ಶತಮಾನದ ಬಳಿಕ ದಾಖಲೆ ಮಹಾಮಳೆಗೆ ನಲುಗಿತು ದೇವಭೂಮಿ ಉತ್ತರಾಖಂಡ

ರಣಭೀಕರ ಮಳೆಯಿಂದಾಗಿ ಉತ್ತರಾಖಂಡ ರಾಜ್ಯ​ ತತ್ತರಿಸಿದೆ. ಭಾರಿ ಮಳೆಯಿಂದಾಗಿ ಹಲವೆಡೆ ಭೂಕುಸಿತ ಉಂಟಾಗಿದ್ದು, ಅನೇಕ ಮನೆಗಳು ಧರಾಶಾಹಿಯಾಗಿವೆ. ಇತಿಹಾಸದಲ್ಲೇ ಇದೇ ಮೊದಲ ಬಾರಿಗೆ ಈ ಪ್ರಮಾಣದಲ್ಲಿ ಮಳೆಯಾಗುತ್ತಿದ್ದು, ಹಿಮನದಿಗಳು ಉಕ್ಕಿ ಹರಿಯುತ್ತಿವೆ.

ನವದೆಹಲಿ:ಉತ್ತರಾಖಂಡದಲ್ಲಿ ಮಳೆಯಾರ್ಭಟ ಮುಂದುವರಿದಿದೆ. ಈವರೆಗೆ 45 ಮಂದಿ ಸಾವನ್ನಪ್ಪಿ ಸಾವಿರಾರು ಮಂದಿ ನಿರಾಶ್ರಿತರಾಗಿದ್ದಾರೆ.

ಕಳೆದ 24 ಗಂಟೆಗಳ ಅವಧಿಯಲ್ಲಿ ಧಾರಾಕಾರ ಮಳೆ ಅಬ್ಬರಿಸಿದೆ. ಇಲ್ಲಿನ ಕುಮಾನ್ ಪ್ರದೇಶದಲ್ಲಿ ಪ್ರವಾಹ, ಭೂಕುಸಿತ ಉಂಟಾಗಿದೆ. ಕುಮಾನ್ ಹಾಗೂ ಮುಕ್ತೇಶ್ವರ್​​ ಪ್ರದೇಶ ಸೇರಿ ಹಲವು ನಗರಗಳು ಹಾನಿಗೊಳಗಾಗಿವೆ.

ಇಂದು ಸಹ ರಾಜ್ಯದ 8 ಜಿಲ್ಲೆಯಲ್ಲಿ ಅತೀ ಹೆಚ್ಚು ಮಳೆಯಾಗುವ ಸಾಧ್ಯತೆ ಇದೆ ಎಂದು ಹವಾಮಾನ ಇಲಾಖೆ ಮುನ್ಸೂಚನೆ ನೀಡಿದೆ. ಚಂಪಾವತ್, ನೈನಿತಾಲ್, ಉಧಾಮ್ ಸಿಂಗ್ ನಗರ್, ಭಾಗೇಶ್ವರ್, ಅಲ್ಮೋರ ಮತ್ತು ಚಮೋಲಿ ಪ್ರದೇಶದಲ್ಲಿ ಭಾರಿ ಹೆಚ್ಚು ಮಳೆಯಾಗಲಿದೆ ಎಂದಿದೆ.

ವೈಮಾನಿಕ ಸಮೀಕ್ಷೆ ನಡೆಸಿದ ಸಿಎಂ:

ಮಳೆಯಿಂದ ವಿಪರೀತ ಹಾನಿಗೊಳಗಾದ ಪ್ರದೇಶದಲ್ಲಿ ಸಿಎಂ ಪುಷ್ಕರ್ ಸಿಂಗ್ ಧಾಮಿ ವೈಮಾನಿಕ ಸಮೀಕ್ಷೆ ನಡೆಸಿ, ಪರಿಶೀಲನೆ ನಡೆಸಿದರು.

ಕಳೆದೊಂದು ವಾರದಿಂದ ಕುಮಾನ್ ಹಾಗೂ ಮುಕ್ತೇಶ್ವರ್ ಪ್ರದೇಶದಲ್ಲಿ ಹಿಂದೆಂದೂ ಕಂಡರಿಯದ ಮಳೆಯಾಗಿದೆ. ಸುಮಾರು 107 ವರ್ಷದ ಬಳಿಕ ಈ ಭಾಗದಲ್ಲಿ ಅತೀ ಹೆಚ್ಚು ಮಳೆ ದಾಖಲಾಗಿದೆ.

ಅಲ್ಲದೇ, ರಾಜ್ಯದ ಕೆಲವು ಭಾಗಗಳಲ್ಲಿ 200 ಮಿ.ಮೀ, 400 ಮಿ.ಮೀ ಹಾಗೂ 500 ಮೀ.ಮೀ ವರೆಗೂ ಮಳೆ ಸುರಿದಿದೆ. ಜುಲೈ 10, 1990ರಲ್ಲಿ ಪಂತ್ ನಗರ​​​ 228 ಮಿ.ಮೀ ಮಳೆಗೆ ಸಾಕ್ಷಿಯಾಗಿತ್ತು. ಆದರೆ ನಿನ್ನೆ ಒಂದೇ ದಿನ ಬರೋಬ್ಬರಿ 403.2 ಮಿ.ಮೀ ಮಳೆಯಾಗಿದೆ.

ಮುಕ್ತೇಶ್ವರ್ ಪ್ರದೇಶದಲ್ಲಿ ಮೇ 1, 1897ರಲ್ಲಿ 254.5 ಮಿ.ಮೀಟರ್ ಮಳೆಯಾಗಿತ್ತು. ಇದೀಗ 340.8 ಮಿ.ಮೀಟರ್​​ ಮಳೆಯಾಗಿದ್ದು, ಇಡೀ ಪ್ರದೇಶ ಪ್ರವಾಹದಿಂದಾಗಿ ನಲುಗಿದೆ. ಚಂಪಾವತ್ ಜಿಲ್ಲೆಯೂ 579 ಮಿ.ಮೀಟರ್ ಮಳೆಯಿಂದಾಗಿ ಸಂಪೂರ್ಣ ಪ್ರವಾಹಕ್ಕೆ ತುತ್ತಾಗಿದ್ದು, ಜನಜೀವನ ಅಸ್ತವ್ಯಸ್ತವಾಗಿದೆ. ನೈನಿತಾಲ್ 535 ಮಿ.ಮೀ, ಬಿಮ್ತಾಲ್ 402 ಮಿ.ಮೀ, ಹಲ್ದ್ವಾನಿ 325.4, ರಾಮ್​​ನಗರ್​​​​ 227 ಮಿ.ಮೀಟರ್ ಹಾಗೂ ರುದ್ರಪುರ್​​ನಲ್ಲಿ 484 ಮಿ.ಮೀಟರ್​​​​ ಮಳೆಯಾಗಿದೆ.

ಎನ್‌ಡಿಆರ್‌ಎಫ್‌ ರಕ್ಷಣಾ ಕಾರ್ಯಾಚರಣೆ:

ಮಳೆ ನೀರಿನಿಂದಾಗಿ ಪ್ರವಾಹ ಪರಿಸ್ಥಿತಿ ಉಂಟಾದ ಪ್ರದೇಶಗಳಲ್ಲಿ ರಾಷ್ಟ್ರೀಯ ವಿಪತ್ತು ನಿರ್ವಹಣಾ ಪಡೆ(ಎನ್‌ಡಿಆರ್‌ಎಫ್‌) ರಕ್ಷಣಾ ಕಾರ್ಯಾಚರಣೆ ನಡೆಸುತ್ತಿದೆ.

ಅಕ್ಟೋಬರ್ 21, 22, 23ರಂದು ಉತ್ತರಾಖಂಡದಲ್ಲಿ ಒಣಹವೆ ಮುಂದಿವರಿಯಲಿದ್ದು, ಅಲ್ಲಿಯವರೆಗೂ ಹಲವೆಡೆ ಮಳೆಯಾಗಲಿದೆ ಎಂದು ಹವಾಮಾನ ಇಲಾಖೆ ಹೇಳಿದೆ.

ಇದನ್ನೂ ಓದಿ:ಉತ್ತರಾಖಂಡ ಭೀಕರ ಪ್ರವಾಹಕ್ಕೆ 45 ಸಾವು: ಮನೆ ಕಳೆದುಕೊಂಡವರಿಗೆ 1 ಲಕ್ಷ, ಮೃತರಿಗೆ 4 ಲಕ್ಷ ರೂ.ಪರಿಹಾರ