ರಷ್ಯಾದಿಂದ ಭಾರತಕ್ಕೆ ಬಂದ ಗೇಮ್​ ಚೇಂಜರ್​ ಸ್ಪುಟ್ನಿಕ್​​-ವಿ ಲಸಿಕೆ.. ಕೋವಿಡ್​ ಹೋರಾಟಕ್ಕೆ ಆನೆಬಲ!

ಡೆಡ್ಲಿ ವೈರಸ್​ ವಿರುದ್ಧ ಹೋರಾಡಲು ಇದೀಗ ಭಾರತಕ್ಕೆ ಮತ್ತೊಂದು ರಾಮಬಾಣ ಸಿಕ್ಕಿದ್ದು, ರಷ್ಯಾದಿಂದ ಸ್ಪುಟ್ನಿಕ್​​-ವಿ ಲಸಿಕೆ ಮೊದಲ ಬ್ಯಾಚ್​ ಆಗಮನವಾಗಿದೆ.

ಹೈದರಾಬಾದ್​: ದೇಶದಲ್ಲಿ ಮಹಾಮಾರಿ ಕೊರೊನಾ ವೈರಸ್​ ಜೋರಾಗಿದ್ದು, ಇದರ ಬೆನ್ನಲ್ಲೇ ಇದೀಗ ಭಾರತಕ್ಕೆ ರಷ್ಯಾದಿಂದ ಸ್ಪುಟ್ನಿಕ್​-ವಿ ಕೋವಿಡ್​ ಲಸಿಕೆಯ ಮೊದಲ ಬ್ಯಾಚ್​​ ಆಗಮನವಾಗಿದೆ. ಇದರ ಬಳಕೆಗೆ ಏಪ್ರಿಲ್​ 12ರಂದೇ ಡಿಸಿಜಿಐ ಗ್ರೀನ್​ ಸಿಗ್ನಲ್​ ನೀಡಿದೆ.

ಇಂದು ಬೆಳಗ್ಗೆ ರಷ್ಯಾದಿಂದ ಹೊರಟು ಇದೀಗ ಹೈದರಾಬಾದ್​ ಏರ್​ಪೋರ್ಟ್​ಗೆ​ ಎರಡು ಲಕ್ಷ ಡೋಸ್ ಹೊತ್ತ ವಿಮಾನ​ ಆಗಮನವಾಗಿದೆ. ಮೇ ಎರಡನೇ ಹಾಗೂ ಕೊನೆಯ ವಾರದಲ್ಲಿ ಹೆಚ್ಚಿನ ಪ್ರಮಾಣದಲ್ಲಿ ಲಸಿಕೆಗಳು ಆಗಮನವಾಗುವ ಸಾಧ್ಯತೆ ಇದೆ. ದೇಶಾದ್ಯಂತ ಇಂದಿನಿಂದ ಮೂರನೇ ಹಂತದ ಕೋವಿಡ್​​ ಅಭಿಯಾನಕ್ಕೆ ಚಾಲನೆ ಸಿಕ್ಕಿದ್ದು, ಇದರ ಮಧ್ಯೆ ರಷ್ಯಾದಲ್ಲಿ ಅಭಿವೃದ್ಧಿಗೊಂಡಿರುವ ಸ್ಪುಟ್ನಿಕ್​ ಭಾರತಕ್ಕೆ ಬಂದಿದೆ.

ಇದನ್ನ ಸೆಂಟ್ರಲ್​ ಡ್ರಗ್ಸ್​​ ಲ್ಯಾಬೋರೇಟರಿ ಕಸೂಲಿಗೆ ಹಸ್ತಾಂತರ ಮಾಡಲಾಗುವುದು. ತದನಂತರ ಅನುಮೊದನೆ ಪಡೆದುಕೊಂಡು ಜನರಿಗೆ ಹಸ್ತಾಂತರ ಮಾಡುವ ಸಾಧ್ಯತೆ ಇದೆ.

ಇದೀಗ ದೇಶಿಯ ಲಸಿಕೆಗಳಾದ ಕೋವಿಶೀಲ್ಡ್ ಹಾಗೂ ಕೊವ್ಯಾಕ್ಸಿನ್ ಜತೆಗೆ ಸ್ಪುಟ್ನಿಕ್​ ಕೂಡ ಮಹಾಮಾರಿ ವಿರುದ್ಧ ಹೋರಾಡಲಿದೆ. ದೇಶದಲ್ಲಿ ಕೋವಿಡ್ ಸೋಂಕಿನ‌ ವಿರುದ್ಧ ನೀಡಲಾಗುತ್ತಿರುವ 3ನೇ ಲಸಿಕೆ ಇದಾಗಿದ್ದು, ಇದು ಶೇ. 90 ರಷ್ಟು ಪರಿಣಾಮಕಾರಿಯಾಗಿದೆ ಎಂಬ ಮಾಹಿತಿ ಈಗಾಗಲೇ ಲಭ್ಯವಾಗಿದೆ.

ಸ್ಪುಟ್ನಿಕ್​​ ಲಸಿಕೆ ಗಮಾಲಿಯಾ ನ್ಯಾಷನಲ್​ ರಿಸರ್ಚ್​ ಇನ್ಸ್​ಟಿಟ್ಯೂಟ್​​ ಆಫ್​ ಎಪಿಡೆಮಿಯಾನಾಲೊಜಿ ಅಂಡ್​ ಮೈಕ್ರೋಬಯೋಲಜಿ ಸಂಸ್ಥೆಯಲ್ಲಿ ಅಭಿವೃದ್ಧಿಗೊಂಡಿದೆ. ಭಾರತದ ಐದು ಔಷಧ ಕಂಪನಿಗಳು ಒಟ್ಟು 85 ಕೋಟಿ ಡೋಸ್ ಲಸಿಕೆಗೆ ರಷ್ಯಾ ಜತೆ ಒಡಂಬಡಿಕೆ ಮಾಡಿಕೊಂಡಿವೆ.