ಮಧ್ಯರಾತ್ರಿವರೆಗೆ ಫೋನ್‌ನಲ್ಲಿ ಮಾತನಾಡುತ್ತಿದ್ದ ಮಗಳ ಕತ್ತು ಹಿಸುಕಿದ ಮಲತಂದೆ

ತೆಲಂಗಾಣದ ಹೈದರಾಬಾದ್​ನಲ್ಲಿ ದುರಂತ ಘಟನೆಯೊಂದು ನಡೆದಿದೆ. ಮಧ್ಯರಾತ್ರಿವರೆಗೆ ಫೋನ್​ನಲ್ಲಿ ಮಾತನಾಡುತ್ತಿದ್ದ ಮಗಳನ್ನು ಮಲತಂದೆ ಕೊಲೆ ಮಾಡಿರುವ ಘಟನೆ ಬೆಳಕಿಗೆ ಬಂದಿದೆ.

ಹೈದರಾಬಾದ್​, ತೆಲಂಗಾಣ:ಇದು ಡಿಜಿಟಲ್​ ಯುಗ.. ಈಗ ಎಲ್ಲ ಕಾರ್ಯವೂ ಫೋನ್​ ಮೂಲಕವೇ ಹೆಚ್ಚಾಗಿ ನಡೆಯುತ್ತಿದೆ. ಅಷ್ಟೇ ಅಲ್ಲ ಅದೆಷ್ಟೋ ಯುವಕ ಮತ್ತು ಯುವತಿಯರು ಟ್ವಿಟ್ಟರ್​, ಫೇಸ್​ಬುಕ್, ಚಾಟಿಂಗ್, ಕಾಲಿಂಗ್​​ ಅಂತಾ ಫೋನ್​ನಲ್ಲಿಯೇ ಹೆಚ್ಚು ಕಾಲ ಕಳೆಯುತ್ತಿದ್ದಾರೆ. ಇದರಿಂದಾಗಿ ಯುವತಿಯೊಬ್ಬಳು ತನ್ನ ತಂದೆಯಿಂದಲೇ ಕೊಲೆ ಆಗಿರುವ ಘಟನೆ ಮುನ್ನೆಲೆಗೆ ಬಂದಿದೆ.

ಸ್ನೇಹಿತನೊಂದಿಗೆ ಮಧ್ಯರಾತ್ರಿಯವರೆಗೂ ಫೋನ್‌ನಲ್ಲಿ ಮಾತನಾಡಿದ್ದಕ್ಕೆ ಮಲತಂದೆಯೊಬ್ಬ ಸಿಟ್ಟಿಗೆದ್ದು ಮಗಳನ್ನು ಕೊಲೆ ಮಾಡಿದ್ದಾನೆ. ಹೈದರಾಬಾದ್‌ನ ಮುಶಿರಾಬಾದ್ ಪೊಲೀಸ್ ಠಾಣೆ ವ್ಯಾಪ್ತಿಯಲ್ಲಿ ಈ ಘಟನೆ ನಡೆದಿದೆ. ಇನ್ಸ್‌ಪೆಕ್ಟರ್ ಜಹಾಂಗೀರ್ ಯಾದವ್ ಪ್ರಕಾರ, ಮಧ್ಯರಾತ್ರಿಯವರೆಗೆ ಫೋನ್‌ನಲ್ಲಿ ಮಾತನಾಡಬೇಡ ಎಂದು ತಂದೆ ಸಾದಿಕ್​ ತನ್ನ 17 ವರ್ಷದ ಮಗಳಿಗೆ ಅನೇಕ ಬಾರಿ ಹೇಳಿದ್ದಾನೆ. ಆದ್ರೂ ಸಹಿತ ಬಾಲಕಿ ತನ್ನ ಹಠ ಬಿಡದೇ ಮತ್ತೆ ಸ್ನೇಹಿತನೊಂದಿಗೆ ತನ್ನ ಮಾತು ಮುಂದುರಿಸಿದ್ದಾಳೆ.

ಮಗಳ ವರ್ತನೆ ಕಂಡ ಸಾದಿಕ್​ಗೆ ವಿಪರೀತ ಕೋಪ ಬಂದು, ಆಕೆಯ ಕತ್ತು ಹಿಸುಕಿ ಕೊಲೆ ಮಾಡಿದ್ದಾನೆ. ಬಳಿಕ ಮುಶಿರಾಬಾದ್ ಪೊಲೀಸ್ ಠಾಣೆಯಲ್ಲಿ ಶರಣಾಗಿದ್ದಾನೆ. ಪೊಲೀಸರು ಸ್ಥಳಕ್ಕಾಗಮಿಸಿ ಶವವನ್ನು ಮರಣೋತ್ತರ ಪರೀಕ್ಷೆಗಾಗಿ ಗಾಂಧಿ ಆಸ್ಪತ್ರೆಗೆ ರವಾನಿಸಿದರು. ಪೊಲೀಸರು ಪ್ರಕರಣ ದಾಖಲಿಸಿಕೊಂಡು ತನಿಖೆ ನಡೆಸುತ್ತಿದ್ದಾರೆ.

ಓದಿ :ಮೈಸೂರಲ್ಲಿ ಪೊಲೀಸ್​ ಅಧಿಕಾರಿಯ ಮಗಳು ಆತ್ಮಹತ್ಯೆ