ಶಿರಡಿ ದೇವಾಲಯದ ದೇಣಿಗೆ ಹಣ ದುರುಪಯೋಗ: ಆರ್‌ಟಿಐ ವಿಚಾರಣೆಯಲ್ಲಿ ಬಯಲು

ಮಾಹಿತಿ ಹಕ್ಕು ಕಾರ್ಯಕರ್ತ ಸಂಜಯ್ ಕೇಲ್ ನಡೆಸಿದ ಆರ್‌ಟಿಐ ವಿಚಾರಣೆಯಲ್ಲಿ ಶಿರಡಿ ಸಾಯಿ ದೇವಾಲಯದ ಟ್ರಸ್ಟ್ ಅಧಿಕಾರಿಗಳು ಭಕ್ತರ ದೇಣಿಗೆ ಹಣ ಬಳಸಿಕೊಂಡು ವಿಮಾನ ಪ್ರಯಾಣ ಮಾಡಿರುವ ಅಂಶ ತಿಳಿದುಬಂದಿದೆ.

ಶಿರಡಿ (ಮಹಾರಾಷ್ಟ್ರ): ಶಿರಡಿ ಸಾಯಿ ದೇವಾಲಯದ ಟ್ರಸ್ಟ್ ಅಧಿಕಾರಿಗಳು ಭಕ್ತರ ದೇಣಿಗೆ ಹಣವನ್ನು ಬಳಸಿಕೊಂಡು ವಿಮಾನದಲ್ಲಿ ಪ್ರಯಾಣ ಮಾಡಿರುವ ವಿಚಾರ ಆರ್‌ಟಿಐ ಮಾಹಿತಿಯಿಂದ ಬಯಲಾಗಿದೆ.

ಶಿರಡಿಯಲ್ಲಿರುವ ಸಾಯಿಬಾಬಾ ದೇವಾಲಯದ ನಿರ್ವಹಣೆಯನ್ನು ರಾಜ್ಯ ಸರ್ಕಾರದ ಕಾನೂನು ಮತ್ತು ನ್ಯಾಯ ಇಲಾಖೆ ನೋಡಿಕೊಳ್ಳುತ್ತಿದೆ. ಈ ನಡುವೆ ದೇವಸ್ಥಾನದ ಟ್ರಸ್ಟ್​ ಅಧಿಕಾರಿಗಳು ಭಕ್ತರ ದೇಣಿಗೆ ಹಣ ಬಳಿಸಿಕೊಂಡು 2018 ರಿಂದ 2021ರ ನಡುವೆ ತಿರುಪತಿ, ರಾಂಚಿ, ಡೆಹ್ರಾಡೂನ್, ದೆಹಲಿ, ಮುಂಬೈ ಸೇರಿದಂತೆ ಔರಂಗಬಾದ್​​​ಗೆ ವಿಮಾನ ಪ್ರಯಾಣ ಬೆಳೆಸಿದ್ದರು ಎಂಬ ಆರೋಪಗಳು ಕೇಳಿ ಬಂದಿದ್ದವು.

ಈ ಸಂಬಂಧ ಮಾಹಿತಿ ಹಕ್ಕು ಕಾರ್ಯಕರ್ತ ಸಂಜಯ್ ಕೇಲ್ ಎಂಬುವವರು ವಿಮಾನದಲ್ಲಿ ಪ್ರಯಾಣಿಸಿದ ಅಧಿಕಾರಿಗಳು ಮತ್ತು ನೌಕರರ ಹೆಸರುಗಳ ಬಗ್ಗೆ ಸರ್ಕಾರದ ಬಳಿ ಮಾಹಿತಿ ಕೇಳಿದ್ದರು. ಈ ವೇಳೆ, ಕಾರ್ಯದರ್ಶಿ ಮಟ್ಟದ ಅಧಿಕಾರಿಗಳಿಗೆ ಮಾತ್ರ ವಿಮಾನದಲ್ಲಿ ಪ್ರಯಾಣಿಸಲು ಅನುಮತಿ ನೀಡಲಾಗಿದೆ ಎಂದು ಸರ್ಕಾರ ತಿಳಿಸಿತ್ತು.

ಸರ್ಕಾರದ ನಿಯಮದ ಪ್ರಕಾರ ದೇವಾಲಯದ ಟ್ರಸ್ಟ್​ನ ಅಧಿಕಾರಿಗಳಿಗೆ ಭಕ್ತರ ದೇಣಿಗೆ ಹಣ ಬಳಸಿಕೊಳ್ಳಲು ಯಾವುದೇ ಹಕ್ಕಿಲ್ಲ. ಆದರೆ, ಅಧಿಕಾರಿಗಳು ಭಕ್ತರು ನೀಡಿದ ದೇಣಿಗೆಯಿಂದ ಲಕ್ಷಗಟ್ಟಲೇ ಹಣವನ್ನು ಖರ್ಚು ಮಾಡುತ್ತಿದ್ದಾರೆ. ಸರ್ಕಾರವು ಎಲ್ಲ ಹಣವನ್ನು ವಸೂಲಿ ಮಾಡಬೇಕು. ಅವರ ವಿರುದ್ಧ ಶಿಸ್ತು ಕ್ರಮ ತೆಗೆದುಕೊಳ್ಳಬೇಕು ಎಂದು ಕೇಲ್ ಒತ್ತಾಯಿಸಿದ್ದಾರೆ.