ಇಲ್ಲಿನ ಶ್ರೀ ಗಂಗಾರಾಮ್​ ಆಸ್ಪತ್ರೆಗೆ 2 ಟನ್​ ಆಕ್ಸಿಜನ್​​ ಪೂರೈಕೆ

ದೆಹಲಿಯ ಸರ್ ಗಂಗಾ ರಾಮ್ ಆಸ್ಪತ್ರೆಗೆ ಮಂಗಳವಾರ 2 ಟನ್ ಲಿಕ್ವಿಡ್​ ವೈದ್ಯಕೀಯ ಆಮ್ಲಜನಕವನ್ನು ಸರಬರಾಜು ಮಾಡಲಾಗಿದೆ. ಈ ಆಸ್ಪತ್ರೆಯಲ್ಲಿ ದಿನಕ್ಕೆ 10,000 ಕ್ಯೂಬಿಕ್​ ಮೀಟರ್ ಆಕ್ಸಿಜನ್​ ಅವಶ್ಯಕತೆ ಇದೆ.

ನವದೆಹಲಿ:ಸರ್ ಗಂಗಾ ರಾಮ್ ಆಸ್ಪತ್ರೆ (ಎಸ್‌ಜಿಆರ್‌ಹೆಚ್) ಗೆ ಮಂಗಳವಾರ ಬೆಳಗ್ಗೆ ಎರಡು ಟನ್ ಲಿಕ್ವಿಡ್ ಮೆಡಿಕಲ್​ ಆಕ್ಸಿಜನ್​ ಅನ್ನು ಸರಬರಾಜು ಮಾಡಲಾಗಿದ್ದು, ಸದ್ಯ ಆಸ್ಪತ್ರೆಯ ಆಕ್ಸಿಜನ್​ ಸ್ಟೋರೇಜ್​ ಟ್ಯಾಂಕ್‌ ಹೆಚ್ಚುವರಿಯಾಗಿ 6,000 ಕ್ಯೂಬಿಕ್​ ಮೀಟರ್ ಆಮ್ಲಜನಕವನ್ನು ಹೊಂದಿದ್ದು, ಇದು ಸುಮಾರು 10 ಗಂಟೆಗಳವರೆಗೆ ಅಥವಾ ಸಂಜೆ 6 ಗಂಟೆಯವರೆಗೆ ಬರಲಿದೆ.

ಈ ಆಸ್ಪತ್ರೆಯಲ್ಲಿ ದಿನಕ್ಕೆ 10,000 ಕ್ಯೂಬಿಕ್​ ಮೀಟರ್ ಆಕ್ಸಿಜನ್​ ಅವಶ್ಯಕತೆ ಇದೆ. 2 ಟನ್​ ಲಿಕ್ವಿಡ್ ಮೆಡಿಕಲ್ ಆಕ್ಸಿಜನ್ ಅನ್ನು ಇನಾಕ್ಸ್ ಏರ್ ಪ್ರಾಡಕ್ಟ್‌ಗಳಿಂದ ಏಪ್ರಿಲ್ 27, 2021 ರಂದು ಬೆಳಗ್ಗೆ 6 ಗಂಟೆಗೆ ಸ್ವೀಕರಿಸಲಾಗಿದೆ. ನಮ್ಮ ಆಸ್ಪತ್ರೆಯ ಆಕ್ಸಿಜನ್​ ಶೇಖರಣಾ ಟ್ಯಾಂಕ್‌ಗಳಲ್ಲಿ ಸದ್ಯ 6000 ಘನ ಮೀಟರ್ ಆಮ್ಲಜನಕ ಲಭ್ಯವಿದೆ, ಅದು 10 ಗಂಟೆ ಅಥವಾ ಸಂಜೆ 6 ಗಂಟೆವರೆಗೆ ಇರುತ್ತದೆ ಎಂದು ಗಂಗಾ ರಾಮ್ ಆಸ್ಪತ್ರೆಯ ಮಾಧ್ಯಮ ವಿಭಾಗ ಹೇಳಿದೆ.

ಸೋಮವಾರ ಬೆಳಗ್ಗೆ ಆಸ್ಪತ್ರೆಗೆ ನಾಲ್ಕು ಟನ್ ಆಮ್ಲಜನಕ ಪೂರೈಕೆಯಾಗಿತ್ತು . ದೆಹಲಿಯಲ್ಲಿ ಕೊರೊನಾ ಸೋಂಕಿತರ ಸಂಖ್ಯೆ ಹೆಚ್ಚಾಗುತ್ತಿರುವುದರಿಂದ ಆಸ್ಪತ್ರೆಗಳು ಆಮ್ಲಜನಕ ಪೂರೈಕೆ ಸಮಸ್ಯೆ ಎದುರಿಸುವ ಆತಂಕದಲ್ಲಿವೆ.

ರಾಜಧಾನಿ ದೆಹಲಿಯಲ್ಲಿ ಸೋಮವಾರ 20,201 ಹೊಸ ಕೋವಿಡ್​ -19 ಪ್ರಕರಣಗಳು ಮತ್ತು 380 ಕೊರೊನಾ ಸೋಂಕಿತರು ಸಾವನ್ನಪ್ಪಿರುವುದು ವರದಿಯಾಗಿದೆ.