ಡ್ರೀಮ್‌ 11ನಲ್ಲಿ ಬಿಹಾರದ ಯುವಕನಿಗೆ ಖುಲಾಯಿಸಿದ ಅದೃಷ್ಟ; ಸಿಕ್ತು 1 ಕೋಟಿ ರೂಪಾಯಿ!

ಬಿಹಾರದ ಯುವಕ ಶಾನು ಕುಮಾರ್ ಕ್ರಿಕೆಟ್​ ಪ್ಲಾಟ್​ಫಾರ್ಮ್ ಡ್ರೀಮ್​ 11 ನಲ್ಲಿ 1 ಕೋಟಿ ರೂಪಾಯಿ ಗೆದ್ದಿದ್ದಾರೆ.

ಮಧುಬನಿ (ಬಿಹಾರ) : ಆನ್​ಲೈನ್​ ಫ್ಯಾಂಟಸಿ ಪ್ಲಾಟ್​ಫಾರ್ಮ್ ಡ್ರೀಮ್​ 11ನಲ್ಲಿ ರಾಜ್ಯದ ಮಧುಬನಿ ಜಿಲ್ಲೆಯ ಯುವಕ ಒಂದು ಕೋಟಿ ರೂಪಾಯಿ ಗೆದ್ದಿದ್ದಾರೆ. ಆಸ್ಟ್ರೇಲಿಯಾದ ಬ್ಯಾಷ್​ ವಿನ್ನಿಂಗ್​ ಸ್ಪರ್ಧೆಯಲ್ಲಿ ಇವರು ರಚಿಸಿದ ತಂಡ ಯಶಸ್ವಿಯಾಗಿದ್ದು, ರಾತ್ರಿ ಬೆಳಗಾಗುವುದರೊಳಗೆ ಬದುಕು ಬದಲಿಸಿದೆ. ಕೋಟಿ ಗೆದ್ದ ಯುವಕನ ಹೆಸರು ಶಾನು ಕುಮಾರ್ (19 ವರ್ಷ). ಈತ ಕಿರಾಣಿ ಉದ್ಯಮಿ ರಾಜೇಶ್​ ಮೆಹ್ತಾ ಎಂಬವರ ಪುತ್ರ.

ಶಾನು ಕುಮಾರ್ ದ್ವಿತೀಯ ಪಿಯುಸಿ ವಿಜ್ಞಾನ ವಿಭಾಗದಲ್ಲಿ ವ್ಯಾಸಂಗ ಮಾಡುತ್ತಿದ್ದಾನೆ. ದೆಹಲಿಯಲ್ಲಿ ಉಳಿದುಕೊಂಡಿರುವ ಈತ​ ವೀರೇಂದ್ರ ಸೆಹ್ವಾಗ್ ಕ್ರಿಕೆಟ್ ಅಕಾಡೆಮಿಯಲ್ಲಿ ಕೋಚಿಂಗ್ ಪಡೆದುಕೊಳ್ಳುತ್ತಿದ್ದಾನೆ. "ನನಗೆ ಮೊದಲು ನಂಬಲು ಸಾಧ್ಯವಾಗಲಿಲ್ಲ. ನನ್ನ ಮೊಬೈಲ್‌ಗೆ ಬಂದ ಮೆಸೇಜ್​ ನೋಡಿ ಸಂತೋಷಕ್ಕೆ ಮಿತಿಯೇ ಇಲ್ಲದಂತಾಗಿತ್ತು. ಕ್ರಿಕೆಟಿಗನಾಗುವ ಆಸೆ ಇದೆ. ಈಗ ಬಂದಿರುವ ಹಣವನ್ನು ತಂದೆಗೆ ನೀಡಿದ್ದೇನೆ. ಇದರಿಂದ ಅವರ ವ್ಯಾಪಾರಕ್ಕೆ ಅನುಕೂಲವಾಗಲಿದೆ. ನಾನು ಉತ್ತಮ ಕ್ರಿಕೆಟ್​ ತರಬೇತಿ ಪಡೆದುಕೋಳ್ಳುತ್ತೇನೆ" ಎಂದು ಶಾನು ಕುಮಾರ್ ಖುಷಿ ಹಂಚಿಕೊಂಡರು.

ಈ ಹಿಂದೆ ಬಿಹಾರದ ನವಾಡಾದ ಅಕ್ಬರ್​ಪುರ ಪೊಲೀಸ್​ ಠಾಣಾ ವ್ಯಾಪ್ತಿಯ ಪಿಪ್ರಾ ಖುರ್ದ್​ ಗ್ರಾಮದ ನಿವಾಸಿ ರಾಜು ರಾಮ್​ ಎಂಬರು ಡ್ರೀಮ್​ 11ನಲ್ಲಿ ಒಂದು ಕೋಟಿ ರೂಪಾಯಿ ಗೆದ್ದಿದ್ದರು. ಇವರು ಡಿಜೆಯಾಗಿ ಕೆಲಸ ಮಾಡುತ್ತಿದ್ದಾರೆ. ತೆರಿಗೆ ಕಡಿತವಾಗಿ ಇವರಿಗೆ 70 ಲಕ್ಷ ರೂ. ಸಿಕ್ಕಿತ್ತು. ಇವರಲ್ಲದೇ ಭೋಜ್​ಪುರ ಜಿಲ್ಲೆಯ ಚಾರ್ಪೋಖಾರಿ ಬ್ಲಾಕ್​ನ ಠಾಕುರಿ ಗ್ರಾಮದ ಯುವಕ ಸೌರಭ್​ ಕೂಡ 49 ರೂಪಾಯಿ ವ್ಯಯಿಸಿ ಒಂದು ಕೋಟಿ ಗೆದ್ದು ಸುದ್ದಿಯಾಗಿದ್ದರು.

ಚಾಲಕನಿಗೆ ಒಲಿದ 2 ಕೋಟಿ: ಬಿಹಾರದ ಸರನ್​ ಜಿಲ್ಲೆಯ ರಮೇಶ್​ ಕುಮಾರ್​ ಎಂಬ ಚಾಲಕ ಬಿಡುವಿನ ವೇಳೆ ಫ್ಯಾಂಟಸಿ ಕ್ರಿಕೆಟ್ ಗೇಮ್​ ಆಡುತ್ತಿದ್ದರು. ಇವರ ಕುಟುಂಬವು ಕಷ್ಟದಲ್ಲಿ ಜೀವನ ನಡೆಸುತ್ತಿತ್ತು. ತಂದೆಯ ದಿನಗೂಲಿಯಲ್ಲಿಯೇ ಸಂಸಾರ ಸಾಗುತ್ತಿತ್ತು. ಆದರೆ ಅದೃಷ್ಟಲಕ್ಷ್ಮೀ ಈ ಕುಟುಂಬಕ್ಕೆ ರಾತ್ರೋರಾತ್ರಿ ಒಲಿದು ಬಂದಿದ್ದಳು. ಇದೇ ಡ್ರೀಮ್11 ನಲ್ಲಿ 2 ಕೋಟಿ ಗೆದ್ದು ಹುಬ್ಬೇರಿಸಿದ್ದರು.

ಇದನ್ನೂ ಓದಿ:ಬ್ಯುಸಿನೆಸ್ ಹೆಸರಲ್ಲಿ ಸ್ಟಾರ್ ಕ್ರಿಕೆಟಿಗ ದೀಪಕ್ ಚಾಹರ್ ಪತ್ನಿಗೆ 10 ಲಕ್ಷ ರೂ ಮೋಸ