ತೆಲುಗು ರಾಜ್ಯದಲ್ಲಿ 46 ಡಿಗ್ರಿ ದಾಖಲೆಯ ತಾಪಮಾನ: ವಿವಿಧೆಡೆ ರಣಬಿಸಿಲಿಗೆ 7 ಮಂದಿ ಸಾವು

ತೆಲಂಗಾಣದಲ್ಲಿ ಬಿಸಿಲಿನ ತಾಪಮಾನ ಹೆಚ್ಚಾಗಿದ್ದು, ರಾಜ್ಯದಲ್ಲಿ ಬಿಸಿಲಿಗೆ 7 ಜನರು ಬಲಿಯಾಗಿದ್ದಾರೆ.

ಹೈದರಾಬಾದ್:ತೆಲಂಗಾಣದಲ್ಲಿ ಜನರು ರಣಬಿಸಿಲಿನ ಬೇಗೆಗೆ ತತ್ತರಿಸುತ್ತಿದ್ದಾರೆ. ಇದೇ ತಿಂಗಳ 29ರ ವರೆಗೆ ಈ ತಾಪಮಾನ ಮುಂದುವರಿಯುವ ಸಾಧ್ಯತೆ ಇದೆ. ಬುಧವಾರ ಬಹುತೇಕ ಎಲ್ಲ ಪ್ರದೇಶಗಳಲ್ಲಿ 40 ರಿಂದ 46 ಡಿಗ್ರಿ ತಾಪಮಾನ ದಾಖಲಾಗಿದೆ. ಭದ್ರಾದ್ರಿ ಜಿಲ್ಲೆಯ ಜೂಲುರುಪಾಡು 46.4 ಡಿಗ್ರಿ, ಬಯ್ಯಾರಂನಲ್ಲಿ 45.3 ಡಿಗ್ರಿ, ಮಾಮಿಲಗುಡೆಂ (ಸೂರ್ಯಪೇಟೆ) 45.2 ಡಿಗ್ರಿ, ನಿಡಮನೂರಿನಲ್ಲಿ (ನಲ್ಗೊಂಡ) 45.2 ಡಿಗ್ರಿ, ಮಹದೇವಪುರ (ಜಯಶಂಕರ್ ಭೂಪಾಲಪಲ್ಲಿ ಜಿಲ್ಲೆ) 44.9 ಡಿಗ್ರಿ ತಾಪಮಾನ ದಾಖಲಾಗಿದೆ. ಬಿಸಿಲಿನ ಹೊಡೆತಕ್ಕೆ ತೆಲುಗು ರಾಜ್ಯದ ವಿವಿಧೆಡೆ ಏಳು ಮಂದಿ ಸಾವನ್ನಪ್ಪಿದ್ದಾರೆ.

ಮಂಗಳವಾರ ಹಗಲಿನಲ್ಲಿಯೇ ರಾಜ್ಯದಲ್ಲಿ ಗರಿಷ್ಠ 45.2 ಡಿಗ್ರಿ ಉಷ್ಣಾಂಶ ದಾಖಲಾಗಿದ್ದು, ಒಂದೇ ದಿನದಲ್ಲಿ 1.2 ಡಿಗ್ರಿ ಏರಿಕೆಯಾಗಿ ಬುಧವಾರ 46.4 ಡಿಗ್ರಿ ತಲುಪಿರುವುದು ಆತಂಕ ಮೂಡಿಸಿದೆ. ಗುರುವಾರ (ಇಂದು) ಹಲವೆಡೆ 43 ರಿಂದ 44 ಡಿಗ್ರಿ ತಾಪಮಾನ ಇರಲಿದ್ದು, ಜನರು ಎಚ್ಚರವಹಿಸಬೇಕು ಎಂದು ಹವಾಮಾನ ಇಲಾಖೆ ಎಚ್ಚರಿಕೆ ನೀಡಿದೆ. ದೇಶದ ವಾಯುವ್ಯ ಪ್ರದೇಶದಿಂದ ಕಡಿಮೆ ಎತ್ತರದ ಬಿಸಿಗಾಳಿ ತೆಲಂಗಾಣ ರಾಜ್ಯಕ್ಕೆ ಬೀಸುತ್ತಿದೆ. ಇನ್ನೂ ಕೆಲವೆಡೆ ಅಚ್ಚರಿಯೆಂಬಂತೆ ಆಲಿಕಲ್ಲು ಮಳೆಯಿಂದಾಗಿ ಜನರು ಹೊರಗೆ ಹೋಗಲು ಸಾಧ್ಯವಾಗುತ್ತಿಲ್ಲ. ರಾತ್ರಿ ವೇಳೆಯೂ ಬಿಸಿಲಿನ ಝಳ ಹೆಚ್ಚಾಗಿದ್ದರಿಂದ ಬಿಸಿಲ ತಾಪದಿಂದ ಜನರು ನಲುಗಿದ್ದಾರೆ. ಮಂಗಳವಾರ ರಾತ್ರಿ ಹನುಮಕೊಂಡದಲ್ಲಿ 31 ಡಿಗ್ರಿ ಹಾಗೂ ಖಮ್ಮಂನಲ್ಲಿ 30 ಡಿಗ್ರಿ ಉಷ್ಣಾಂಶ ದಾಖಲಾಗಿದೆ.

ಹೈದರಾಬಾದ್‌ನ ಉಪನಗರವಾದ ಪತಂಚೇರುದಲ್ಲಿ ಮಂಗಳವಾರ ರಾತ್ರಿ 20.2 ಡಿಗ್ರಿಗಳಷ್ಟು ಕಡಿಮೆ ತಾಪಮಾನ ದಾಖಲಾಗಿತ್ತು. ಇದು ಸಾಮಾನ್ಯ ತಾಪಮಾನಕ್ಕಿಂತ 4.8 ಡಿಗ್ರಿ ಕಡಿಮೆ ಎಂದು ಹವಾಮಾನ ಇಲಾಖೆ ತಿಳಿಸಿದೆ. ಆಕಾಶದಲ್ಲಿ ಮೋಡಗಳೇ ಇಲ್ಲವಾಗಿರುವುದರಿಂದ ಸೂರ್ಯನ ಕಿರಣಗಳು ನೇರವಾಗಿ ಭೂಮಿಗೆ ಬೀಳುತ್ತಿವೆ ಮತ್ತು ಭೂಮಿಯ ವಾತಾವರಣವು ತುಂಬಾ ಬಿಸಿಯಾಗಿದ್ದು, ಮನೆಯಿಂದ ಹೊರ ಹೋಗುವುದೇ ಕಷ್ಟಕರವಾಗಿದೆ. ರಾತ್ರಿಯಲ್ಲಿ ಅದೇ ಶಾಖವು ಮುಂದುವರಿದು ಹೆಚ್ಚಿನ ತಾಪಮಾನ ದಾಖಲಾಗುತ್ತಿದೆ.

ಇದರಿಂದಾಗಿ ಮಂಗಳವಾರ ಮತ್ತು ಬುಧವಾರ ಮದರಿ ಬಾಲಾಮಣಿ (46) ಮೇದಕ್ ಜಿಲ್ಲೆಯ ಶೇರಿಪಲ್ಲಿಯಲ್ಲಿ ಖಾತ್ರಿ ಕೂಲಿ ಕಾರ್ಮಿಕ ಈಶ್ವರ್ (38), ಕುಮುರಂಬಿಂ ಜಿಲ್ಲೆಯ ಕಗಜ್‌ನಗರದ ದಿನಗೂಲಿ ನೌಕರ ಬಾನೋತು ರಾಮ್‌ಜಿ (52), ವಾರಂಗಲ್ ಜಿಲ್ಲೆಯ ಗವಿಚಾರ್ಲೊದಲ್ಲಿ ಪಾಪನಿ ಪ್ರಿಯಾಂಕಾ (28) ಅದೇ ಜಿಲ್ಲೆಯ ಮಹಬೂಬಾಬಾದ್ ಜಿಲ್ಲಾ ಕೇಂದ್ರದಲ್ಲಿ ರಿಕ್ಷಾ ಚಾಲಕ, ಗೌರಾರಂ ಪಂಚಾಯಿತಿ ಕೋಡಿಪುಂಜುಲತಾಂಡದ ಕೃಷಿ ಕೂಲಿ ಕಾರ್ಮಿಕ ಇಸ್ಲಾವತ್ ಸೀತಾರಾಂ (56), ಗುರ್ತೂರಿನ ಮೀನುಗಾರ ಪೆಸರ ರಾಜು (30) ಮತ್ತು ನಲ್ಗೊಂಡ ಜಿಲ್ಲೆಯ ಅಣಜಿಪುರದ ರೈತ ಶವ್ವ ಸುಧಾಕರ ರೆಡ್ಡಿ (42) ಬಿಸಿಲಿನಿಂದ ಸಾವನ್ನಪ್ಪಿದ್ದಾರೆ.

ಮಧ್ಯಾಹ್ನದ ಸಮಯದಲ್ಲಿ ಹೊರಗೆ ಸುತ್ತಾಟ ಬೇಡ:ಹವಾಮಾನ ಇಲಾಖೆಯ ರಾಜ್ಯ ನಿರ್ದೇಶಕಿ ನಾಗರತ್ನ ಈ ಕುರಿತು ಮಾಹಿತಿ ನೀಡಿ, ಸಮುದ್ರದಲ್ಲಿ ಬಿಸಿಲಿನ ತಾಪ ಹೆಚ್ಚಿರುವುದರಿಂದ ಸಮಭಾಜಕ ವಲಯದಲ್ಲಿ ನೈಋತ್ಯ ಮಾನ್ಸೂನ್ ಮಾರುತಗಳಿಗೆ ಸೂಕ್ತ ವಾತಾವರಣ ಕಾಣುತ್ತಿಲ್ಲ. ಇದೇ 29ರ ವರೆಗೆ ಬಿಸಿಲಿನ ತಾಪ ಮುಂದುವರಿಯುವ ಸಾಧ್ಯತೆಗಳಿವೆ. ಅದರ ನಂತರ, ಮುಂಗಾರು ರಚನೆಗೆ ಹವಾಮಾನ ಪರಿಸ್ಥಿತಿಗಳು ಅನುಕೂಲಕರವಾಗಿದ್ದರೆ, ಜೂನ್ ಮೊದಲ ವಾರದಲ್ಲಿ ಕೇರಳದಲ್ಲಿ ಮಳೆ ಪ್ರಾರಂಭವಾಗಲಿದೆ. ಬಿಸಿಲಿನ ತಾಪಮಾನ ಕಡಿಮೆಯಾಗುವವರೆಗೆ ಬೆಳಗ್ಗೆ 11 ರಿಂದ ಮಧ್ಯಾಹ್ನ 3 ರವರೆಗೆ ಜನರು ಹೊರಗೆ ಹೋಗಬಾರದು ಎಂದು ಸೂಚಿಸಿದ್ದಾರೆ.

ಇದನ್ನೂ ಓದಿ:ಧಗಧಗಿಸುವ ಸೂರ್ಯನ ಪ್ರತಾಪಕ್ಕೆ ನಲುಗಿದ ಜನ.. ತೆಲುಗು ರಾಜ್ಯಗಳಲ್ಲಿ ಆರು ಜನ ಸಾವು!