ಕನಿಷ್ಠ ಬೆಂಬಲ ಬೆಲೆ ವಿಚಾರವಾಗಿ ಕೇಂದ್ರದೊಂದಿಗೆ ಮಾತುಕತೆ.. ಮಾಹಿತಿ ನೀಡಿದ ಸಂಯುಕ್ತ ಕಿಸಾನ್​​ ಮೋರ್ಚಾ

ಕನಿಷ್ಠ ಬೆಂಬಲ ಬೆಲೆ ವಿಚಾರವಾಗಿ ಇದೀಗ ಕೇಂದ್ರ ಸರ್ಕಾರದೊಂದಿಗೆ ರೈತ ಸಂಘಟನೆಗಳು ಮಾತುಕತೆ ನಡೆಸಲಿದ್ದು, ಡಿಸೆಂಬರ್​ 7ರಂದು ಸಭೆ ನಿಗದಿಯಾಗಿದೆ.

ಸೋನಿಪತ್​​​​​(ಹರಿಯಾಣ):ಕನಿಷ್ಠ ಬೆಂಬಲ ಬೆಲೆ ವಿಚಾರವಾಗಿ ಕೇಂದ್ರ ಸರ್ಕಾರದೊಂದಿಗೆ ಸಂಯುಕ್ತ ಕಿಸಾನ್​​ ಮೋರ್ಚಾ ಮಹತ್ವದ ಸಭೆ ನಡೆಸಲಿದೆ. ಡಿಸೆಂಬರ್​​ 7ರಂದು ಸಭೆ ನಿರ್ಧಾರಗೊಂಡಿದೆ ಎಂದು ರೈತ ಸಂಘಟನೆ ಮುಖ್ಯಸ್ಥ ರಾಕೇಶ್​ ಟಿಕಾಯತ್​​ ತಿಳಿಸಿದ್ದಾರೆ.

ಕೇಂದ್ರ ಸರ್ಕಾರದ ವಿವಾದಿತ ಕೃಷಿ ಕಾಯ್ದೆಗಳನ್ನ ಈಗಾಗಲೇ ಮೋದಿ ಸರ್ಕಾರ ಹಿಂಪಡೆದುಕೊಂಡಿದ್ದು, ಸಂಸತ್​ ಅಧಿವೇಶನದಲ್ಲೂ ಈ ಮಸೂದೆ ಅಂಗೀಕಾರವಾಗಿದೆ. ಆದರೆ ಕನಿಷ್ಠ ಬೆಂಬಲ ಬೆಲೆ ಸೇರಿದಂತೆ ಇನ್ನಿತ್ತರ ಬೇಡಿಕೆಯೊಂದಿಗೆ ರೈತ ಸಂಘಟನೆಗಳು ಪ್ರತಿಭಟನೆ ನಡೆಸುತ್ತಿದ್ದು, ಇದರ ಬೆನ್ನಲ್ಲೇ ಇಂದು ಮಹತ್ವದ ಸಭೆ ನಡೆಯಿತು.

ನವೆಂಬರ್​​​ 29ರಂದು ಟ್ರ್ಯಾಕ್ಟರ್​ ಮಾರ್ಚ್​​​​ ನಡೆಸಲು ಮುಂದಾಗಿದ್ದ ರೈತ ಸಂಘಟನೆಗಳು ಕೇಂದ್ರ ಸರ್ಕಾರಕ್ಕೆ ಡಿಸೆಂಬರ್​​ 4ರವರೆಗೆ ಕಾಲಾವಕಾಶ ನೀಡಿ ಪತ್ರ ಬರೆದಿತ್ತು. ಇದೇ ಕಾರಣಕ್ಕಾಗಿ ಟ್ರ್ಯಾಕ್ಟರ್​ ಮೆರವಣಿಗೆ ಮುಂದೂಡಿಕೆ ಮಾಡಿ, ಇಂದು ಮಹತ್ವದ ಸಭೆ ನಡೆಸಲು ನಿರ್ಧರಿಸಿತ್ತು. ಇಂದು ನಡೆದ ಸಭೆಯಲ್ಲಿ ಭಾಗಿಯಾಗಿ ಚರ್ಚೆ ನಡೆಸಿದ ನಂತರ ಸುದ್ದಿಗೋಷ್ಠಿಯಲ್ಲಿ ಭಾಗಿಯಾಗಿ ರಾಕೇಶ್ ಟಿಕಾಯತ್​ ಮಾತನಾಡಿದರು.

ಐವರು ಸದಸ್ಯರ ಸಮಿತಿಯೊಂದಿಗೆ ಇದೀಗ ಕೇಂದ್ರ ಸರ್ಕಾರ ಮಾತುಕತೆ ನಡೆಸಲಿದ್ದು, ಇದರಲ್ಲಿ ಬಲ್ಬೀರ್​​ ಸಿಂಗ್​​​ ರಾಜೆವಾಲ್​, ಶಿವಕುಮಾರ್​​​ ಕಾಕಾ, ಗುರ್ನಾಮ್​​​ ಸಿಂಗ್​​ ಯದುವೀರ್​​ ಸಿಂಗ್​​ ಹಾಗೂ ಅಶೋಕ್​​​ ದಾವ್ಲೆ ಇದ್ದಾರೆ ಎಂದು ತಿಳಿಸಿದೆ. ಕನಿಷ್ಠ ಬೆಂಬಲ ಬೆಲೆ ವಿಚಾರವಾಗಿ ಕೇಂದ್ರ ಗೃಹ ಸಚಿವ ಅಮಿತ್​​ ಶಾ ರೈತ ಸಂಘಟನೆ ಜೊತೆ ಮಾತುಕತೆ ನಡೆಸಲಿದ್ದಾರೆಂದು ತಿಳಿದು ಬಂದಿದೆ.

ಇದೇ ವೇಳೆ ಮಾತನಾಡಿರುವ ದರ್ಶನ್​ ಪಾಲ್​ ಸಿಂಗ್​, ರೈತರ ಮೇಲೆ ಕೇಂದ್ರ ಸರ್ಕಾರ ಹಾಕಿರುವ ಎಲ್ಲ ಪ್ರಕರಣ ಹಿಂಪಡೆದುಕೊಳ್ಳಬೇಕು. ಅಲ್ಲಿಯವರೆಗೆ ನಾವು ಯಾವುದೇ ಕಾರಣಕ್ಕೂ ಪ್ರತಿಭಟನೆ ಹಿಂಪಡೆದುಕೊಳ್ಳಲ್ಲ ಎಂದಿದ್ದಾರೆ.