ಪಾಟ್ನಾ(ಬಿಹಾರ): ಗಂಗಾ ನದಿಗೆ ಅಡ್ಡಲಾಗಿ ನಿರ್ಮಾಣ ಮಾಡಲಾಗುತ್ತಿದ್ದ ನಾಲ್ಕು ಪಥಗಳ ನಿರ್ಮಾಣ ಹಂತದ ಸೇತುವೆಯ ಕುಸಿತಕ್ಕೆ ನಿತೀಶ್ ಕುಮಾರ್ ನೇತೃತ್ವದ ಬಿಹಾರ ಸರ್ಕಾರವನ್ನು ಬಿಜೆಪಿ ದೂಷಿಸಿದೆ. ಈ ನಡುವೆ ಬಿಹಾರ ಸರ್ಕಾರವನ್ನು ಟೀಕಿಸಿದ ಬಿಜೆಪಿಯನ್ನ ಪಾಲುದಾರ ಪಕ್ಷ ರಾಷ್ಟ್ರೀಯ ಜನತಾ ದಳ ಆರ್ಜೆಡಿ ಹಿಗ್ಗಾಮುಗ್ಗಾ ತರಾಟೆಗೆ ತೆಗೆದುಕೊಂಡಿದೆ.
ಬಾಗಲ್ಪುರ ಸೇತುವೆ ಕುಸಿತದ ಬಗ್ಗೆ ಮಾತನಾಡಿರುವ ಆರ್ಜೆಡಿ ವಕ್ತಾರ ಶಕ್ತಿ ಸಿಂಗ್ ಯಾದವ್, "ನಂದ ಕಿಶೋರ್ ಯಾದವ್, ಮಂಗಲ್ ಪಾಂಡೆ ಮತ್ತು ನಿತಿನ್ ನವೀನ್ ಅವರ ಅಧಿಕಾರಾವಧಿಯಲ್ಲಿ ಈ ದೋಷಪೂರಿತ ಸೇತುವೆ ನಿರ್ಮಾಣವಾಗಿದೆ. ಅವರು ಬಿಜೆಪಿಯ ಶಾಸಕರು ಮತ್ತು 2017 ರಿಂದ 2022 ರ ನಡುವೆ ನಿರ್ಮಾಣದ ಸಮಯದಲ್ಲಿ ಅವರು ಸಚಿವರಾಗಿದ್ದರು‘‘ ಎಂದು ಅವರು ಟೀಕಿಸಿದ್ದಾರೆ.
‘‘ಕಳೆದ ವರ್ಷ ಏಪ್ರಿಲ್ 30ರಂದು ಸೇತುವೆ ಕುಸಿದಾಗ ನಿತಿನ್ ನವೀನ್ ಅವರು ರಸ್ತೆ ನಿರ್ಮಾಣ ಖಾತೆ ಸಚಿವರಾಗಿದ್ದರು. ಬಿಜೆಪಿ ಸರ್ಕಾರದ ಭಾಗವಾಗಿದ್ದಾಗ ಭ್ರಷ್ಟಾಚಾರ ನಡೆದಿದೆ ಎಂಬುದನ್ನು ಸಾಮ್ರಾಟ್ ಚೌಧರಿ, ವಿಜಯ್ ಕುಮಾರ್ ಸಿನ್ಹಾ ಮತ್ತು ಅಮಿತ್ ಮಾಳವೀಯ ಒಪ್ಪಿಕೊಳ್ಳಬಹುದೇ? ನಂದ್ ಕಿಶೋರ್ ಯಾದವ್ ಮಂಗಲ್ ಪಾಂಡೆ ಮತ್ತು ನಿತಿನ್ ನವೀನ್ ತಮ್ಮ ನಾಯಕರ ಹೇಳಿಕೆಗಳನ್ನು ಬೆಂಬಲಿಸುತ್ತಾರಾ ಎಂದು ಶಕ್ತಿ ಸಿಂಗ್ ಯಾದವ್ ಪ್ರಶ್ನಿಸಿದ್ದಾರೆ.
ಸೇತುವೆ ಕುಸಿತದ ವಿಡಿಯೋವನ್ನು ಬಿಜೆಪಿಯ ಐಟಿ ಸೆಲ್ ಉಸ್ತುವಾರಿ ಅಮಿತ್ ಮಾಳವಿಯಾ ಟ್ವೀಟ್ ಮಾಡಿದ್ದಾರೆ. ಈ ಟ್ವೀಟ್ ಹಿನ್ನೆಲೆಯಲ್ಲಿ ಆರ್ಜೆಡಿ ಈ ಪ್ರತಿಕ್ರಿಯೆ ನೀಡಿದೆ. "ಭಾಗಲ್ಪುರದ ಸುಲ್ತಂಗಂಜ್ ಪ್ರದೇಶ ಮತ್ತು ಖಗಾರಿಯಾ ಜಿಲ್ಲೆಗೆ ಸಂಪರ್ಕ ಕಲ್ಪಿಸುವ ನಡುವೆ ನಿರ್ಮಾಣ ಹಂತದಲ್ಲಿದ್ದ ಸೇತುವೆ ಇಂದು ಕುಸಿದಿದೆ. ಸೇತುವೆಯ ಶಂಕು ಸ್ಥಾಪನೆಯನ್ನು ಸಿಎಂ ನಿತೀಶ್ ಕುಮಾರ್ ಮಾಡಿದ್ದರು. ಈ ಸೇತುವೆ 2020ರಲ್ಲೇ ಸಂಪೂರ್ಣ ನಿರ್ಮಾಣಗೊಂಡು ಲೋಕಾರ್ಪಣೆ ಆಗಬೇಕಿತ್ತು ಎಂದು ಅಮಿತ್ ಮಾಳವಿಯಾ ಟ್ವೀಟ್ ಮಾಡಿದ್ದರು.