ಕೋವಿಡ್​ ಹಾವಳಿಯ ನಡುವೆ ಕೇರಳದಲ್ಲಿ ಎಸ್​ಎಸ್ಎಲ್​ಸಿ, ಪ್ಲಸ್​ ಟು ಪರೀಕ್ಷೆಗಳು ಪ್ರಾರಂಭ

ಇಂದಿನಿಂದ ಕೇರಳದಲ್ಲಿ ಎಸ್​ಎಸ್ಎಲ್​ಸಿ, ಪ್ಲಸ್​ ಟು ವಾರ್ಷಿಕ ಪರೀಕ್ಷೆಗಳು ಆರಂಭವಾಗಿವೆ. ಕೋವಿಡ್​ ಬಿಕ್ಕಟ್ಟಿನ ಮಧ್ಯೆಯೇ ಪರೀಕ್ಷೆಗಳನ್ನು ಸರ್ಕಾರ ಸಮರ್ಥವಾಗಿ ನಿಭಾಯಿಸುತ್ತಿದೆ.

ತಿರುವನಂತಪುರಂ :ವಿಧಾನಸಭಾ ಚುನಾವಣೆ ಹಿನ್ನೆಲೆ ಮುಂದೂಡಲ್ಪಟ್ಟಿದ್ದ ಕೇರಳ ಎಸ್​ಎಸ್ಎಲ್​ಸಿ ಮತ್ತು ಪ್ಲಸ್​ ಟು (ಪಿಯುಸಿ) ವಾರ್ಷಿಕ ಪರೀಕ್ಷೆಗಳು ಇಂದಿನಿಂದ ಆರಂಭವಾಗಿವೆ.

ಪ್ಲಸ್ ಟು ಪರೀಕ್ಷೆಗಳು ಬೆಳಗ್ಗೆ 9: 40 ಕ್ಕೆ ಪ್ರಾರಂಭವಾಗಿ ಬೆಳಗ್ಗೆ 11: 30 ಕ್ಕೆ ಕೊನೆಗೊಳ್ಳಲಿದ್ದು, ಎಸ್​ಎಸ್​ಎಲ್​ಸಿ ಪರೀಕ್ಷೆಗಳು ಮಧ್ಯಾಹ್ನ 1:40 ರಿಂದ 3: 30 ರವರೆಗೆ ನಡೆಯಲಿದೆ. ಎಸ್ಸೆಸೆಲ್ಸಿ ಪರೀಕ್ಷೆಗಳು ಏಪ್ರಿಲ್ 29 ರೊಳಗೆ ಮತ್ತು ಹೈಯರ್ ಸೆಕೆಂಡರಿ ಪರೀಕ್ಷೆಗಳು ಏಪ್ರಿಲ್ 26 ರೊಳಗೆ ಕೊನೆಗೊಳ್ಳಲಿವೆ. ಪ್ರಶ್ನೆ ಪತ್ರಿಕೆಗಳನ್ನು ಬೆಳಗ್ಗೆ 6 ಗಂಟೆಯೊಳಗೆ ಶಾಲೆಗಳಿಗೆ ರವಾನಿಸಲಾಗುತ್ತದೆ. ಪ್ಲಸ್ ಟು ಪರೀಕ್ಷೆಯ ಪ್ರಶ್ನೆ ಪತ್ರಿಕೆಗಳನ್ನು ಬ್ಲಾಕ್ ಸಂಪನ್ಮೂಲ ಕೇಂದ್ರಗಳ ಮೂಲಕ ರವಾನಿಸಲಾಗುತ್ತದೆ.

ಕಳೆದ ವರ್ಷದಂತೆ, ಕೋವಿಡ್ ಮಾರ್ಗಸೂಚಿಗಳನ್ನು ಪಾಲಿಸಿಕೊಂಡು ಪರೀಕ್ಷೆಗಳನ್ನು ನಡೆಸಲಾಗ್ತಿದೆ. ಜನಸಂದಣಿ ತಪ್ಪಿಸಲು ಹೆಚ್ಚಿನ ಪರೀಕ್ಷಾ ಕೇಂದ್ರಗಳನ್ನು ತೆರೆಯಲಾಗಿದೆ. ವೃತ್ತಿಪರ ಉನ್ನತ ಮಾಧ್ಯಮಿಕ ಶಿಕ್ಷಣ (ವಿಹೆಚ್​ಎಸ್​ಇ) ಪರೀಕ್ಷೆಗಳು ಇತರ ಪರೀಕ್ಷೆಗಳೊಂದಿಗೆ ನಡೆಯಲಿದೆ. ಕೋವಿಡ್ ಹಿನ್ನೆಲೆ ಈ ಶೈಕ್ಷಣಿಕ ವರ್ಷದಲ್ಲಿ ಸರಿಯಾಗಿ ತರಗತಿಗಳನ್ನು ನಡೆಸಲು ಸಾಧ್ಯವಾಗಿಲ್ಲ. ಜೂನ್ 2020ರಲ್ಲಿ ಶೈಕ್ಷಣಿಕ ವರ್ಷ ಪ್ರಾರಂಭವಾದರೂ, ಸರಿಯಾಗಿ ತರಗತಿಗಳು ಪ್ರಾರಂಭವಾಗಿದ್ದು ಮಾತ್ರ 1 ಜನವರಿ 2021 ರಿಂದ.