ಹೈದರಾಬಾದ್: ಮಾರ್ಟಿನ್ ಲೂಥರ್ ಕಿಂಗ್ ದಿನವನ್ನು ಜನವರಿಯ ಮೂರನೇ ಸೋಮವಾರ ಆಚರಿಸಲಾಗುತ್ತದೆ. ಇವರ ದಿನವು ರಾಷ್ಟ್ರೀಯ ರಜಾದಿನವಾಗಿದ್ದು, ಇದು ಯುನೈಟೆಡ್ ಸ್ಟೇಟ್ಸ್ನ ಅತ್ಯಂತ ಪ್ರಸಿದ್ಧ ನಾಗರಿಕ ಹಕ್ಕುಗಳ ಕಾರ್ಯಕರ್ತರನ್ನು ಗೌರವಿಸುತ್ತದೆ.
ಮಾರ್ಟಿನ್ ಲೂಥರ್ ಕಿಂಗ್ (ಜೂನಿಯರ್) ಯಾರು?
ಮಾರ್ಟಿನ್ ಲೂಥರ್ ಕಿಂಗ್ ಜೂನಿಯರ್ ಒಬ್ಬ ಪ್ರಸಿದ್ಧ ನಾಗರಿಕ ಹಕ್ಕುಗಳ ಕಾರ್ಯಕರ್ತರಾಗಿದ್ದು, ಅವರು 1950 ಮತ್ತು 1960 ರ ದಶಕಗಳಲ್ಲಿ ಅಮೆರಿಕ ಸಮಾಜದ ಮೇಲೆ ಹೆಚ್ಚಿನ ಪ್ರಭಾವವನ್ನು ಹೊಂದಿದ್ದರು. ಗಾಂಧೀಜಿಯವರಿಂದ ಪ್ರಭಾವಿತರಾಗಿದ್ದ ಇವರು, ಅಹಿಂಸಾತ್ಮಕ ಚಳುವಳಿ ಹಾಗೂ ಸರಳ ನಡವಳಿಕೆಯಿಂದ ಪ್ರಸಿದ್ದರಾಗಿದ್ದರು.
ಆರಂಭಿಕ ಜೀವನದ ಬಗ್ಗೆ
ಮಾರ್ಟಿನ್ ಲೂಥರ್ ಕಿಂಗ್ ಜೂನಿಯರ್, ಮೂಲ ಹೆಸರು ಮೈಕೆಲ್ ಕಿಂಗ್ ಜೂನಿಯರ್ (ಜನನ: ಜನವರಿ 15, 1929. ಮರಣ: ಏಪ್ರಿಲ್ 4, 1968) ಅಮೆರಿಕ ಸಂಯುಕ್ತ ಸಂಸ್ಥಾನದ ಅಟ್ಲಾಂಟ ನಗರದಲ್ಲಿ ಜನಿಸಿದ ಇವರು, ಅಮೆರಿಕಾದ ವರ್ಣಬೇಧ ನೀತಿಯ ವಿರುದ್ದ ಹೋರಾಡಿದ ಪ್ರಮುಖ ಕಪ್ಪು ನಾಯಕರಲ್ಲಿ ಒಬ್ಬರು. ನಾಗರಿಕ ಹಕ್ಕುಗಳನ್ನು ಸಾಧಿಸಲು ಕಿಂಗ್ ದಕ್ಷಿಣದ ಕ್ರಿಶ್ಚಿಯನ್ ನಾಯಕತ್ವ ಸಮ್ಮೇಳನದ ಮುಖ್ಯಸ್ಥರಾಗಿ ರಾಷ್ಟ್ರ ಮಟ್ಟದಲ್ಲಿ ಪ್ರಸಿದ್ದರಾದರು. ಅಹಿಂಸಾತ್ಮಕ ತಂತ್ರಗಳ ಮೇಲೆ ನಂಬಿಕೆ ಇರಿಸಿ, ಅದರ ಮೂಲಕವೇ ಹೋರಾಟವನ್ನು ನಡೆಸಿದರ ಫಲವಾಗಿ, 1964 ರಲ್ಲಿ ನೊಬೆಲ್ ಶಾಂತಿ ಪ್ರಶಸ್ತಿ ನೀಡಿ ಗೌರವಿಸಲಾಗಿದೆ.
ನಾಗರಿಕ ಹಕ್ಕುಗಳ ಚಳವಳಿಗೆ ಮಾರ್ಟಿನ್ ಲೂಥರ್ ಕಿಂಗ್ ಕೊಡುಗೆ ಏನು?
ಕಿಂಗ್, ಜನಾಂಗವನ್ನು ಲೆಕ್ಕಿಸದೆ ಅಮೆರಿಕಕ್ಕೆ ಹೆಚ್ಚಿನ ಸಮಾನತೆಯನ್ನು ತರಲು ಮತ್ತು ಎಲ್ಲಾ ಜನರಿಗೆ ನಾಗರಿಕ ಹಕ್ಕುಗಳನ್ನು ಪಡೆದುಕೊಳ್ಳಲು ಶ್ರಮಿಸಿದ ನಾಯಕ. ಗಮನಾರ್ಹವಾಗಿ, ಅವರು ಅಹಿಂಸಾತ್ಮಕ ಪ್ರತಿಭಟನೆಯ ಮಹತ್ವವನ್ನು ಒತ್ತಿ ಹೇಳಿದ್ದಾರೆ.
ಕಿಂಗ್ಸ್ ಕೊಡುಗೆಗಳು ಮತ್ತು ಸಾಧನೆಗಳು
- 1955 ರ ಮಾಂಟ್ಗೊಮೆರಿ ಬಸ್ ಬಹಿಷ್ಕಾರದಲ್ಲಿ ನಾಯಕತ್ವವನ್ನು ವಹಿಸಿಕೊಂಡಿದ್ದರು.
- 1957 ರಲ್ಲಿ, ಅಹಿಂಸೆಯನ್ನು ಬೆಂಬಲಿಸುವ ನಾಗರಿಕ ಹಕ್ಕುಗಳ ಸಂಘಟನೆಯಾದ ಸದರ್ನ್ ಕ್ರಿಶ್ಚಿಯನ್ ಲೀಡರ್‌ಶಿಪ್ ಕಾನ್ಫರೆನ್ಸ್ (ಎಸ್‌ಸಿಎಲ್‌ಸಿ) ಸ್ಥಾಪಿಸುವಲ್ಲಿ ಪ್ರಮುಖ ಪಾತ್ರ ವಹಿಸಿದ್ದಾರೆ.
- 1963 ರ ಮಾರ್ಚ್-ವಾಷಿಂಗ್ಟನ್‌ನಲ್ಲಿ ಅವರ ಪ್ರಸಿದ್ಧ 'ಐ ಹ್ಯಾವ್ ಎ ಡ್ರೀಮ್' ಭಾಷಣವನ್ನು ಮಾಡಿರುವ ಕೀರ್ತಿ ಇವರಿಗಿದೆ.
- 1968 ರಲ್ಲಿ ನಡೆದ ಮೆಂಫಿಸ್ ನೈರ್ಮಲ್ಯ ಕಾರ್ಮಿಕರ ಮುಷ್ಕರದಲ್ಲಿ ಅಹಿಂಸಾತ್ಮಕ ಪ್ರತಿಭಟನೆಯ ವಕೀಲರಾಗಿ ಕೆಲಸ ಮಾಡಿದ್ದಾರೆ.
ನನಗೆ ಒಂದು ಕನಸಿದೆ
ನನ್ನ ನಾಲ್ಕು ಪುಟ್ಟ ಮಕ್ಕಳು ತಮ್ಮ ಚರ್ಮದಿಂದಲ್ಲದೇ, ತಮ್ಮ ಗುಣನಡೆತೆಯಿಂದಲೇ ಮಾನ್ಯತೆ ಪಡೆಯುವ ದೇಶದಲ್ಲಿ ಜೀವಿಸುವಂತಾಗಲಿ ಎಂಬುದು ನನ್ನ ಕನಸು ಎಂಬ ಸಾಲುಗಳು ಬಹಳಷ್ಟು ಪ್ರಸಿದ್ಧಿಯನ್ನು ಪಡೆದಿದೆ.
ಇವರ ಕಾಲದಲ್ಲಿ ಜಾರಿಗೆ ಬಂದ ಕೆಲವು ಕಾಯ್ದೆಗಳ ವಿವರ ಇಲ್ಲಿದೆ:
- 1964 ರ ನಾಗರಿಕ ಹಕ್ಕುಗಳ ಕಾಯ್ದೆ - ಇದು "ಜನಾಂಗ, ಬಣ್ಣ, ಧರ್ಮ, ಅಥವಾ ರಾಷ್ಟ್ರೀಯ ಮೂಲದ ಆಧಾರದ ಮೇಲೆ ಉದ್ಯೋಗ ಮತ್ತು ಸಾರ್ವಜನಿಕ ವಸತಿಗಳಲ್ಲಿ ತಾರತಮ್ಯವನ್ನು ನಿಷೇಧಿಸಿತು.
- 1965 ರ ಮತದಾನದ ಹಕ್ಕು ಕಾಯ್ದೆ - ಈ ಕಾಯ್ದೆಯು ಮತದಾನದ ಹಕ್ಕನ್ನು ಪುನಃಸ್ಥಾಪಿಸಿತು ಮತ್ತು ರಕ್ಷಿಸಿತು.
- 1965 ರ ವಲಸೆ ಮತ್ತು ರಾಷ್ಟ್ರೀಯತೆ ಸೇವೆಗಳ ಕಾಯ್ದೆ - ಇದು ಸಾಂಪ್ರದಾಯಿಕ ಯುರೋಪಿಯನ್ ದೇಶಗಳನ್ನು ಹೊರತುಪಡಿಸಿ ಇತರ ಗುಂಪುಗಳಿಂದ ವಲಸೆ ಹೋಗಲು ಅನುವು ಮಾಡಿಕೊಡುತ್ತದೆ.
- 1968 ರ ನ್ಯಾಯಯುತ ವಸತಿ ಕಾಯ್ದೆ - ಇದು ಮಾರಾಟ ಅಥವಾ ಬಾಡಿಗೆ ಎರಡರಲ್ಲೂ ವಸತಿ ತಾರತಮ್ಯವನ್ನು ನಿಷೇಧಿಸಿತು.
ಮಾರ್ಟಿನ್ ಲೂಥರ್ ಕಿಂಗ್ (ಜೂನಿಯರ್) ಸಾವು
ಏಪ್ರಿಲ್ 4, 1968 ರ ಸಂಜೆ ಮಾರ್ಟಿನ್ ಲೂಥರ್ ಕಿಂಗ್ ಜೂನಿಯರ್ ಕಾರ್ಮಿಕರ ಮುಷ್ಕರವನ್ನು ಬೆಂಬಲಿಸಲು ತನ್ನ ಟೆನ್ನೆಸ್ಸೀಯ ಮೆಂಫಿಸ್‌ನಲ್ಲಿರುವ ಲೋರೆನ್ ಹೋಟೆಲ್ನ 2ನೇ ಅಂತಸ್ತಿನ ಬಾಲ್ಕನಿಯಲ್ಲಿ ನಿಂತಿದ್ದರು. ಆ ಸಂದರ್ಭದಲ್ಲಿ ಹಂತಕನ ಗುಂಡಿಗೆ ಬಲಿಯಾಗಿ ಹುತಾತ್ಮರಾದರು. ಅವರಿಗೆ ಆಗ ಕೇವಲ 39 ವರ್ಷ.
ನಾವು ಮಾರ್ಟಿನ್ ಲೂಥರ್ ಕಿಂಗ್ (ಜೂನಿಯರ್) ದಿನವನ್ನು ಏಕೆ ನೆನಪಿಸಿಕೊಳ್ಳುತ್ತೇವೆ?
ಜನವರಿ 18, ಸೋಮವಾರ. ಮಾರ್ಟಿನ್ ಲೂಥರ್ ಕಿಂಗ್ ಅವರ ಜನ್ಮದಿನದ ಗೌರವಾರ್ಥ ಫೆಡರಲ್ ರಜಾದಿನದ 35 ನೇ ವಾರ್ಷಿಕೋತ್ಸವವನ್ನು ಸೂಚಿಸುತ್ತದೆ. 1983 ರಲ್ಲಿ ಕಾನೂನಿಗೆ ಸಹಿ ಮಾಡಿ 1986 ರಲ್ಲಿ ಮೊದಲ ಬಾರಿಗೆ ಆಚರಿಸಲ್ಪಟ್ಟ ಈ ರಜಾದಿನವು, ಅಹಿಂಸಾತ್ಮಕ ಪ್ರತಿಭಟನೆಯ ಮೂಲಕ ನಾಗರಿಕ ಹಕ್ಕುಗಳು ಮತ್ತು ಸಾಮಾಜಿಕ ನ್ಯಾಯವನ್ನು ಮುಂದುವರೆಸಿದ್ದಕ್ಕಾಗಿ ಕಿಂಗ್ಗೆ ಅರ್ಹವಾದ ಗೌರವವಾಗಿದೆ.ಜಾರ್ಜ್ ವಾಷಿಂಗ್ಟನ್ ಅವರ ಜನ್ಮದಿನದ ಆಚರಣೆಯ ನಂತರ ಫೆಡರಲ್ ರಜಾದಿನವೆಂದು ಗೊತ್ತುಪಡಿಸಿದ 2ನೇ ಜನ್ಮದಿನವೆಂದರೆ ಅದು ಕಿಂಗ್ಗೆ ಸಿಕ್ಕಿರುವ ಗೌರವವಾಗಿದೆ.
