ಲವ್​ ಜಿಹಾದ್​ ಆಯಾಮದಲ್ಲಿ ತನಿಖೆ.. ಅಫ್ತಾಬ್​ನನ್ನು ಮರಣ ದಂಡನೆಗೆ ಗುರಿಪಡಿಸುವಂತೆ ಶ್ರದ್ಧಾ ತಂದೆ ಆಗ್ರಹ

ಅಫ್ತಾಬ್​ ಪದವಿ ಮಾಡಿದ್ದು, ಮುಂಬೈನಲ್ಲಿ ಪೋಷಕರೊಂದಿಗೆ ವಾಸವಾಗಿದ್ದ. ಆತ ಫುಡ್​ ಬ್ಲಾಗರ್​ ಆಗಿ ಕೂಡ ಕೆಲವು ತಿಂಗಳು ಕಾರ್ಯ ನಿರ್ವಹಿಸುತ್ತಿದ್ದ ಎಂಬುದು ಆತನ ಸಾಮಾಜಿಕ ಜಾಲತಾಣದಿಂದ ಬಯಲಾಗಿದೆ.

ಮುಂಬೈ(ಮಹಾರಾಷ್ಟ್ರ):ದೇಶದೆಲ್ಲೆಡೆ ಸಂಚಲನ ಮೂಡಿಸಿರುವ ಶ್ರದ್ಧಾ ವಾಕರ್​ ಕೊಲೆ ಪ್ರಕರಣದ ಆರೋಪಿ ಅಫ್ತಾಬ್​​ಗೆ ಮರಣದಂಡನೆ ವಿಧಿಸಬೇಕು ಎಂದು ಸಂತ್ರಸ್ತೆಯ ತಂದೆ ಆಗ್ರಹಿಸಿದ್ದಾರೆ. ಈ ಪ್ರಕರಣವನ್ನು ಲವ್​ ಜಿಹಾದ್​ ಆಯಾಮದಲ್ಲೂ ತನಿಖೆ ಮಾಡಬೇಕು ಎಂದು ಕೋರಿದ್ದಾರೆ.

ಪ್ರಕರಣದ ಹಿಂದೆ ಲವ್​ ಜಿಹಾದ್​ ಇರುವಂತಿದೆ ಎಂದು ನನಗೆ ಅನುಮಾನವಿದೆ. ನಾವು ಅಫ್ತಾಬ್​​ಗೆ ಮರಣದಂಡನೆ ವಿಧಿಸಬೇಕು ಎಂಬುದು ನಮ್ಮ ಬೇಡಿಕೆ. ದೆಹಲಿ ಪೊಲೀಸರ ಮೇಲೆ ನನಗೆ ನಂಬಿಕೆ ಇದೆ. ಇದು ಸರಿಯಾದ ರೀತಿಯಲ್ಲಿ ನಡೆಯಬೇಕು. ಶ್ರದ್ಧಾ ಆಕೆಯ ಅಂಕಲ್​ ಜೊತೆ ಹೆಚ್ಚು ಆತ್ಮೀಯವಾಗಿದ್ದಳು. ಅಲ್ಲದೇ, ಆಕೆ ಹೆಚ್ಚು ಮಾತನಾಡುತ್ತಿರಲಿಲ್ಲ. ನಾನು ಎಂದಿಗೂ ಅಫ್ತಾಬ್​​ ಜೊತೆ ಸಂಪರ್ಕದಲ್ಲಿ ಇರಲಿಲ್ಲ. ಪ್ರಕರಣ ಸಂಬಂಧ ನಾನು ಮುಂಬೈನ ವಸೈನಲ್ಲಿ ಮೊದಲು ದೂರು ಸಲ್ಲಿಸಿದೆ ಎಂದು ಶ್ರದ್ಧಾ ತಂದೆ ವಿಕಾಸ್​ ವಾಕರ್​ ತಿಳಿಸಿದ್ದಾರೆ.

ಪ್ರಕರಣ ತನಿಖೆಯಲ್ಲಿ ಆರೋಪಿ ಅಫ್ತಾಬ್​​ ಪೂನವಾಲಾ ಫುಡ್​ ಬ್ಲಾಕರ್​ ಆಗಿದ್ದು, ದೆಹಲಿಯ ಕಾಲ್​ ಸೆಂಟರ್​ವೊಂದರಲ್ಲಿ ಕಾರ್ಯ ನಿರ್ವಹಿಸುತ್ತಿದ್ದ ಎಂಬುದು ತನಿಖೆ ವೇಳೆ ಬಯಲಾಗಿದೆ. ರಾಷ್ಟ್ರ ರಾಜಧಾನಿಯ ಛತರ್ಪುರ್​ನಲ್ಲಿ ಫ್ಯಾಟ್​ ಬಾಡಿಗೆ ಪಡೆದಿದ್ದ ಆತ ಶ್ರದ್ಧಾಳನ್ನು ಹತ್ಯೆ ಮಾಡಿದ್ದ. ಇವರಿಬ್ಬರು ಆಗ್ಗಿಂದಾಗ್ಗೆ ಜಗಳ ಆಡುತ್ತಿದ್ದರು ಎಂಬುದು ಕೂಡ ತನಿಖೆ ವೇಳೆ ತಿಳಿದು ಬಂದಿದೆ.

ಪೊಲೀಸ್​ ಮೂಲಗಳ ಪ್ರಕಾರ 2019ರಲ್ಲಿ ಪರಸ್ಪರ ಪ್ರೀತಿಯಲ್ಲಿ ಬಿದ್ದ ಈ ಜೋಡಿಗಳು 2022ರಲ್ಲಿ ದೆಹಲಿಗೆ ವಾಸ್ತವ್ಯ ಬದಲಾಯಿಸಿದ್ದರು. ಇದಕ್ಕೂ ಮುನ್ನ ಅವರು ಮಹಾರಾಷ್ಟ್ರದಲ್ಲಿದ್ದರು. ಒಟ್ಟೊಟ್ಟಿಗೆ ಅನೇಕ ಕಡೆ ಪ್ರವಾಸ ಯೋಜನೆಯಡಿ ಊರು ಸುತ್ತಿದ್ದರಂತೆ.

ಕಳೆದ ಮಾರ್ಚ್​- ಏಪ್ರಿಲ್​ನಲ್ಲಿ ಹಿಮಾಚಲ ಪ್ರದೇಶಕ್ಕೆ ಭೇಟಿ ನೀಡಿದ್ದರು. ಈ ವೇಳೆ ಅವರು ದೆಹಲಿಯ ಛತರ್ಪುರ್​ನಲ್ಲಿ ವಾಸಿಸುತ್ತಿದ್ದ ವ್ಯಕ್ತಿಯನ್ನು ಭೇಟಿಯಾಗಿದ್ದರು. ಮೇನಲ್ಲಿ ದೆಹಲಿಗೆ ಬಂದ ಬಳಿಕ ಅವರು, ಅದೇ ವ್ಯಕ್ತಿ ಜೊತೆ ಫ್ಲಾಟ್​ನಲ್ಲಿದ್ದರು. ಈ ವೇಳೆ ಪರಿಸ್ಥಿತಿ ಬದಲಾಗದ ಹಿನ್ನೆಲೆ ಅವರು ಬೇರೆ ಫ್ಲ್ಯಾಟ್​​ಗೆ ಬಾಡಿಗೆಗೆ ಹೋಗಿದ್ದರಂತೆ.

ಮೇ 18ರಂದು ಶ್ರದ್ಧಾಳನ್ನು ಕೊಲೆ ಮಾಡುವ ಸ್ವಲ್ಪ ದಿನದ ಮುಂಚೆ ಅಫ್ತಾಬ್​, ಈ ಫ್ಲ್ಯಾಟ್​​ಗೆ ಬಂದಿದ್ದಾನೆ. ಆತ ಕೊಲೆ ಯೋಜನೆ ರೂಪಿಸಿ ಇಲ್ಲಿಗೆ ಬಂದಿದ್ದಾನಾ ಎಂಬುದರ ಕುರಿತು ತನಿಖೆ ಆರಂಭಿಸಲಾಗಿದೆ ಎಂದು ಪೊಲೀಸ್​ ಮೂಲಗಳು ತಿಳಿಸಿವೆ.

ಶ್ರದ್ಧಾಳನ್ನು ಕೊಲೆ ಮಾಡಿ ಆಕೆಯ ದೇಹವನ್ನು 35 ತುಂಡುಗಳಾಗಿ ಮಾಡಿ ಬಳಿಕ ಅದರ ವಿಲೇವಾರಿಗೆ ಆತ ಮುಂಜಾನೆ ಎರಡು ಗಂಟೆಗೆ ಮನೆಯಿಂದ ಹೊರ ಹೋಗುತ್ತಿದ್ದ ಎಂಬುದು ವಿಚಾರಣೆ ವೇಳೆ ತಿಳಿದು ಬಂದಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.

ಅಫ್ತಾಬ್​​ ಪದವಿ ಮಾಡಿದ್ದು, ಮುಂಬೈನಲ್ಲಿ ಪೋಷಕರೊಂದಿಗೆ ವಾಸವಾಗಿದ್ದ. ಆತ ಫುಡ್​ ಬ್ಲಾಗರ್​ ಆಗಿ ಕೂಡ ಕೆಲವು ತಿಂಗಳು ಕಾರ್ಯ ನಿರ್ವಹಿಸುತ್ತಿದ್ದ ಎಂಬುದು ಆತನ ಸಾಮಾಜಿಕ ಜಾಲತಾಣಗಳಿಂದ ಗೊತ್ತಾಗಿದೆ. ಕಳೆದ ಫೆಬ್ರವರಿಯಲ್ಲಿ ಆತ ಕೊನೆ ವಿಡಿಯೋ ಪೋಸ್ಟ್​ ಮಾಡಿದ್ದಾನೆ. ಆತನಿಗೆ ಇನ್ಸ್ಟಾಗ್ರಾಂನಲ್ಲಿ 28 ಸಾವಿರ ಮಂದಿ ಬೆಂಬಲಿಗರಿದ್ದಾರೆ ಎಂದು ತಿಳಿದುಬಂದಿದೆ.

ಇದನ್ನೂ ಓದಿ: ಕೊಲೆಮಾಡಿ ತಿಂಗಳವರೆಗೂ ಶ್ರದ್ಧಾಳ ಇನ್​ಸ್ಟಾ ಅಕೌಂಟ್ ಚಾಲನೆಯಲ್ಲಿಟ್ಟಿದ್ದ ಅಫ್ತಾಬ್!