'ಪೆಗಾಸಸ್'​ ಕುತಂತ್ರದ ಸ್ಫೋಟಕ ಮಾಹಿತಿ ಬಹಿರಂಗಪಡಿಸ್ತಾರಾ ಸುಬ್ರಮಣಿಯನ್ ಸ್ವಾಮಿ?

ಫೋನ್ ಟ್ಯಾಪಿಂಗ್​ ವಿಚಾರ ದೃಢವಾದ ನಂತರ ನಾನು ಪಟ್ಟಿಯನ್ನು ಬಿಡುಗಡೆ ಮಾಡುತ್ತೇನೆ ಎಂದು ಟ್ವಿಟರ್​ನಲ್ಲಿ ಸುಬ್ರಮಣಿಯನ್ ಸ್ವಾಮಿ ತಿಳಿಸಿದ್ದಾರೆ.

ನವದೆಹಲಿ: ಎರಡು ವರ್ಷಗಳ ನಂತರ ಇಸ್ರೇಲಿ ಮೂಲದ ಪೆಗಾಸಸ್ ಮತ್ತೆ ಮುನ್ನೆಲೆಗೆ ಬಂದಿದೆ. ರಾಜ್ಯಸಭಾ ಸಂಸದ, ಬಿಜೆಪಿ ಹಿರಿಯ ಮುಖಂಡ ಸುಬ್ರಮಣಿಯನ್ ಸ್ವಾಮಿ ಟ್ವೀಟ್ ಸಾಕಷ್ಟು ಕುತೂಹಲ ಹುಟ್ಟುಹಾಕಿದೆ.

ಭಾನುವಾರ ಬೆಳಗ್ಗೆ ಟ್ವೀಟ್ ಮಾಡಿರುವ ಸ್ವಾಮಿ, ವಿದೇಶಗಳ ವರದಿಯನ್ನು ಉಲ್ಲೇಖಿಸಿ, ಇಸ್ರೇಲಿ ಮೂಲದ ಪೆಗಾಸಸ್ ಟೂಲ್​​ ಪ್ರಧಾನಿ ಮೋದಿ ಅವರ ಕ್ಯಾಬಿನೆಟ್​ನ ಸಚಿವರು, ಆರ್​​ಎಸ್​ಎಸ್​ ನಾಯಕರು, ಸುಪ್ರೀಂಕೋರ್ಟ್​ನ ನ್ಯಾಯಾಧೀಶರು ಮತ್ತು ಪತ್ರಕರ್ತರ ಫೋನ್ ಟ್ಯಾಪ್​ ಮಾಡುತ್ತಿದೆ. ಆ ವರದಿಯನ್ನು ಪಶ್ಚಿಮದ ರಾಷ್ಟ್ರಗಳು ಪ್ರಕಟಿಸುತ್ತವೆ ಎಂಬ ಬಲವಾದ ವದಂತಿಯಿದೆ ಎಂದಿದ್ದಾರೆ.

ಈ ವಿಚಾರ ದೃಢವಾದ ನಂತರ ನಾನು ಪಟ್ಟಿಯನ್ನು ಬಿಡುಗಡೆ ಮಾಡುತ್ತೇನೆ ಎಂದು ಟ್ವಿಟರ್​ನಲ್ಲಿ ಸುಬ್ರಮಣಿಯನ್ ಸ್ವಾಮಿ ಸ್ಪಷ್ಟನೆ ನೀಡಿದ್ದು, ಅಕಸ್ಮಾತ್ ದೃಢವಾದರೆ ಸುಬ್ರಮಣಿಯನ್ ಸ್ವಾಮಿ ಅವರಿಂದ ಸ್ಫೋಟಕ ಮಾಹಿತಿ ಹೊರ ಬೀಳುವ ಸಾಧ್ಯತೆಯಿದೆ.

ಏನಿದು ಪೆಗಾಸಸ್​?

ಪೆಗಾಸಸ್​, ಇಸ್ರೇಲ್​​ನ ಸೈಬರ್ ಸೆಕ್ಯೂರಿಟಿ ಕಂಪನಿಯಾದ ಎನ್​ಎಸ್​ಒ ಗ್ರೂಪ್ ಅಭಿವೃದ್ಧಿ ಪಡಿಸಿರುವ ಸ್ಪೈವೇರ್ ಟೂಲ್ (ಗುಪ್ತ ಮಾಹಿತಿ ಕಲೆ ಹಾಕುವ ಸಾಧನ) ಆಗಿದ್ದು, ಈ ಸಾಧನವನ್ನು ಐಒಎಸ್ (ಆ್ಯಪಲ್​ ಮೊಬೈಲ್​ನ ಆಪರೇಟಿಂಗ್ ಸಿಸ್ಟಂ) ಮತ್ತು ಆಂಡ್ರಾಯ್ಡ್​ ಸಾಧನಗಳಲ್ಲೂ ಬಳಸಬಹುದಾಗಿದೆ.

ಈ ಪೆಗಾಸಸ್ ಟೂಲ್ ಮೇಲ್​, ಫೇಸ್​​​ಬುಕ್​, ವಾಟ್ಸಪ್​, ಟೆಲಿಗ್ರಾಮ್​​​, ಸ್ಕೈಪೇ ಮುಂತಾದ ಅಪ್ಲಿಕೇಷನ್​ಗಳಲ್ಲಿನ ಮಾಹಿತಿ ಓದಲು, ಕರೆಗಳನ್ನು ಟ್ರ್ಯಾಕ್​ ಮಾಡಲು, ಪಾಸ್​ವರ್ಡ್​ಗಳನ್ನು ಕಲೆಹಾಕಲು ಅಭಿವೃದ್ಧಿಪಡಿಸಲಾಗಿದೆ.

ಇದನ್ನೂ ಓದಿ:Monsoon session update: ಸಂಸತ್ ನಿಯಮಗಳಿಗೆ ಅನುಗುಣವಾಗಿದ್ರೆ​​ ಯಾವುದೇ ಚರ್ಚೆಗೆ ಸಿದ್ಧ: ಮೋದಿ