ನಹಾನ್ (ಹಿಮಾಚಲ ಪ್ರದೇಶ): ಪೆನ್ನು ಖಡ್ಗಕ್ಕಿಂತ ಹೆಚ್ಚು ಶಕ್ತಿಶಾಲಿ ಎಂಬ ಮಾತನ್ನು ನೀವೆಲ್ಲರೂ ಕೇಳಿರಬಹುದು. ನೀವೀಗ ಈ ಮಾತಿನ ಸಾಕ್ಷಾತ್ ರೂಪವನ್ನೂ ನೋಡಬಹುದು. ರಾಜ್ಯದ ಸಿರ್ಮೌರ್ನ ಶಿಕ್ಷಕ ಸಂಜೀವ್ ಅತ್ರಿ ಎಂಬುವರು ಖಡ್ಗಕ್ಕಿಂತ ದೊಡ್ಡದಾಗಿರುವ ಪೆನ್ನನ್ನು ತಯಾರಿಸಿದ್ದಾರೆ. ಹಿಮಾಚಲದಲ್ಲಿ ತಯಾರಾದ ಈ ಇಂಕ್ ಪೆನ್ ವಿಶ್ವದ ಅತಿ ದೊಡ್ಡ ಇಂಕ್ ಪೆನ್ ಎಂದು ಹೇಳಲಾಗುತ್ತಿದೆ. ಈ 20 ಅಡಿ ಉದ್ದದ ಪೆನ್ ಕೇವಲ ಶೋಪೀಸ್ ಅಲ್ಲ. ಇದರಲ್ಲಿ ಶಾಯಿ ಕೂಡ ಇರುತ್ತದೆ ಮತ್ತು ಇದರಿಂದ ಬರೆಯಬಹುದು. ಆದರೆ ಈ ದೈತ್ಯ ಇಂಕ್ ಪೆನ್ನನ್ನು ಎತ್ತಲು ಮಾತ್ರ ಸಾಕಷ್ಟು ಬೆವರು ಸುರಿಸಬೇಕಾಗುತ್ತದೆ. ಇಂದು ಅಂದರೆ ಶನಿವಾರದಂದು ಈ ಪೆನ್ನನ್ನು ಮಕ್ಕಳಿಗೆ ಸಮರ್ಪಿಸಲಾಗುವುದು. ನಹಾನ್ ಶಾಸಕ ಡಾ. ರಾಜೀವ್ ಬಿಂದಾಲ್ ಈ ಪೆನ್ ಬಿಡುಗಡೆ ಮಾಡಲಿದ್ದಾರೆ.
ಮಕ್ಕಳಿಗೆ ಪಾಠ ಮಾಡುವ ಪೆನ್:ಬೋಧನೆ ಮತ್ತು ಕಲಿಕೆಯನ್ನು ನೀಡುವ ರೀತಿಯಲ್ಲಿ ಈ ಪೆನ್ ಅನ್ನು ವಿಶಿಷ್ಟ ಕೌಶಲ್ಯದ ಅಡಿಯಲ್ಲಿ ಸಿದ್ಧಪಡಿಸಲಾಗಿದೆ ಎಂದು ಸಂಜೀವ್ ಅತ್ರಿ ಹೇಳಿದರು. ಪೆನ್ನಿನ ವಿಶೇಷತೆ ಏನೆಂದರೆ ಈ ಪೆನ್ ನಲ್ಲಿ ಸೌಂಡ್ ಸೆನ್ಸರ್ ಅಳವಡಿಸಲಾಗಿದೆ. ಒಂದು ವೇಳೆ ಶಿಕ್ಷಕರು ಮರುದಿನ ರಜೆ ತೆಗೆದುಕೊಳ್ಳಲು ಬಯಸಿದರೆ, ಅವರು ತಮ್ಮ ಪಾಠವನ್ನು ರೆಕಾರ್ಡ್ ಮಾಡಿ ಶಾಲಾ ಆಡಳಿತ ಮಂಡಳಿಗೆ ಮೊಬೈಲ್ ಮೂಲಕ ಕಳುಹಿಸುತ್ತಾರೆ. ಇದರ ನಂತರ, ಧ್ವನಿ ಸಂವೇದಕದ ಸಹಾಯದಿಂದ ರೆಕಾರ್ಡ್ ಮಾಡಿದ ಪಾಠವನ್ನು ಪೆನ್‌ಗೆ ಕಳುಹಿಸಲಾಗುತ್ತದೆ. ಮರುದಿನ ಮಕ್ಕಳನ್ನು ಪೆನ್ನಿನ ಬಳಿ ಕೂರಿಸಿ ರಜೆ ಮೇಲೆ ಹೋಗಿರುವ ಶಿಕ್ಷಕರ ದನಿಯಲ್ಲಿ ಪಾಠ ಹೇಳಿಕೊಡುವ ಮೂಲಕ ಸೆನ್ಸರ್ ಕೆಲಸ ಮಾಡಲಿದೆ. ಅಂದರೆ ಶಿಕ್ಷಕರ ಅನುಪಸ್ಥಿತಿಯಲ್ಲಿ ಪೆನ್ ಮಕ್ಕಳಿಗೆ ಪಾಠ ಮಾಡುತ್ತದೆ.
ಪ್ರಾರ್ಥನೆ ಹೇಳುತ್ತೆ ಪೆನ್: ನೌರಂಗಾಬಾದ್ ಶಾಲೆಯಲ್ಲಿ ಪಿಟಿಐ ಇಲ್ಲದ ಕಾರಣ ಇದೀಗ ಈ ದೊಡ್ಡ ಪೆನ್ ಶಾಲೆಯಲ್ಲಿ ಪ್ರಾರ್ಥನೆ ನಡೆಸಲು ನೆರವಾಗಲಿದೆ. ಇದು ಬಿಡುವಿನ ವೇಳೆಯಲ್ಲಿ ಮಕ್ಕಳಿಗೆ ಕಥೆ ಹೇಳುತ್ತದೆ. ಮಕ್ಕಳು ಈ ಲೇಖನಿಯಿಂದ ಹಾಡು ಕೂಡ ಕೇಳಬಹುದು. ಈ ಪೆನ್ ಅನ್ನು ಸೌರಶಕ್ತಿಯಿಂದ ಚಾರ್ಜ್ ಮಾಡಬಹುದು. ಇನ್ನು ರಾತ್ರಿ ವೇಳೆಯಲ್ಲಿ ಇದನ್ನು ಬೆಳಕಿಗಾಗಿ ಬ್ಯಾಟರಿ ರೀತಿಯಲ್ಲೂ ಉಪಯೋಗಿಸಬಹುದು.
20 ಅಡಿ ಎತ್ತರ, 42 ಕೆ.ಜಿ ತೂಕ: ನೌರಂಗಾಬಾದ್, ದೌಲಕುವಾನ್‌ನ ಸರ್ಕಾರಿ ಪ್ರೌಢಶಾಲೆಯ ಮುಖ್ಯೋಪಾಧ್ಯಾಯ ಸಂಜೀವ್ ಅತ್ರಿ ಅವರು ತಯಾರಿಸಿದ ಈ ಇಂಕ್ ಪೆನ್ 20 ಅಡಿ ಉದ್ದ ಮತ್ತು 42 ಕೆ.ಜಿ. ಸುಮಾರು 1 ಅಡಿ ಅಗಲವಾಗಿದೆ. ಈ ಪೆನ್ ತಯಾರಿಸಲು ಮರ ಮತ್ತು ಕಬ್ಬಿಣವನ್ನು ಬಳಸಲಾಗಿದೆ. ಈ ಇಂಕ್ ಪೆನ್ ಜಗತ್ತಿನ ಅತಿ ಉದ್ದದ ಇಂಕ್ ಪೆನ್ ಎಂದು ಅತ್ರಿ ಹೇಳುತ್ತಾರೆ. ಇದನ್ನು ತಯಾರಿಸಲು 45 ಸಾವಿರ ರೂಪಾಯಿ ಖರ್ಚು ಮಾಡಲಾಗಿದೆ. 6 ಶಿಕ್ಷಕರು ಒಟ್ಟಾಗಿ ಈ ಪೆನ್ ತಯಾರಿಕೆಯ ಖರ್ಚು ಭರಿಸಿದ್ದಾರೆ.