ)
• ಎಸ್‌ಬಿಐ - 996.62 ಕೋಟಿ ರೂ.
• ಐಡಿಬಿಐ - 803.10 ಕೋಟಿ ರೂ.
• ಎಡೆಲ್ವೀಸ್ ಆಸ್ತಿ ಪುನರ್​ನಿರ್ಮಾಣ - 451.46 ಕೋಟಿ ರೂ.
• ಬ್ಯಾಂಕ್ ಆಫ್ ಇಂಡಿಯಾ - 339.91 ಕೋಟಿ ರೂ.
• ಸಿಂಡಿಕೇಟ್ ಬ್ಯಾಂಕ್ - 217.18 ಕೋಟಿ ರೂ.
• ಪಂಜಾಬ್ ನ್ಯಾಷನಲ್ ಬ್ಯಾಂಕ್ - 223.33 ಕೋಟಿ ರೂ.
• ಕೆನರಾ ಬ್ಯಾಂಕ್ - 196.70 ಕೋಟಿ ರೂ.
• ಇಂಡಿಯನ್ ಓವರ್‌ಸೀಸ್ ಬ್ಯಾಂಕ್ - 243.87 ಕೋಟಿ ರೂ.
• ಯುಕೊ ಬ್ಯಾಂಕ್ - 193.77 ಕೋಟಿ ರೂ.
• ಸೆಂಟ್ರಲ್ ಬ್ಯಾಂಕ್ ಆಫ್ ಇಂಡಿಯಾ - 125.32 ಕೋಟಿ ರೂ.
• ಆಂಧ್ರ ಬ್ಯಾಂಕ್ - 151.65 ಕೋಟಿ ರೂ.
• ಆರ್​ಇಐ ಫೈನಾನ್ಸ್​ ಲಿಮಿಟೆಡ್​- 246.98 ಕೋಟಿ ರೂ.
• ಒಟ್ಟು - 4189.95 ಕೋಟಿ ರೂ.
• ಆಪರೇಷನಲ್​ ವೆಚ್ಚ - 291.34 ಕೋಟಿ ರೂ.

ಇಷ್ಟು ದೊಡ್ಡ ಮೊತ್ತದ ಸಾಲ ನೀಡಿರುವ ಬ್ಯಾಂಕ್​ಗಳು ದಿವಾಳಿ ಪ್ರಕ್ರಿಯೆ ಮೂಲಕ ಕೇವಲ 500 ಕೋಟಿ ರೂ.ಗಳು. ಅದರಲ್ಲಿ 23 ಕೋಟಿ ರೂ.ಗಳು ಇತರೆ ಪ್ರಕ್ರಿಯೆಗಳಿಗೆ ಹೋಗುವುದರಿಂದ ಬ್ಯಾಂಕ್‌ಗಳಿಗೆ ತಲುಪುವ ವಾಸ್ತವಿಕ ಮೊತ್ತ 477 ಕೋಟಿ ರೂ. ಮಾತ್ರ. ದಿವಾಳಿತನ ಪ್ರಕ್ರಿಯೆಯಲ್ಲಿ ಬ್ಯಾಂಕ್‌ಗಳು ಭರಿಸಬೇಕಾದ ನಷ್ಟದ ಪ್ರಮಾಣವನ್ನು ಇದು ತೋರಿಸುತ್ತದೆ.

ಅಸ್ತಿತ್ವದಲ್ಲಿರುವ ಆಸ್ತಿಗಳ ಮೌಲ್ಯವನ್ನು ಸಂಪೂರ್ಣವಾಗಿ ನಿರ್ಲಕ್ಷಿಸಿ ಬ್ಯಾಂಕುಗಳು ದಿವಾಳಿತನ ಪ್ರಕ್ರಿಯೆಯನ್ನು ಒಪ್ಪಿಕೊಂಡಿವೆ ಎಂಬುದು ಸ್ಪಷ್ಟವಾಗಿದೆ. ಮತ್ತು ಈ ಭೂಮಿಯನ್ನು ಅಗ್ಗವಾಗಿ ಪಡೆಯುವ ಕಂಪನಿಯು ಆಂಧ್ರಪ್ರದೇಶದ ಹಾಲಿ ಮುಖ್ಯಮಂತ್ರಿ ವೈ ಎಸ್ ಜಗನ್​ಮೋಹನ ರೆಡ್ಡಿ ಅವರ ಕುಟುಂಬಕ್ಕೆ ಸೇರಿದೆ ಎಂಬುದೇ ಪ್ರಮುಖವಾದ ಅಂಶ.

ಚಿಕ್ಕ ಕಂಪನಿಗೆ ದೊಡ್ಡ ವ್ಯವಹಾರ: ಅರ್ಥಿನ್​ ಸಂಸ್ಥೆಗೆ ನಿರ್ದೇಶಕರಾಗಿ ಸೇರಿದ ನರೇನ್ ರಾಮಾಂಜುಲಾ ರೆಡ್ಡಿ ಅವರ ತಂದೆ ರವೀಂದ್ರನಾಥ್ ರೆಡ್ಡಿ ಅವರೊಂದಿಗೆ ಜಗನ್ ನಿಕಟ ಸಂಬಂಧ ಹೊಂದಿದ್ದಾರೆ. ಈಗ ಅವರ ಮಗ ಅರ್ಥಿನ್ ಪ್ರಾಜೆಕ್ಟ್‌ನಲ್ಲಿ ನಿರ್ದೇಶಕರಾಗಿ ಸೇರಿಕೊಂಡಿದ್ದಾರೆ ಮತ್ತು ಕಡಿಮೆ ದರದಲ್ಲಿ ಲೇಪಾಕ್ಷಿ ಭೂಮಿಯನ್ನು ಸ್ವಾಧೀನಪಡಿಸಿಕೊಳ್ಳುತ್ತಿದ್ದಾರೆ.

ಇದಲ್ಲದೆ, ಅರ್ಥಿನ್ ಪ್ರಾಜೆಕ್ಟ್ಸ್ ತುಂಬಾ ಸಾಮಾನ್ಯ ಕಂಪನಿಯಾಗಿದೆ. 2021ರ ಹಣಕಾಸು ವರ್ಷದಲ್ಲಿ ಕಂಪನಿಯ ಒಟ್ಟು ಆಸ್ತಿ ಕೇವಲ 4.49 ಕೋಟಿ ರೂ.ಗಳಾಗಿದ್ದು, ಅದರ ವ್ಯವಹಾರ ಸಾಮರ್ಥ್ಯ ಕೇವಲ 21.92 ಕೋಟಿ ರೂ. ಅಂತಹ ಕಂಪನಿಯು ದಿವಾಳಿತನದ ಪ್ರಕ್ರಿಯೆಯಲ್ಲಿ ಪಾಲ್ಗೊಳ್ಳುವುದರ ಹಿಂದೆ ಯಾರ ಪ್ರೋತ್ಸಾಹ ಮತ್ತು ಯಾವ ಮಟ್ಟದ ಬೆಂಬಲ ಹೊಂದಿದೆ ಎಂಬುದನ್ನು ಅರ್ಥಮಾಡಿಕೊಳ್ಳುವುದು ಕಷ್ಟವೇನಲ್ಲ.

ಲೇಪಾಕ್ಷಿ ನಾಲೆಡ್ಜ್ ಹಬ್ ಹಗರಣದ ಆರೋಪಿ ರಾಜ್ಯದ ಮುಖ್ಯಮಂತ್ರಿಯಾಗಿರುವ ವಿಚಿತ್ರ ಸನ್ನಿವೇಶ ರಾಜ್ಯದಲ್ಲಿದೆ. ಈ ಆದೇಶದಲ್ಲಿ ಲೇಪಾಕ್ಷಿ ಜಮೀನು ಇಡಿಯಿಂದ ಖಾಸಗಿ ಕಂಪನಿಗೆ ವರ್ಗಾವಣೆಯಾಗಿದ್ದು, ಸರ್ಕಾರಕ್ಕೆ ಅಲ್ಲ. ಯೋಜಿತ ಸ್ಕೆಚ್ ಪ್ರಕಾರ, ಮುಖ್ಯಮಂತ್ರಿ ಅವರ ಚಿಕ್ಕಪ್ಪನ ಮಗ ನಿರ್ದೇಶಕನಾಗಿ ಸೇರಿಕೊಂಡಿದ್ದಾರೆ. ಜನರ ಆಸ್ತಿಯನ್ನು ರಕ್ಷಿಸಬೇಕಾದ ಸರ್ಕಾರವು ತನ್ನ ಜವಾಬ್ದಾರಿಯನ್ನು ಸಂಪೂರ್ಣವಾಗಿ ನಿರ್ಲಕ್ಷಿಸಿರುವುದು ಬಹುಶಃ ಇದಕ್ಕಾಗಿಯೇ ಇರಬೇಕು ಎಂಬ ಸಂಶಯ ವ್ಯಕ್ತವಾಗುತ್ತಿದೆ.