ಕುಲ್ಗಾಮ್‌(ಜಮ್ಮು ಮತ್ತು ಕಾಶ್ಮೀರ):ಶಿಕ್ಷಕಿಯಾಗಿದ್ದ ಕಾಶ್ಮೀರಿ ಪಂಡಿತ ಮಹಿಳೆಯನ್ನು ಉಗ್ರರು ಗುಂಡು ಹಾರಿಸಿ ಭೀಕರವಾಗಿ ಹತ್ಯೆಗೈದ ಘಟನೆ ಕುಲ್ಗಾಂ ಪ್ರದೇಶದ ಗೋಪಾಲಪೊರಾದಲ್ಲಿ ಇಂದು ಬೆಳಗ್ಗೆ ನಡೆದಿದೆ. ದಕ್ಷಿಣ ಕಾಶ್ಮೀರ ಭಾಗದಲ್ಲಿ ಉಗ್ರರು ಅಟ್ಟಹಾಸ ಮೆರೆದಿದ್ದು, ಶಿಕ್ಷಕಿ ರಜನಿ ಬಾಲಾ ಗಂಭೀರವಾಗಿ ಗಾಯಗೊಂಡು ಸ್ವಲ್ಪ ಹೊತ್ತಿನಲ್ಲೇ ಕೊನೆಯುಸಿರೆಳೆದರು ಎಂದು ತಿಳಿದುಬಂದಿದೆ. ಹತ್ಯೆಗೀಡಾದ ಮಹಿಳೆ ಜಮ್ಮು ವಿಭಾಗದ ಸಾಂಬಾದಲ್ಲಿ ಶಿಕ್ಷಕಿಯಾಗಿದ್ದರು ಎಂದು ಪೊಲೀಸರು ಮಾಹಿತಿ ನೀಡಿದ್ದಾರೆ.
'ಈ ಘಟನೆ ಬೆಳಗ್ಗೆ ಸುಮಾರು 10 ಗಂಟೆಗೆ ನಡೀತು. ಶಿಕ್ಷಕಿಯ ತಲೆಗೆ ಗುಂಡಿಟ್ಟು ಕೊಂದರು. ತಕ್ಷಣ ಮತ್ತೋರ್ವ ಶಿಕ್ಷಕಿ ಆಕೆಯ ನೆರವಿಗೆ ಧಾವಿಸಿ ಬಂದರು. ನಾನು ಪೊಲೀಸರಿಗೆ ವಿಷಯ ಮುಟ್ಟಿಸಿದೆ' ಎಂದು ಗೋಪಲಪೊರ ಗ್ರಾಮದ ಮುಖ್ಯಸ್ಥ ತಿಳಿಸಿದರು.
ಕೊಲೆಯಾದ ಶಿಕ್ಷಕಿಯ ಸಂಬಂಧಿಯೊಬ್ಬರು ಮಾತನಾಡಿ, 'ನಮಗೆ ನ್ಯಾಯ ಬೇಕು. ಇಂಥ ಟಾರ್ಗೆಟೆಡ್‌ ಕೊಲೆಗಳನ್ನು ತಡೆಯಲು ಸರ್ಕಾರ ಏನಾದರು ಮಾಡಲೇ ಬೇಕು. ವಲಸೆ ನೌಕರರಿಗೆ ಸೂಕ್ತ ಭದ್ರತೆ ಒದಗಿಸಬೇಕು' ಎಂದು ಒತ್ತಾಯಿಸಿದರು.