ವರನ ಮೂಗು ಚಿಕ್ಕದು ಅಂತ ಮದುವೆ ಕ್ಯಾನ್ಸಲ್ ಮಾಡಿದ ವಧು!

ಮದುವೆ ಸಮಾರಂಭದಲ್ಲಿ ಪಾಲ್ಗೊಳ್ಳಲು ಮನೆಯಲ್ಲಿ ಅತಿಥಿಗಳ ದಂಡೇ ನೆರೆದಿತ್ತು. ಈ ನಡುವೆ ವಧುವಿನ ಆ ಒಂದು ಮಾತಿನಿಂದ ಮದುವೆ ಮನೆಯಲ್ಲಿ ಆಕಾಶವೇ ಕಳಚಿ ಬಿದ್ದಂತಾಯಿತು. ವರ ಮತ್ತು ವಧುವಿನ ಕಡೆಯವರಿಬ್ಬರೂ ವಧುವಿನ ಮಾತಿನಿಂದ ಸ್ತಬ್ಧರಾದರು.

ಸಂಭಲ್ (ಉತ್ತರ ಪ್ರದೇಶ): ರಾಜ್ಯದ ಸಂಭಲ್ ಜಿಲ್ಲೆಯಲ್ಲೊಂದು ವಿಚಿತ್ರ ಘಟನೆ ಜರುಗಿದೆ. ತಾನು ಮದುವೆಯಾಗಲಿರುವ ವರನ ಮೂಗು ಚಿಕ್ಕದಾಗಿದೆಯೆಂದು ವಧು ಮದುವೆ ತಿರಸ್ಕರಿಸಿದ ಘಟನೆ ಇದಾಗಿದೆ. ವರನ ಮೂಗು ಚಪ್ಪಟೆ ಮತ್ತು ಚಿಕ್ಕದಾಗಿದೆ, ಆದ್ದರಿಂದ ಆತನನ್ನು ಮದುವೆಯಾಗಲಾರೆ ಎಂದು ವಧು ಹೇಳಿದ್ದಾಳೆ. ವಧು ಹಠ ಹಿಡಿದ ನಂತರ ಹಿರಿಯರು ಆಕೆಯ ಮನವೊಲಿಸಲು ಸಾಕಷ್ಟು ಪ್ರಯತ್ನಪಟ್ಟರೂ ಸಾಧ್ಯವಾಗಲಿಲ್ಲ. ಕೊನೆಗೆ ಮದುವೆಗೆ ವಧು ಇಲ್ಲದೆ ವರ ಮದುವೆಯ ಮೆರವಣಿಗೆಯನ್ನು ಮರಳಿ ತೆಗೆದುಕೊಂಡು ಹೋಗಲೇಬೇಕಾಯಿತು.

ಡಿಸೆಂಬರ್ 7ರಂದು ಸಂಭಲ್‌ನ ಅಸ್ಮೋಲಿ ಪೊಲೀಸ್ ಠಾಣೆ ವ್ಯಾಪ್ತಿಯ ಗ್ರಾಮದಲ್ಲಿ ಮದುವೆ ಮೆರವಣಿಗೆ ನಡೆದಿತ್ತು. ಈ ಸಮಯದಲ್ಲಿ ವಧುವಿನ ಮನೆಯಲ್ಲಿ ಸಂತಸದ ವಾತಾವರಣವಿತ್ತು. ಮದುವೆಗೆ ಬಂದ ಅತಿಥಿಗಳನ್ನು ಸ್ವಾಗತಿಸಲು ಯುವತಿಯರು ಸಕಲ ಸಿದ್ಧತೆ ಮಾಡಿಕೊಂಡಿದ್ದರು. ಮದುವೆ ಸಮಾರಂಭದಲ್ಲಿ ಪಾಲ್ಗೊಳ್ಳಲು ಮನೆಯಲ್ಲಿ ಅತಿಥಿಗಳ ದಂಡೇ ನೆರೆದಿತ್ತು. ಈ ನಡುವೆ ವಧುವಿನ ಆ ಒಂದು ಮಾತಿನಿಂದ ಮದುವೆ ಮನೆಯಲ್ಲಿ ಆಕಾಶವೇ ಕಳಚಿ ಬಿದ್ದಂತಾಯಿತು. ವರ ಮತ್ತು ವಧುವಿನ ಕಡೆಯವರಿಬ್ಬರೂ ವಧುವಿನ ಮಾತಿನಿಂದ ಸ್ತಬ್ಧರಾದರು.

ವಾಸ್ತವವಾಗಿ ವರನನ್ನು ನೋಡಿದ ತಕ್ಷಣವೇ ವಧುವಿನ ಕಡೆಯ ಮಹಿಳೆಯರು ಆತನ ಮೂಗಿನ ಬಗ್ಗೆ ಮಾತಾಡಿಕೊಳ್ಳಲಾರಂಭಿಸಿದ್ದರು. ಪಿಸುಮಾತುಗಳು ಪ್ರಾರಂಭವಾದವು. ಮದುವೆಯಾಗಲಿರುವ ವರನ ಮೂಗಿನ ಬಗೆಗಿನ ವ್ಯಂಗ್ಯದ ಮಾತುಗಳು ವಧುವಿನ ಕಿವಿಗೆ ಬಿದ್ದಿದ್ದೇ ತಡ, ಆಕೆ ಮದುವೆಯೇ ಬೇಡ ಅನ್ನತೊಡಗಿದಳು. ವರನ ಮೂಗು ಚಿಕ್ಕದಾಗಿದೆ ಮತ್ತು ಚಪ್ಪಟೆಯಾಗಿದೆ ಎಂದು ಆಕೆ ತಗಾದೆ ತೆಗೆದಳು.

ಮದುವೆಗೆ ಬಂದಿದ್ದ ಹಿರಿಯರು, ಮನೆಯವರು ಎಷ್ಟೇ ತಿಳಿಸಿ ಹೇಳಲು ಪ್ರಯತ್ನಿಸಿದರೂ ವಧು ತನ್ನ ಹಠ ಬಿಡಲೇ ಇಲ್ಲ. ಇದೇ ವೇಳೆ ಸಮಸ್ಯೆ ಬಗೆಹರಿಸಲು ಪಂಚಾಯಿತಿ ಸಭೆ ನಡೆಸಿದರೂ ಯಾವುದೇ ಪ್ರಯೋಜನವಾಗಲಿಲ್ಲ. ಕೊನೆಗೆ ವಿಧಿಯಿಲ್ಲದೆ ವರನು ವಧುವಿಲ್ಲದೆ ಬರಿಗೈಯಲ್ಲಿ ಮರಳಬೇಕಾಯಿತು. ಆದರೆ ಇಂಥ ಯಾವುದೇ ಪ್ರಕರಣ ನಡೆದಿರುವ ಬಗ್ಗೆ ನನ್ನ ಗಮನಕ್ಕೆ ಬಂದಿಲ್ಲ ಎಂದು ಅಸ್ಮೋಲಿ ಪೊಲೀಸ್ ಠಾಣೆ ಪ್ರಭಾರಿ ಸಂಜಯ್ ಸಿಂಗ್ ಹೇಳಿದ್ದಾರೆ.

ಇದನ್ನೂ ಓದಿ: ಅಂತರ್‌ಧರ್ಮೀಯ ವಿವಾಹ : ವಿಡಿಯೋ ವೈರಲ್ ಮಾಡಿ ರಕ್ಷಣೆಗೆ ಮೊರೆಯಿಟ್ಟ ಯುವತಿ!